IBBAIBBELE LILAKONZYA KUBACINCA BANTU

“Lino ndalujana lwaanguluko lwini-lwini”

Akaluulwa aba Brian Hewitt

MWAKA WAKUZYALWA: 1981

KUCISI NKWAZWA: UNITED STATES

MBWAAKABEDE KAINDI: MWANA MUTAKA

MBONDAKABEDE KAINDI: Ndakazyalilwa ku Moundsville, mudolopo bantu mobaliiba kukkala lili mumbali aa Mulonga wa Ohio, West Virginia nkoili kunyika. Akaambo kakuti kwakali bana bone, botatwe kabali basankwa, buumi bwakali kukkomanisya aŋanda alimwi tiibwakali kulendelezya. Bazyali bangu bakali kubeleka canguzu, bakali kusyomeka alimwi bakali aluyando kubantu. Tiitwakajisi mali manji, nokuba boobo lyoonse twakali kujana zyintu nzyotwakali kuyandika. Mbwaanga bazyali bangu bakali Bakamboni ba Jehova, bakasolekesya kutuyiisya njiisyo zyamu Bbaibbele nitwakacili bana.

Pele kuzoosika ciindi nondakaba mukubusi, ndakatalikide kale kuyungwa kuleka kucita zyintu nzyondakayiisyigwa. Ndakatalika kudooneka mpindu ziliko mukusololelwa anjiisyo zyamu Bbaibbele. Ndakatalika kuyeeya kuti kuba alwaanguluko lwakucita zyintu kufwumbwa nzyondiyanda njenzila ilikke yakujana lukkomano lwini-lwini. Tiikwakainda ciindi, ndakacileka kuunka kumiswaangano ya Bunakristo. Abalo banabokwesu bobilo bakazanga mbuli ndime. Bazyali besu bakasola nzila iiliyoonse kutegwa batugwasye pele tiitwakabaswiilila.

Tiindakazyi kuti lwaanguluko oolo ndondakali kuyanda lwakali kuyoondipa kucita zyintu zibyaabi. Bumwi buzuba nindakali kuzwa kucikolo kuunka kuŋanda, mweenzuma wakandipa musanga watombwe. Ndakauzumina. Kuzwa buzuba oobu, ndakatalika kucita zyintu zinji zibyaabi. Mukuyakwaciindi, ndakatalika kubelesya misamu iikola, kunywa bukoko alimwi akutalilemeka. Nokwakainda myaka iili mbwiibede, ndakatalika kubelesya misamu iikola iilaanguzu alimwi iinyonyoona mubili alimwi ndakaba muzike wanjiyo. Kandicizumanana acilengwa cangu, ndakatalika kuulisya misamu iikola kutegwa kandijana nzyondiyanda mubuumi.

Nokuba kuti ndakasoleka canguzu kutaabikkila maano manjezyeezya aangu, akali kundiyeezya lyoonse kuti buumi mbondakali kupona tiibwakaluzi pe. Pele ndakalimvwa kuti ndakamuka kale kuncinca buumi oobu mbondakasala. Nokuba kuti ndakali kujanika akati kabantu banji mumapobwe alimwi amumankosaadi, kanji-kanji ndakali kulimvwa kulendelelwa akutyompwa.  Zimwi ziindi, ndakali kuyeeya bulemu mbobajisi bazyali bangu ambobali kabotu alimwi akulibuzya cakapa kuti ndizanduke boobu.

BBAIBBELE MBOLYAKANDICINCA: Nokuba kuti mebo tiindakajisi bulangizi bwakuti ndiyoocinca, bamwi bakalibujisi. Mumwaka wa 2000, bazyali bangu bakanditamba kuti ndikajanike kumuswaangano wacooko wa Bakamboni ba Jehova. Ndakaunka nokuba kuti tiindakali kuyanda. Icakandigambya ncakuti abalo banabokwesu bobilo ibakazangide bakaunka.

Katuli kumuswaangano, ndakazooyeeya kuti ndakaliko abusena aawa ciindi nikwakali nkosaadi kakwiindide mwaka omwe. Kwiindana nkondakabona kwakandisika amoyo kapati. Nokwakali nkosaadi, busena bwakali adooti alimwi bwakazwide busi bwatombwe. Bunji bwabantu bakali ankosaadi tiibakali kuseka-seka, alimwi mulumbe iwakali munyimbo zyakali kulila wakali kutyompya. Pele kumuswaangano, ndakazingulukidwe bantu bakakkomene ncobeni—bantu ibakanditambula camaanza obilo nokuba kuti tiitwakabwenene kwamyaka minji. Busena bwakanyina dooti, alimwi mulumbe wakali kwaambwa wakali kupa bulangizi. Kubona bubotu bwakasimpe kamu Bbaibbele kwakandipa kulibuzya kaambo kakandipa kukaka kasimpe!—Isaya 48:17, 18.

Mbowakainda buyo muswaangano, ndakasala kujokela kumbungano ya Bunakristo. Abalo banabokwesu bakayanda kujokela akaambo kakukulwaizyigwa azyintu nzyobakabona kumuswaangano ooyo. Toonse totatwe twakazumina ciiyo ca Bbaibbele.

Lugwalo lwa Jakobo 4:8 ilwaamba kuti: “Amuswene kuli Leza, eelyo awalo uyooswena kulindinywe,” lwakandikulwaizya kapati. Ndakazyiba kuti, ikuti kandiyanda kuswena kuli Leza, ndakeelede kucinca bukkale bwangu. Kucinca kumwi nkondakeelede kucita kwakali kubikkilizya kuleka kufweba tombwe, kubelesya misamu iikola alimwi akuciindizya kunywa bukoko.—2 Bakolinto 7:1.

Ndakaleka kumvwana abalongwe bangu bakaindi akutalika kupanga zilongwe akati kabakombi ba Jehova. Mwaalu Munakristo iwakali kundiyiisya Bbaibbele wakandigwasya kapati. Ciindi aciindi wakali kunditumina fooni akuboola kundibona. Kusikila asunu, nguumwi wabalongwe bangu mbotumvwana kapati.

Mumwaka wa 2001, ndakalyaaba kuli Leza kwiinda mukubbapatizyigwa antoomwe abanabokwesu bobilo. Amweezyeezye lukkomano ndobakajisi bazyali bangu antoomwe amusyoonto wangu musankwa watakazanga ciindi mukwasyi wesu woonse nowakakamantana mukukomba Jehova.

MBONDAGWASYIGWA: Ndakali kuyeeya kuti njiisyo zyamu Bbaibbele tazipi lwaanguluko, pele lino ndizibona kuba cilikwabilizyo cigwasya kapati. Bbaibbele lyakandipa kuleka kubelesya misamu iikola alimwi akusambala, mpoonya ndakaba muntu uuli kabotu.

Lino ndijisi coolwe cakuba akati kabakombi ba Jehova bapanga bunyina bwanyika yoonse. Bantu aaba bayandana ncobeni, alimwi balikamantane mukubelekela Leza. (Johane 13:34, 35) Akati kababunyina ndakajana cilongezyo cilibedelede—mukaintu wangu, Adrianne, walo ngondiyanda kapati. Cilatukkomanisya kapati kubelekela Mulengi wesu antoomwe.

Muciindi cakupona buumi bwakuliyanda, lino ndilabeleka kandili mubelesi waciindi coonse, kuyiisya bantu mbobakonzya kugwasyigwa abalo kwiinda mu Jwi lya Leza. Mulimo ooyu wandiletela lukkomano lutaambiki. Cakusinizya ndilakonzya kwaamba kuti Bbaibbele lyabucinca buumi bwangu. Lino ndalujana lwaanguluko lwini-lwini.

[Majwi aakwelelezya sikubala aali apeeji 11]

“Bbaibbele lyakandipa kuleka kubelesya misamu iikola alimwi akusambala, mpoonya ndakaba muntu uuli kabotu”