Ino Nkaambo Nzi Sikuswiilila Mipailo Ncalekelede Kupenga?

NOKUBA kuti balakonzya kupaila, bantu bamwi baladooneka kuti Leza nkwali. Nkaambo nzi ncobadooneka? Ambweni akaambo kakubona kupenga kuli munyika eeyi. Sena kuli nomwakalibuzyide kaambo Leza ncalekelede kupenga?

Sena Leza wakalenga bantu kabali mbuli mbobabede lino—kabatalondekede alimwi kabapenga? Inga tiitwamulemeka leza uuyanda kuti bantu kabapenga. Amuyeeye kaambo aaka: Ikuti mulanga-langa mootokala mupya mpoonya mwajana kuti kuli mpoutali kabotu, sena inga mwaamba kuti mbowakapangwa? Peepe! Inga mwaamba kuti basikuupanga bakaupanga “kauli kabotu” akuti kuli muntu umwi naa cintu cimwi cakaunyonganya.

Mbubwenya buyo, ciindi notulanga bubumbo bwanyika alimwi anotubona kunyongana akutasyomeka kwabantu, ncinzi ncotweelede kuyeeya? Bbaibbele lituyiisya kuti Leza wakabalenga banabukwetene bakusaanguna kabalondokede pele mukuyakwaciindi bakalinyonganya balikke. (Deuteronomo 32:4, 5) Makani mabotu ngakuti Leza usyomezya kuti uyoozibambulula zyintu alimwi bantu bayoolondoka alimwi. Ino nkaambo nzi ncaatolela ciindi cilamfwu boobu?

Nkaambo Nzi Ncalekelede Kupenga Kwaciindi Cilamfwu?

Ikaambo kajatikizya mubuzyo wakuti ino nguni weelede kweendelezya bantu. Jehova kunyina naakajisi makanze aakuti bantu kabalyeendelezya. Nguwakeelede kuba Mweendelezi wabo. Ibbaibbele lyaamba kuti: “Muntu ulaya bweenda, pele tabwene kweenzya intaamu zyakwe.” (Jeremiya 10:23) Cuusisya ncakuti, bantu bakusaanguna bakasala kuzangila bweendelezi  bwa Leza. Kutyola mulawo kwakabapa kuba basizibi. (1 Johane 3:4) Akaambo kaceeci, bakaleka kulondoka alimwi akupa kuti bana babo abalo batalondoki.

Kwamyaka minji, Jehova wabazumizya bantu kuti kabalyeendelezya, alimwi eeci calibonya kuti bantu tabajisi nguzu zyakulyeendelezya. Cilalibonya kuti mfwulumende zyabantu zyoonse zileta kupenga. Kunyina mfwulumende iili yoonse yacikonzya kumana nkondo, bugwebenga, kutalulama, naa malwazi.

Ino Leza Uyakuzibambulula Buti Zyintu?

Ibbaibbele lisyomezya kuti ino-ino Leza uuyooleta nyika mpya iiluleme. (2 Petulo 3:13) Balikke aabo balisalila kutondezya luyando kuli umwi aumwi alimwi akuli Leza mbabayoozumizyigwa kukkala mulinjiyo.—Deuteronomo 30:15, 16, 19, 20.

Ibbaibbele alimwi lyaamba kuti “mubuzuba bwalubeta” ibulaafwaafwi kuboola, Leza uyoogwisya kupenga alimwi abaabo baleta kupenga. (2 Petulo 3:7) Kwaakumana waawo, Jesu Kristo, mweendelezi uubikkidwe a Leza, uyakweendelezya bantu basyomeka. (Daniele 7:13, 14) Ino bweendelezi bwa Jesu buyakuzuzyikizya nzi? Bbaibbele lyaamba kuti: “Pele babombemyoyo bayoovuba nyika, bayookondwa muluumuno lunji.”—Intembauzyo 37:11.

Kali Mwami wakujulu, Jesu uyakuzibambulula zyintu—kubikkilizya akuciswa, kucembaala, alimwi alufwu—izyakaboola akaambo kakuti bantu bakazangila Jehova, ‘sikasensa kabuumi.’ (Intembauzyo 36:9) Jesu uyakubaponya boonse aabo bazumina bweendelezi bwakwe bwaluyando. Mubweendelezi bwakwe, zisyomezyo eezyi zyamu Bbaibbele ziyakucitika ncobeni:

 ▪ “Takukooyooba naba omwe akati kabantu banyika uuamba kuti, ndaciswa. Bantu boonse bakede mulinjiyo bayoolekelelwa milandu yabo.”—Isaya 33:24.

▪ “[Leza] uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”—Ciyubunuzyo 21:4.

Sena tacikkazyiki moyo kuzyiba kuti ino-ino Leza uyoocizuzikizya cisyomezyo cakwe cakumanizya kupenga koonse? Calino, tulasyoma kuti ulaiswiilila mipailo yesu nokuba kuti wazumizya kupenga kwakaindi kasyoonto buyo.

Leza nkwali. Ulakonzya kumuswiilila neliba leelyo nomwaamba mapenzi aanu. Alimwi uliyandide kumubona nywebo kamupona ciindi kudooneka akupenga kwanu kwaakumana.