MIBUZYO YAMU BBAIBBELE YAINGULWA

Nkaambo Nzi Jesu Ncaitwa Kuti Mwana wa Leza?

Leza tajisi mukaintu wini ngwakonzya kuzyala awalo bana. Ngo Mulengi wazyintu zyoonse zipona. Bantu bakalengwa munzila njobakonzya kwiiya bube bwa Leza. Nkakaambo kaako muntu Leza ngwaakasaanguna kulenga, Adamu, wiitwa kuti “mwana wa Leza.” Mbubwenya buyo, Jesu wiitwa kuti “Mwana wa Leza” nkaambo wakalengwa kajisi bube mbuli bwa Bausyi.—Amubale Luka 3:38; Johane 1:14, 49.

Ino Jesu wakalengwa lili?

Leza wakasaanguna kulenga Jesu katanalenga Adamu. Leza wakalenga Jesu mpoonya akumubelesya kupanga zyintu zimbi zyoonse kubikkilizya abangelo. Nkakaambo kaako Bbaibbele limwaamba kuti “imutaanzi kuzyalwa kuzilenge zyoonse” nzyaakalenga Leza.—Amubale Bakolose 1:15, 16.

Katanazyalwa mu Betelehemu, Jesu wakali kupona kujulu kali cilenge camuuya. Ciindi nicakasika, Leza wakalonzya buumi bwa Jesu kuzwa kujulu akububikka mwida lya Mariya kutegwa azyalwe kali muntu.—Amubale Luka 1:30-32; Johane 6:38; 8:23.

Nkaambo nzi Leza ncaakalekela Jesu kuti azyalwe anyika kali muntu? Ino mulimo nzi uulibedelede ngwaakazuzikizya Jesu? Mulakonzya kubujana bwiinguzi kumibuzyo eeyi mu Bbaibbele, alimwi buyoomupa kumvwisya akulumba Leza a Jesu kuzyintu nzyobakamucitila.

Kutegwa muzyibe zinji, amubone cibalo 4 cabbuku eeli lya Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova

[Cifwanikiso icili apeeji 16]

Katanazyalwa mu Betelehemu, Jesu wakali cilenge camuuya kujulu