Musa Muntu Wakali Kulicesya

INO KULICESYA NINZI? Kulicesya kubikkilizya kutaba amuuya wakulisumpula. Muntu uulicesya taboni bamwi kuti balaansi kwiinda nguwe. Kufwumbwa muntu uutalondokede uulicesya weelede kulibombya, nkokuti kuzyiba kuti kuli zyintu zimwi nzyatakonzyi kucita.

INO MUSA WAKAKUTONDEZYA BUTI KULICESYA? Musa tanaakalisumpula naakapegwa mukuli. Kanji-kanji, muntu kuti wapegwa mukuli, ulafwambaana kulibonya naa ulalibombya naa pe. Mulembi wamumwaanda wa 19 Robert G. Ingersoll wakaamba boobu: “Bantu banji balakonzya kuliyumya nobapenzyegwa. Pele kuti kamuyanda kuzyiba bwini mbwabede muntu, amumupe mukuli.” Mucibeela eeci, Musa wakapa cikozyanyo cibotu cakulicesya. Munzila nzi?

Musa wakapegwa mukuli mupati kuli Jehova wakusololela bana Israyeli. Nokuba boobo, mukuli ooyu ngwaakapegwa Musa tiiwakamupa kulisumpula. Mucikozyanyo, amulange-lange mbwaakakeendelezya kaambo kakatazya kajatikizya milawo yalukono. (Myeelwe 27:1-11) Kaambo aaka kakali kapati nkaambo tiikakali kujatikizya buyo bamakaintu aabo pele aluzubo lwakali kuyooboola.

Ino Musa wakacita buti? Sena wakayeeya kuti mbwaanga musololi wa Israyeli, wakalijisi nguzu zyakukakosola kaambo aaka? Sena wakali kunoocita oobo akaambo kanguzu nzyaakajisi, naa luzyibo ndwaakajisi akaambo kakubeleka myaka minji, naa luzyibo lwa Jehova ndwaakajisi?

Ambweni muntu uulisumpula naakacita oobo, pele kutali Musa pe. Bbaibbele litwaambila kuti: “Musa wakaleta makani aabo kuli-Jehova.” (Myeelwe 27:5) Amuyeeye buyo! Nokuba kuti Musa wakasololela cisi ca Israyeli kwamyaka iili 40, tanaakali kulisyoma pe, pele wakali kusyoma Jehova. Aawa twabona kuti Musa wakali kulicesya kapati.

Musa tanaakayeeya kuti alikke nguwakali kweelela kuba amukuli. Wakakondwa Jehova naakazumizya bana Israyeli bamwi kuti babe basinsimi antoomwe anguwe. (Myeelwe 11:24-29) Bausyizyala nibakapa muzeezo wakuti asale baalumi bamwi bakonzya kumugwasya mumilimo iimwi, Musa wakacita oobo cakulicesya. (Kulonga 18:13-24) Alimwi naakali kuyanda kufwa, nokuba kuti wakacijisi nguzu, Musa wakalomba Jehova kuti asale muntu uuyoobweza busena bwakwe. Jehova naakasala Joshua, Musa wakamugwasyilizya musankwa ooyu camoyo woonse, akukulwaizya bantu kuti batobele busolozi bwa Joshua kusikila bakanjile Munyika Yakasyomezyegwa. (Myeelwe 27:15-18; Deuteronomo 31:3-6; 34:7) Cakutadooneka, Musa wakacibona kuba coolwe kusololela bana Israyeli mubukombi. Pele tanaakabelesya nguzu zyakwe zyabusolozi kweendelezya bamwi munzila iitaluzi.

INO TWIIYA NZI? Tatweelede kulisumpula akaambo kakuti twaba amukuli naa akaambo kazyintu nzyotukonzya kucita. Amuyeeye: Kutegwa tubelesyegwe a Jehova munzila iili kabotu, kulicesya kulayandika kwiinda zyintu nzyotukonzya kucita. (1 Samuele 15:17) Kuti katulicesya ncobeni, tuyoosola kutobela lulayo lugwasya lwamu Bbaibbele lwakuti: “Syoma Jehova amoyo wako woonse; utalifunkizyi kumaanu aako omwini.”—Tusimpi 3:5, 6.

Cikozyanyo ca Musa alimwi cituyiisya kutabikkila kapati maano kucuuno ncotujisi naa nguzu zyabweendelezi.

Sena tulagwasyigwa kwiinda mukwiiya cikozyanyo ca Musa cakulicesya? Inzya, tulagwasyigwa! Ikuti katulicesya, inga capa kuti bantu kabaanguluka kuba andiswe alimwi akutuyanda. Ciyandika kapati, tupa kuti Jehova Leza atuyande, walo uutondezya bube oobu bubotu. (Intembauzyo 18:35) “Leza ulabakazya ibalisumpula, pele ulabafwida luzyalo aabo ibalicesya.” (1 Petulo 5:5) Eelo kaka aaka nkaambo kapati keelede kutupa kumwiiya Musa!