AMUBE ACILONGWE A LEZA
AMUBE ACILONGWE A LEZA
“Waziyubunwida Bana Basyoonto”
Sena mulayanda kuzyiba kasimpe kujatikizya Leza—kuti nguni, nzyayanda alimwi anzyasulaika? Mu Jwi lyakwe, Ibbaibbele, Jehova Leza ulayubununa kasimpe kajatikizya nguwe. Pele tabali boonse bakonzya kulibala Bbaibbele alimwi akukamvwisya kasimpe aako. Nkaambo nzi? Nkaambo kumvwisya kasimpe kakumuuya ncoolwe; alimwi tabali boonse bacijisi. Atulange-lange Jesu ncaakaamba kujatikizya kaambo aaka.—Amubale Matayo 11:25.
Kapango aaka kalatalika amajwi aakuti: “Mpoonya Jesu wakati.” Aboobo, ambweni Jesu uyanda kwaamba cintu cazwa akucitika. Wazwa akunyemena bantu ibakaka kuba basikwiiya bakwe bakuminzi ya Galilaya yotatwe nkwaakacita maleele. (Matayo 11:20-24) Mulakonzya kubuzya kuti, ‘Ino bantu ibakabona milimo ya Jesu yamaleele inga baalilwa buti kusyoma kasimpe nkaakayiisya?’ Icakali kupa bantu kutaswiilila nkuyuma myoyo kwabo.—Matayo 13:10-15.
Jesu wakalizyi kuti kutegwa tumvwisye kasimpe kakumuuya kajanika mu Bbaibbele, tuyandika zyintu zyobilo: Lugwasyo iluzwa kuli Leza alimwi amoyo mubotu. Jesu wakapandulula kuti: “Ndakutembaula caantangalala Taata, O Mwami wakujulu aanyika, nkaambo wazisisa zyintu eezyi kubasongo abacenjede, pele waziyubunwida bana basyoonto.” Sena mwakabona kaambo ncocikonzya kubonwa kuti ncoolwe ikumvwisya kasimpe kakumuuya kajanika mu Bbaibbele? Jehova, “Mwami wakujulu aanyika,” ulakonzya kukasisa naa kukayubununa kasimpe kweelana akuyanda kwakwe. Pele Leza tasalululi, aboobo muntu uuliwoonse ulakonzya kuba acoolwe cakumvwisya kasimpe. Ncinzi cikonzya kupa kuti Jehova abayubunwide kasimpe kamu Bbaibbele bantu bamwi?
Jehova uyanda bantu balicesya kutali balisumpula. (Jakobo 4:6) Ulakasisa kasimpe kubantu “basongo abacenjede”—bantu bajisi busongo bwakunyika alimwi balimvwa kuti tabayandiki lugwasyo akaambo kakulisumpula alimwi akulisyoma. (1 Bakolinto 1:19-21) Pele ulakayubununa kasimpe “[ku]bana basyoonto,” nkokuti aabo baboola kulinguwe amyoyo mibombe, ibalicesya mbuli mwana. (Matayo 18:1-4; 1 Bakolinto 1:26-28) Jesu, Mwana wa Leza, wakalibazyi bantu bali boobu. Basololi bazikombelo banji ibakali kulisumpula alimwi bakayiide kapati tiibakaumvwisya mulumbe wa Jesu, pele bazubi banswi ibakali kulicesya bakaumvwisya. (Matayo 4:18-22; 23:1-5; Milimo 4:13) Aciindi nciconya, bamwi bakavwubide alimwi bakayiide ibakatondezya kulicesya kwini-kwini bakaba batobeli ba Jesu.—Luka 19:1, 2, 8; Milimo 22:1-3.
Atupilukile alimwi kumubuzyo ngotwabuzyide atala aawa wakuti: Sena mulayanda kuzyiba kasimpe kujatikizya Leza? Ikuti kacili boobo, mulakonzya kuumbulizyigwa kuzyiba kuti Leza tabayandi aabo balitondezya kuti mbasongo. Mukwiimpana, ulabayanda aabo basulaikwa abantu bajisi busongo bwakunyika. Ikuti kamwiiya Jwi lya Leza cakulicesya, mulakonzya kuba akati kabaabo Jehova mbapa cipego cibotu cakumvwisya kasimpe kajatikizya nguwe. Kuzyiba kasimpe aaka ciyakuyungizya lukkomano mubuumi bwanu lino alimwi akuba“[a]buumi bwini-bwini”—buumi butamani munyika mpya iiluleme njaakasyomezya Leza iili afwaafwi. *—1 Timoteyo 6:12, 19; 2 Petulo 3:13.
Magwalo Aamu Bbaibbele Aasalidwe Kubalwa mu January
[Bupanduluzi buyungizidwe]
^ munc. 7 Bakamboni ba Jehova inga bakkomana kumugwasya kwiiya kasimpe kajatikizya Leza amakanze aakwe. Balacita ziiyo zya Bbaibbele zitabbadelelwi, kwiinda mukubelesya bbuku lyakutiIno Ncinzi Cini Bbaibbele Ncoliyiisya?
