MIBUZYO YAMU BBAIBBELE YAINGULWA

Ino Leza nguni zyina?

Banamukwasyi boonse balijisi mazyina aabageme. Nozyiba zinyama zivwubwa zilijisi mazyina. Sena inga taceeleli kuti Leza kajisi zyina? Mu Bbaibbele, Leza ulijisi mazyina aabulemu manji, mbuli aakuti Leza Singuzuzyoonse, Mwami Mupati, Mulengi, pele alimwi ulijisi zyina lyakwe limugeme.—Amubale Isaya 42:8.

Muma Bbaibbele manji izyina lya Leza limugeme lilajanika mulugwalo lwa Intembauzyo 83:18. Mucikozyanyo, mu Bbaibbele lya Chitonga lyamu 1963, lugwalo oolu lwaamba kuti: “Nduwe olike oojisi izina lya-Jehova, nduwe Mupatikampatila atala anyika yoonse.”

Nkaambo nzi ncotweelede kulibelesya zyina lya Leza?

Leza uyanda kuti katulibelesya zyina lyakwe limugeme. Tulabelesya mazyina aacigaminina notubandika abaabo mbotuyanda, mbuli balongwe besu—ikapati kuti batwaambila kucita oobo. Sena ciliindene caboola kukubandika a Leza? Kuyungizya waawo, Jesu Kristo wakatukulwaizya kubelesya zyina lya Leza.—Amubale Matayo 6:9; Johane 17:26.

Pele, kutegwa tube balongwe ba Leza tweelede kuzyiba zinji kujatikizya nguwe kutali buyo zyina lyakwe. Mucikozyanyo, ino Leza ulibuti? Sena cilakonzyeka kuba acilongwe a Leza? Mulakonzya kujana bwiinguzi kumibuzyo eeyi mu Bbaibbele.

Kutegwa muzyibe zinji, amubone cibalo 1 cabbuku eeli lya Ino Ncinzi Cini Bbaibbele Ncoliyiisya? lyakalembwa a Bakamboni ba Jehoha

[Cifwanikiso icili apeeji 16]

Tubelesya mazyina aabageme ciindi notubandika abantu mbotuyanda, mbuli balongwe besu