Lino Ndamuzyiba Leza Ngondikomba

Akaluulwa aba Marieta Manuel Bacudio

Mukambausi wakucikombelo ca Pentekoste wakali kulyaamba kuti wakalijisi nguzu zyakuponya wakandiswaya. Naakandiguma, ndakawaansi kakunyina akuzyiba cakali kucitika, “kandinjidwe muuya.” Nindakabuka, ndakalimvwa mbuli kuti ndacijana ncindakali kuyanda—nguzu zyakuponya. Ino ncinzi cakapa kuti eeci cindicitikile alimwi ino cakabujatikizya buti buumi bwangu? Kanditanamwaambila, amuleke ndimupandulwide mbobwakabede buumi bwangu.

Ndakazyalilwa ku Ilocos Norte, Philippines, mu December 10, 1968. Ndakali mwana waciloba kukuzyalwa. Mbuli bantu banji baku Philippines, twakakomezyegwa katuli bacikombelo ca Katolika. Ndakamanizya cikolo casekondali mu 1986, mpoonya ndakali kuyanda kuba nesi. Pele makanze aangu aakuyanda kuba nesi taakacitika akaambo kakuti ndakaciswa bulwazi bubyaabi. Ndakali kuyeeya kuti ndiza ndilafwa. Kandityompedwe akaambo kakuciswa, ndakamulomba Leza kuti andigwasye alimwi akuti, ikuti naa ndapona, ndiyakumubelekela mubuumi bwangu boonse.

Nindakapona, ndakayeeya ncindakamusyomezya Leza. Aboobo, mu June 1991, ndakalilembya mucikolo cakwiiya Bbaibbele ca Pentecostal. Milawo yacikolo yakali kubikkilizya akutambula “cipego cabuyo ca muuya uusalala.” Ndakali kuyanda kuba anguzu zyakuponya. Cikolo cakatuyiisya kuti eeci cakali kukonzyeka kwiinda mukuliimya kulya alimwi akupaila. Cimwi ciindi kuyanda kulitondezya kuti ndakalijisi “cipego,” cakusisikizya ndakaswiilila mupailo waumwi ngondakali kwiiya limwi naakali kupaila cakupozya akkona ciindi nitwakali kupaila. Naakali kuyanda kumanizya, cakufwambaana ndakajokela nkondakafwugeme. Kumane, ndakamwaambila zyoonse nzyaakali kulomba mumupailo wakwe, alimwi wakasyoma kuti lino ndakalijisi “cipego cabuyo”!

Kandicizumanana alwiiyo lwangu acikolo, ndakalijisi mibuzyo minji. Mucikozyanyo, lugwalo lwa Matayo 6:9 lwaamba kujatikizya ‘Taata’ alimwi “azyina” lyakwe. Ndakabuzya mibuzyo mbuli yakuti “Ino Taata wakaambwa aa Jesu nguni?” alimwi “Ino ndizyina lyani lyeelede kusalazyigwa?” Bwiinguzi bwabamayi bangu kanji-kanji tiibwakali kulimvwisya alimwi tiibwakali kundisika amoyo. Bakali kwaamba kujatikizya njiisyo yabutatu alimwi bakali kwaamba kuti maseseke. Cakali kundinyonganya kapati. Nokuba boobo, ndakazumanana lwiiyo lwakuba pasita.

Mbondakayaanya Bakamboni ba Jehova

Mucikolo ca Bbaibbele, twakayiisyigwa kuti Bakamboni ba Jehova mbabantu bainda kukulwaizya bukombi bwakubeja. Alimwi bakali kwaambwa kuti mbaasikulwanya Kristo. Aboobo ndakatalika kucisulaika cikombelo eeci.

Mumwaka wabili kandili kucikolo, ndakaunka kuŋanda kuyakuswaya bazyali bangu zikolo nizyakajalwa. Bacizyi bangu bapati ba Carmen bakamvwa kuti ndakaboola kuŋanda aboobo abalo bakaboola kweendeenda. Bakali bbapatizyidwe kale, alimwi bakali mumulimo waciindi coonse wa Bakamboni ba Jehova. Nibakasoleka kundiyiisya kujatikizya Leza, ndakanyema kapati akubaambila kuti “Ndilimuzyi kale Leza ngondibelekela!” Nindakamana kubakalalila, ndakabatonka  alimwi tiindali kuyanda kubapa ciindi acimbi cakuti baambaule andime.

Nindakajokela kucikolo ca Bbaibbele, ba Carmen bakanditumina broshuwa yakuti Should You Believe in the Trinity? * Mpoonya-mpoonya, ndakaivwunga-vwunga akwiisowela mumulilo. Ndakacilinyemede.

Kuyaambele Mulwiiyo Lwabupasita

Kandizumanana mulwiiyo lwangu a Cikolo ca Bbaibbele, ndakacikonzya kusandula bantu bamwi. Ndakakkomana kapati ciindi bamaama alimwi amwanookwesu musankwa nibakandisangana mucikombelo ca Pentekoste.

Mu March 1994, ndakamanizya lwiiyo lwangu kucikolo cakwiiya Bbaibbele ca Pentecostal. Mbuli mbokwaambwa kale kumatalikilo, mukambausi uuswaya wakaliko aciindi eeci. Toonse tobasikumanizya cikolo twakali kuyanda kuba anguwe nkaambo twakali kusyoma kuti wakalijisi cipego canguzu zyakuponya. Twakamusangana acibumbili, katusotooka akukamba ambabo katutobelezya bbaandi. Mpoonya kufwumbwa ngwaakali kuguma wakali kuwaansi, “akaambo kakunjilwa muuya.” * Andime naakandiguma, ndakawaansi kanditazyi cakali kucitika. Naakaboola maano, ndakayoowa, pele ndakazyiba kuti lino ndaba anguzu zyakuponya, aboobo ndakakkomana.

Tiilyakalampa, ndakabelesya muuya ngweenya ooyu kuponya mwana wakacisidwe kapati kupya mubili. Nindakapaila, mwana mpoonya-mpoonya wakatalika kuzwa nkasaalo alimwi amubili wakaleka kupya. Lino ndakalimvwa kuti ndakali kukonzya kuzuzikizya cisyomezyo cangu kuli Leza. Cigambya ncakuti ndakali kulimvwa kuti kuli ncendakali kuyandika. Mukati, ndakali kulimvwa kuti kuli buyo Leza omwe, pele tiindakamuzyi kuti naa nguni. Alimwi ndakali kuzidooneka njiisyo zinji zyamu cikombelo cesu.

Zyintu Izyakandipa Kucinca Kuyeeya

Kuzwa nizyakacitika zyintu eezyo, ndakaindila kubazonda Bakamboni ba Jehova. Kufwumbwa buyo mpondali kujana mabbuku a Bakamboni ndakali kwaaumpa. Mpoonya kwakacitika cintu cimwi ncondatakali kuyeeyela. Ndakagambwa kuzyiba kuti bamaama tiibakacili kuciyanda cikombelo cesu. Ba Carmen bakali kwiiya Bbaibbele ambabo! Bapati bangu aaba bakandinyemya kapati.

Mpoonya ndakajana magazini ya Sinsimuka! muŋanda yabamaama. Mbuli lyoonse, ndakali kulangilwa kuyuumpa. Pele akaambo kakuyanda kuzyiba ncibakali kubala, ndakatalika kulanga-langa zyakali mukati. Ndakabona cibalo cijatikizya muntu wakali kusyoma kapati munjiisyo zyacikombelo cakwe. Pele, naakatalika kubala mabbuku aaba Bakamboni antoomwe a Bbaibbele, wakasyoma kuti njiisyo yabutatu, mulilo wahelo, alimwi ayakutafwidilila kwamuntu taili yamu magwalo. Nzyondakabala zyakandisika kumoyo. Eezyi nzyezyintu nzyondakali kuyandisya kumvwisya. Kuzwa ciindi nindakabala cibalo eeci, ndakatalika kuyandisisya kuzyiba kasimpe kamu Bbaibbele.

Nindakabala cibalo acimwi mumagazini ya Sinsimuka! cijatikizya cakuluula camuntu umwi wakali kuciindizya kunywa bukoko alimwi akubelesya misamu iikola mbwaakacinca akaambo kakwiiya Bbaibbele, ndakatalika kubala  mabbuku manji aa Bakamboni. Ndakajana broshuwa yakuti The Divine Name That Will Endure Forever. * Nindakabala broshuwa eeyi, ndakaiya kuti zyina lya Leza ngu Jehova. Cakandikkomanisya kapati kwiiya kasimpe kujatikizya Leza alikke wakasimpe!—Deuteronomo 4:39; Jeremiya 10:10.

Ndakazumanana kubala cakusisikizya alimwi ndakaiya zinji kujatikizya kasimpe kamu Bbaibbele. Mucikozyanyo, kucikolo ca Pentecostal ndakayiisyigwa kuti Jesu ngu Leza, pele lino ndakaiya kuzwa mu Bbaibbele kuti “mwana wa Leza muumi.”—Matayo 16:15, 16.

Kucinca Mizeezo

Nitwakabonana aba Carmen alimwi, bakagambwa nindakabalomba broshuwa yakuti The Divine Name That Will Endure Forever, alimwi amabbuku buyo aambi. Ndakatola myaka minji mu Bible school pele kunyina nindakayiisyigwa kasimpe; ndakali mumudima. Moyo wangu lino wakakkomana akaambo kakasimpe nkondakali kwiiya kuzwa mu Bbaibbele. Ndakaamvwiisya majwi a Jesu aakuti: “Mulazyiba kasimpe, eelyo kasimpe kalamwaangununa.” (Johane 8:32) Kasimpe aaka katalika kucinca buumi bwangu.

Kwaciindi cili mbocibede, ndakali kuyeeya kuti inga ndamukomba Jehova Leza cakusisikizya mpoonya alimwi akuzumanana kuba pasita. Tiilyakalampa, ndakabona kuti tiindakali kukonzya kuyiisya njiisyo zinji zyamu cikombelo. Nokuba boobo, ndakali kuyoowa. Ino nindakali kwaajana kuli mali aakuti kandibelesya kuti ndacileka kuba pasita? Eelo kaka cakali kujazya nsoni kucikombelo ikuti naa umwi pasita wabo waba Kamboni wa Jehova! Aboobo, ndakazumanana kuyiisya kandili pasita, pele ndakali kuzyeeleba njiisyo zyacikombelo zyakubeja.

Nitwakabonana aba Carmen alimwi, bakandilomba kuti nduunke kumiswaangano ya Bakamboni ba Jehova. Akaambo kakuti ndakali kuunka kucikombelo cesu mudolopo lya Laoag, ndakayandaula busena nkobacitila miswaangano Bakamboni, Ŋanda ya Bwami. Bakanditola kuti tuzyibane aba Alma Preciosa Villarin, mbokali kwiita kuti “Precious,” ibakali kubeleka mumulimo waciindi coonse mumbungano eeyo. Nokuba kuti tiindakalinatalika kubayanda Bakamboni, ndakazumina kuti kabandiyiisya Bbaibbele.

Bapati bangu bakali kundikkazyikila moyo nibakali kundaambila kasimpe kali mu Bbaibbele. Muuya ooyu ngweenya ndakaubona muli ba Precious. Bakandigwasya kapati kulimvwisya Bbaibbele nokuba kuti cakali kundicima akusoleka kubakazya alimwi zimwi ziindi ndakali kubabwentela, akukakatila kuzyintu zimwi nzyondakayiisyidwe. Kundibikkila maano kwabo, kulicesya alimwi akubomba moyo nkobakanditondezya ba Precious alimwi a Bakamboni bambi kwakandisika amoyo. Eeci cakandipa kuyanda kukomba Jehova.

 Mu July 1995, ndakabona kuti, ikuti naa kandiyanda kukkomanisya Leza, kunyina ncindakali kukonzya kucita pele kubuleka bupasita. Nkaambo nzi? Munzila ya cikozyanyo, lugwalo lwa Ciyubunuzyo 18:4 lwaamba kujatikizya bukombi bwakubeja noluti: “Amuzwe mulinguwe, nobantu bangu, ikuti kamutayandi kujatikizyigwa azibi zyakwe, alimwi ikuti kamutayandi kusikilwa zipenzyo zyakwe zimwi.” Ino mbuti kujatikizya mbondakali kukonzya kujana mali aakubelesya? Lugwalo lwa Bahebulayo 13:5 lwakandiyiisya kuti, ikuti twacita kuyanda kwa Leza, utusyomezya kuti: “Ziyume zitete, tandikakusiyi pe alimwi tandikakulekelezyi pe.”

Nokuba kuti bataata amwanookwesu musankwa lino bakatalika kundikazya kapati, nsondo zyobilo kanditana kubbapatizyigwa kuba Kamboni, ndakaliyumya akuunka kuŋanda kuyakuumpa zyintu zyoonse nzyondakali kubelesya mumulimo wangu wabupasita. Nindakamana kucita oobo, ndakabona kuti kufwumbwa nguzu zilibedelede nzyondakapedwe zyakamana. Ikaindi, ndakali kumvwa mbuli kuti kuli cakali kundidyaaminina lyoonse ndoona. Kulimvwa boobu akwalo kwamana. Izinzimweemwe nzyondakali kubona ampulungwido yaŋanda yangu tiindakacili kuzibona alimwi pe. Kwiiya Bbaibbele kwakandiyiisya kuti kufwumbwa cintu caambwa kuti ncipego mazuba aano, mbuli nguzu zyakuponya tazizwi kuli Leza pele zizwa kumyuuya mibi. Ndakakkomana kapati kuti ndakaangululwa kukuyungwa kwanjiyo, mbuli musimbi mbwakacita walo Paulo alimwi a Barnaba ngobaakangununa ‘kudaimona lyakusondya.’—Milimo 16:16-18.

Eelo kaka cakali kukkomanisya kuba amulongo wakubbapatizyigwa antoomwe abamaama kutegwa tube Bakamboni ba Jehova mu September 1996! Nindakamana kubbapatizyigwa, ndakalilembya kuba mubelesi waciindi coonse wa Bakamboni ba Jehova alimwi ndakakkomana kubeleka munzila iili boobu kwamyaka minji.

Lino ndikwetwe kubalumi bangu ba Silver. Antoomwe, tulabeleka canguzu kuyiisya mwaneesu musimbi munzila yakasimpe kamu Bbaibbele. Banabokwesu abamwi lino bandisangana mukubelekela Jehova. Nokuba kuti ndiluuside akaambo kakuti tiindakamuzyi Leza kwamyaka minji, ndilikkomene kapati kuti lino ndilimuzyi Leza ngondikomba.

[Bupanduluzi buyungizidwe]

[Majwi aakwelelezya sikubala aali apeeji 27]

Ndakabelesya nguzu eezyi kuponya mwana wakacisidwe kupya mubili

[Majwi aakwelelezya sikubala aali apeeji 28]

Kasimpe aaka kakatalika kucinca buumi bwangu

[Majwi aakwelelezya sikubala aali apeeji 29]

Cakandikkomanisya kapati kwiiya kasimpe kujatikizya Leza wakasimpe alikke!

[Cifwanikiso icili apeeji 27]

Nindakamanizya lwiiyo lwabupasita

[Cifwanikiso icili apeeji 28, 29]

Ba Precious bakandiyiisya Bbaibbele

[Cifwanikiso icili apeeji 29]

Ciindi mebo abamaama nitwakabbapatizyigwa

[Cifwanikiso icili apeeji 29]

Kandibeleka mulimo waciindi coonse wa Bakamboni ba Jehova

[Cifwanikiso icili apeeji 29]

Abalumi bangu, mwaneesu musimbi, alimwi abamukowaangu bakatusangana mubukombi bwakasimpe