Kuli Basikubala
Kuli Basikubala
Magazini eeyi njomulimukubala yakatalika kumwaigwa mu July 1879. Ziindi zyacinca kuzwa ciindi eeco—aboobo, ayalo magazini eeyi yacinca. (Amubone zifwanikiso zili atala aawa.) Kutalikila amagazini eeyi, mulabona kuti kuli kucinca mbuli mboyinooboneka Ngazi Yamulindizi. Ino ncinzi ciyoocinca?
Amubone peeji 2 iijisi zili mukati, mpoonya mubone mutwe wakuti “Amubale Zinji a Intaneti.” Mwezi amwezi ansi aamutwe ooyu munoobona mitwe yazibalo zinoojanika buyo a Web site ya www.pr418.com. Ino nkaambo nzi zibalo zimwi ncozinoobikkwa a Intaneti?
Muzisi zinji, bantu banji balajana twaambo a Intaneti alimwi balaikkomanina nzila eeyi. Batyanka buyo mouse, balakonzya kujana twaambo tujanika buyo a Intaneti. Mabbuku manji, mamagazini, alimwi amiteende zilakonzya kubalwa a Intaneti.
Akaambo kakuti bantu banji bayanda kubalila a Intaneti, caino-ino, twakabambulula Web site yesu ya www.pr418.com, kutegwa kaikondelezya alimwi kaitakatazyi kubelesya. Aabo bayanda kubala zili a Web site balakonzya kubala mabbuku aakalembwa mumyaambo iinda ku 430. Kutalikila mwezi uuno, aabo bayanda kubala zili a Web site yesu balakonzya kubala zibalo zisalidwe zyalo izyali kusimbwa mumamagazini pele lino zinoojanika buyo a Web site. *
Akaambo kakuti tunoogwisya zibalo zinji a Intaneti, kutalikila amagazini eeyi, Ngazi Yamulindizi yabuleya iyakucesyegwa, inoojisi mapeeji aali 16 muciindi camapeeji aali 32. Lino, Ngazi Yamulindizi ilasandululwa kale mumyaambo iili 204. Akaambo kakuti yafwiinsyigwa, ambweni lino cilakonzyeka kwiisandulula mumyaambo minji.
Tusyoma kuti kucinca ooku kulapa kuti tusikile bantu banji amulumbe wamu Bbaibbele uupa kuti bantu bakafwutuke. Tulikanzide kuzumanana kumwaabila zyakubala ziyiisya alimwi zikkomanisya—izisimbidwe alimwi azijanika a Intaneti—kugwasya basikubala balemeka Bbaibbele alimwi ibayanda kuzyiba cini ncoliyiisya.
Basikumwaya
[Bupanduluzi buyungizidwe]
^ munc. 5 Akati kazibalo zinoojanwa buyo a Intaneti nzyeezi zitobela: “Cibeela Cabakubusi,” icaamba zibalo zyamu Bbaibbele zijatikizya bakubusi, alimwi acibalo cakuti “Nzyondiiya Kuzwa mu Bbaibbele,” zibalo zibambilidwe bazyali kuti kababelesya kuyiisya bana babo bajisi myaka yakuzyalwa yotatwe naa iitasiki aawo.
[Cifwanikiso icili apeeji 3]
[Cifwanikiso icili apeeji 3]
A INTANETI
Amweebelele kavidiyo kakuti “The Watchtower—Published Since 1879”
(Amubone aalembedwe kuti NEWS/Ngazi Yamulindizi—Kunyina magazini iimwi iikonzya kweezyanisyigwa ayeeyi)
