Amube Acilongwe Asikuswiilila Mipailo

BANTU banji ibalyaamba kuti balasyoma muli Leza tabakonzyi kupandulula kaambo ncobasyomena. Nokuba kupandulula kaambo bukombi kanji-kanji ncobutali kabotu naa kaambo Leza ncalekelede kupenga. Cintu celikke ncobakonzya kucita nkupaila kuli Leza ngobatazyi kabotu.

Nokuba boobo, nywebo mulakonzya kuba acilongwe a Leza. Mulakonzya kuyumya lusyomo lwanu kwiinda mukumuzyiba kabotu Leza calo cikonzya kumupa kumuyanda alimwi akumulumba. Lusyomo lwini-lwini luyeeme abumboni. (Bahebulayo 11:1) Kuti mwaiya kasimpe kujatikizya Leza, mulakonzya kumuzyiba alimwi akubandika anguwe mbuli mulongwe wanu. Amubone zyakuluula zyabamwi ibakali kupaila nokuba kuti bakali kudooneka kuti Leza nkwali.

▪ Ba Patricia, ibaambwa mucibalo cili kumatalikilo, bakaamba kuti: “Bumwi buzuba ndakali abeenzuma bali kkumi mpoonya bakatalika kubandika zyabukombi. Ndakabaambila kuti cimwi ciindi ndakazwa muŋanda kutija mubandi ngobakajisi bataata a Kamboni wa Jehova umwi iwakatuswaide alimwi bataata tiibakali kusyoma kuti Leza nkwali. Mweenzuma umwi wakaamba kuti: ‘Ndiza Bakamboni ba Jehova baliluzi.’

“‘Aumwi wakaamba kuti ‘Mbuti kuti twaunka kumiswaangano yabo kutegwa tukalibonene cicitika?’ Mpoonya twakacita oobo. Nokuba kuti twakali kudooneka, tobamwi twakazumanana kuunka kumiswaangano yabo akaambo kakuti Bakamboni bakali kututambula kabotu.

“Pele bumwi buzuba mu Nsondo, ndakamvwa cintu cimwi cakapa kuti ndicince mbondakali kuzibona zyintu. Mwaambi wakapandulula kaambo bantu ncobapenga. Tiindakazyi kuti kumatalikilo bantu bakalilondokede alimwi akuti cibi alufwu zyakatalikila kumuntu omwe mpoonya akusikila bantu boonse. Mwaambi alimwi wakapandulula kaambo lufwu lwa Jesu ncolwakali kuyandika kutegwa lubambulule cintu ncaakanyonyookelwa muntu wakusaanguna. * (Baloma 5:12, 18, 19) Mpoonya-mpoonya, ndakazimvwisya zyoonse. Ndakazyiba kuti ‘nkwali ncobeni Leza uutulanganya.’ Ndakazumanana kwiiya Bbaibbele alimwi tiilyakalampa, kwaciindi cakusaanguna mubuumi bwangu, ndakali kukonzya kupaila kumuntu wini-wini.”

▪ Ba Allan abalo baambwa mucibalo cakusaanguna,  bakaamba kuti: “Bumwi buzuba Bakamboni ba Jehova bakasika aŋanda yesu, mpoonya bakaintu bangu bakabaambila kuti banjile muŋanda nkaambo bakazikkomanina nzyobakali kwaamba kujatikizya kupona anyika kukabe kutamani. Ndakanyema kapati. Aboobo, ndakazwa akubasiya beenzu akwiitila bakaintu bangu muncikini mpoonya ndakabaambila kuti, ‘Utafwubaali. Tokonzyi kusyoma zyintu mbuli zyeezi!’

“Mpoonya bakaintu bangu bakaingula kuti, ‘kamuya mubatondezye kuti tabaluzi.’

“Masimpe tiindakali kukonzya kubatondezya cili coonse. Pele bakalijisi luse mpoonya bakandisiila bbuku lyakali kwaamba buumi kuti naa bwakalengwa buya naa bwakaboola buyo akaambo kakusanduka. Bupanduluzi bwalyo bwakali kulimvwisya kapati cakuti ndakayanda kuzyiba zinji kujatikizya Leza. Ndakatalika kwiiya Bbaibbele a Bakamboni mpoonya tiilyakalampa, ndakabona kuti ncolyaamba Bbaibbele ciliindene azyintu zyoonse nzyondakazyi kujatikizya bukombi. Mbondakali kuyaabuyaambele mukwiiya kujatikizya Jehova, ndakatalika kupaila kulinguwe cakutainda mumbali. Ndakajisi bube bumwi butali kabotu, aboobo ndakapaila kulomba lugwasyo. Ndasyoma kuti Jehova wakayiingula mipailo yangu.”

 ▪ Ba Andrew bakkala ku England bakaamba kuti: “Nokuba kuti ndakali kwiiyanda kapati sayaansi, ndakali kusyoma munjiisyo yakusanduka akaambo kakuti bantu bamwi bakali kwaamba kuti masimpe. Ndakali kukaka kusyoma muli Leza akaambo kazyintu zibi zyoonse zicitika.

“Pele zimwi ziindi ndakali kuyeeya kuti: ‘Ikuti kakuli Leza kujulu, ndeelede kuzyiba kabotu. Ino nkaambo nzi ncokuli bugwebenga alimwi ankondo?’ Ndaba mumapenzi, ndakali kupaila aabona kulomba lugwasyo, pele tiindakazyi ngondakali kupaila.

Mpoonya muntu umwi wakapa bakaintu bangu katulakiti kakamwaigwa a Bakamboni ba Jehova kakuti Sena Nyika Eeyi Iyoofutuka? Ziindi zinji ndakali kuuyeeya mubuzyo ngweenya ooyu. Katulakiti kakandipa kuyeeya kujatikizya Bbaibbele, ‘Sena bwiinguzi bwandilyo inga bwayandika kulanga-langa?’ Mpoonya nindakali kupumuna muntu uumwi wakandipa bbuku lyakuti The Bible—God’s Word or Man’s? * Nindakabona kuti sayaansi ileendelana ancolyaamba Bbaibbele, ndakayeeya kuti ndeelede kuzyiba zinji kujatikizya Bbaibbele. Aboobo, ciindi umwi Kamboni wa Jehova naakandilomba kuti kandiiya anguwe, ndakazumina. Mbondakali kuyaabwaamvwisya makanze aa Jehova, ndakalimvwa kuti ndamuzyiba kuti nkwali ncobeni alimwi ndilakonzya kwaanguluka kwaambaula anguwe mumupailo.”

▪ Ba Jan, ibakakomezyegwa kabali ba Pulotesitanti ku London bakaamba kuti: “Kuupa-upa aameso muzikombelo alimwi akupenga kapati kwakandipa kuti ndibusulaike bukombi. Alimwi ndakacileka kuunka kukkoleji akutalika kwiimba akuuma gita kutegwa kandipanga mali. Eeci nceciindi nindakaswaanya ba Pat. Bakakomezyegwa kabali ba Katolika pele bakaleka kukomba mbuli ndime.

“Twakali kukkala muŋanda yakali tongo antoomwe abamwi bakali kukkomanina bukombi bwakuzisi zya Kujwe. Ciindi camasiku, twakali kutola mawoola manji kubandika kujatikizya mpindu yabuumi. Nokuba kuti mebo aba Pat tiitwakali kusyoma muli Leza, twakalizyi kuti kweelede kuti kakuli ‘nguzu zipa buumi.’

“Nitwakalongela nkocili kunyika cisi ca England katuyandaula mulimo wakwiimba, mwaneesu musankwa wakazyalwa. Bumwi busiku wakaciswa mpoonya ndakalijana kandipaila kuli Leza ngonditasyomi. Tiilyakalampa, cilongwe cesu aba Pat cakamana mpoonya ndakabweza mwaneesu akubasiya. Alimwi, ndakapaila kulomba lugwasyo kuti ambweni kuli uundiswiilila. Tiindakazyi kuti ba Pat abalo bakali kucita mbubwenya.

“Mbubwenya buzuba oobo, Bakamboni ba Jehova bobilo bakakonkomona amulyango waba Pat akubatondezya lulayo lwamu Bbaibbele lugwasya. Ba Pat bakanditumina luwaile akundibuzya kuti naa inga ndazumina kwiiya Bbaibbele ambabo aba Kamboni. Tiilyakalampa, twakayiiya kuti kutegwa tumukkomanisye Leza, twakeelede kulembya cikwati cesu. Cakali kuboneka mbuli kuti ncintu cikatazya akaambo kambocakabede cikwati cesu.

“Twakali kuyanda kuzyiba zinji kujatikizya kuzuzikizyigwa kwabusinsimi bwamu Bbaibbele, ikaambo ncotupenga, alimwi ancobwaamba Bwami bwa Leza. Buce-buce, twakabona kuti Leza ulatulanganya, alimwi twakali kuyanda kucita ncaamba. Twakakwatana mumulawo. Busongo bujanwa mu Jwi lya Leza bwatugwasya kukomezya bana besu botatwe. Tulasyoma kuti Jehova wakaiswiilila mipailo yesu.”

Amulibonene Bumboni

Mbuli mamiliyoni aabantu aaba baambwa mucibalo eeci balibonena kweenwa kwiinda mubukombi bwakubeja alimwi bazyiba kaambo Leza ncazumizya kupenga. Sena mwabona muzibalo zyoonse eezyi kuti lwakali luzyibo lwini-lwini lwakumvwisya Bbaibbele lwakapa kuti bantu aaba basyome kuti Jehova ulaiswiilila mipailo?

Sena inga mwayanda kulibonena bumboni bwakuti Leza nkwali? Bakamboni ba Jehova bayookkomana kumugwasya kuzyiba kasimpe kujatikizya Jehova alimwi ambomukonzya kuba acilongwe ‘asikuswiilila mipailo.’—Intembauzyo 65:2.

[Bupanduluzi buyungizidwe]

[Majwi aakwelelezya sikubala aali apeeji 10]

“Mbondakali kuyaabwaamvwisya makanze aa Jehova, ndakalimvwa kuti ndamuzyiba kuti nkwali ncobeni alimwi ndilakonzya kwaanguluka kwaambaula anguwe mumupailo.”

[Cifwanikiso icili apeeji 9]

Lusyomo lwini-lwini luyeeme akuzyiba bumboni alimwi akuyanda kuzyiba kasimpe kujatikizya Leza