MAKANI AAKULUULA

“Ndakabona, Pele Tiindakamvwisya Pe”

Akaluulwa aba Olivier Hamel

Ndakajisi myaka yobilo yakuzyalwa mu 1975 ciindi bamaama nobakatalika kuyeeya kuti kuli cintu cakanyongene alindime. Bamaama nobakandijata mumaanza, beenzinyina bakalosya cintu cilemu ansi, calo cakapanga coongo kapati. Bamaama bakabona kuti taakwe nindakanyanyaala pe naba asyoonto. Nondakajisi myaka yotatwe, tiindakalinatalika kwaambaula. Mpoonya bamukwasyi wangu bakamvwa makani aatyompya kapati—basyaazibwene bakasinizya kuti tiindakali kukonzya kumvwa naaceya!

Nondakacili muvwanda, bazyali bangu bakalekana, mpoonya bamaama bakatalika kutulela balikke—mebo abana bokwesu basankwa bobilo alimwi amucizyi wangu. Aciindi eeco, bana basyaataambi mucisi ca France tiibakali kuyiisyigwa mbuli mbobayiisyigwa mazuba aano, alimwi nzila zyakubayiisya zimwi ziindi zyakali kupa kuti bapenge kapati. Nokuba boobo, kuzwa kubwana ndakaba acoolwe ncobatajisi basyaataambi banji. Andipandulule.

Kwaciindi cili mbocibede, bamayi banji bakali kusyoma kuti bana basyaataambi beelede kuyiisyigwa kwaambaula kwiinda mukulanga milomo yamwiiyi mboiputauka naambaula kulimbabo. Mucisi ca France, mondakakomenena, kubelesya mwaambo wakutambaika kwakali kukasyigwa muzikolo. Bana basyaataambi bamwi mane bakali kwaangwa maanza kusyule lyabo ciindi cakwiiya.

Kwamyaka misyoonto yakusaanguna yabuumi bwangu, nsondo ansondo kwamawoola aali mbwaabede ndakali kubonana asyaazibwene mumakani aazyakwaambaula. Bakali kundijata kumweebo naa kumutwe alimwi akundilailila kwaamba majwi cakwiinduluka-induluka ngondatakali kukonzya kumvwa. Taakwe nondakali kukonzya kwaambaula abana bambi. Ndakapenga mumyaka eeyo.

Mpoonya, nondakali amyaka iili cisambomwe yakuzyalwa, bakanditola kucikolo cabasyaataambi. Kwaciindi cakusaanguna, ndakaswaangana abana bambi basyaataambi. Akwalo ooku, bakali kukasya kubelesya mwaambo wakutambaika. Kuti naa twabelesya mwaambo wakutambaika, twakali kwaangwa tunwe naa kukwelwa masusu. Nokuba boobo, twakali kubelesya mwaambo wakutambaika cakusisikizya, kubelesya nzila nzyotwakali kulipangila tobeni. Aciindi eeci ndakali kukonzya kubandika abana bambi. Oobu mboyakatalika myaka yone iikkomanisya.

Nokuba boobo, nondakaba amyaka yakuzyalwa iili kkumi, ndakatolwa kucikolo nkondakali kwiiya antoomwe abana bakali kwaambaula. Eelo kaka ndakatyompwa! Ndakali kuyeeya kuti ndime syaataambi endikke nondakasyeede munyika. Akaambo kakutobela lulayo lwamadokota, ibakali kuyoowa kuti inga ndaluba nzyondakali kuyiisyigwa, bamumukwasyi wangu tiibakaiya mwaambo wakutambaika alimwi tiindakali kuzumizyigwa kuyanzana abana basyaataambi. Ndilayeeya ciindi nondakaswaide dokota uugwasya basyaataambi, iwakajisi bbuku lyamwaambo wakutambaika atebulu lyakwe. Ciindi nondakabona zifwanikiso acivwumbyo, ndakalitondeka bbuku akwaamba kuti, “ndiyanda bbuku eelyo!” Dokota cakufwambaana wakalisisa bbuku. *

 MBONDAKATALIKA KWIIYA KASIMPE KAMU BBAIBBELE

Bamaama bakasoleka kutukomezya kwiinda mukubelesya njiisyo zya Bunakristo. Bakali kuunka andiswe kumiswaangano kumbungano ya Bakamboni ba Jehova yaku Mérignac, kufwaafwi aku Bordeaux. Mbondakali mwana, ndakali kumvwa buyo zyintu zisyoonto kumiswaangano. Nokuba boobo, bakwesu baindene-indene mumbungano bakali kucincana kukkala afwaafwi andime kulemba twaambo tujatikizya zyakali kubandikwa. Luyando lwabo alimwi akundibikkila maano zyakandisika amoyo. Bamaama bakali kundiyiisya Bbaibbele kuŋanda, pele taakwe nondakali kuzimvwisya nzyondakali kuyiisyigwa. Ndakalimvwa mbuli musinsimi Daniele mbwaakalimvwa naakamana kutambula businsimi kuzwa kumungelo, naakati: “Ndakamvwa, pele nsikwe nendakamvwisya pe.” (Daniele 12:8) Mebo inga ndaamba kuti “Ndakabona, pele tiindakamvwisya pe.”

Nokuba boobo, asyoonto-syoonto ndakaiya njiisyo zimwi zyantalisyo zyakasimpe kamu Bbaibbele. Ndakali kuzikkomanina nzyondakali kumvwisya alimwi ndakasoleka kuzibelesya mubuumi bwangu. Alimwi ndakali kwiiya kwiinda mukubona mbobakali kulilemeka bamwi. Mucikozyanyo, Ibbaibbele litwaambila kuti tweelede kukkazyika moyo. (Jakobo 5:7, 8) Pele eeci tiindakali kucimvwisya ncocaamba. Nokuba boobo, kwiinda mukubona basyomima kabatondezya bube oobu, ndakali kukonzya kumvwisya ncocaamba kukkazyika moyo. Kwaamba masimpe, mbungano ya Bunakristo yandigwasya kapati.

KUUSA KAPATI ALIMWI AKUKKOMANA

Nondakacili mukubusi, bumwi buzuba ndakabona bakubusi basyaataambi kabeenda munzila kumwi kabaambaula kubelesya mwaambo wakutambaika. Ndakatalika kuyanzana ambabo cakusisikizya akutalika kwiiya Mwaambo Wakutambaika waku France (FSL). Ndakazumanana kujanika kumiswaangano ya Bunakristo, kwalo mukubusi umwi Kamboni, Stéphane, nkwaakatalika kundibikkila maano. Wakali kusoleka canguzu kwaambaula andime, alimwi cilongwe cesu cakayuma. Nokuba boobo, ndakali kulangilwa kuusa kapati. Stéphane wakaangwa akaambo kakukaka kunjila mulimo wabusikalumamba. Ndakatyompwa kapati! Ciindi Stéphane naakali muntolongo, ndakatyompwa kapati cakuti ndakatiilekelelimwi kujanika kumiswaangano.

Nokwakainda myezi iili 11, Stéphane wakaangununwa muntolongo akupiluka kuŋanda. Amuyeeye buyo mbondakagambwa ciindi Stéphane naakatalika kwaambaula andime kubelesya mwaambo wakutambaika. Tiindakasyoma! Ncinzi cakacitika? Ciindi naakali muntolongo, Stéphane wakaiya Mwaambo Wakutambaika waku France (FSL). Nondakali kulanga Stéphane mbwaakali kutambaika maanza aakwe ambwaakali kulibonya kubusyu, ndakakkomana kapati kandiyeeya mbondakali kuyoogwasyigwa.

KUMAMANINO NDAKAKAMVWISYA KASIMPE KAMU BBAIBBELE

Stéphane wakatalika kundiyiisya kasimpe kamu Bbaibbele. Kuzwa ciindi eeci ndakatalika kumvwisya mbokeendelana kasimpe kamu Bbaibbele nkondakayiya kuzwa kubwana. Nondakacili mwana, ndakali kuyandisya kweebelela zifwanikiso zibotu zili mumabbuku eesu aapandulula Bbaibbele, kweezyanisya bantu batondezyedwe muzifwanikiso alimwi akubikkila maano kulanga-langa zyintu zyoonse zitondezyedwe kutegwa makani aayo aamu Bbaibbele akkalilile mumizeezo yangu. Ndakalaazyi makani ajatikizya Abrahamu, “lunyungu” lwakwe, alimwi ‘ankamu mpati,’ pele lilikke notwakapandululwa twaambo mumwaambo wakutambaika nondakabumvwisya bupanduluzi. (Matalikilo 22:15-18; Ciyubunuzyo 7:9) Cakalibonya kuti ndakaujana mwaambo wangu ngondeelede kubelesya, mwaambo ngondakali kuyandisisya mumoyo wangu.

Mbwaanga lino ndakali kukonzya kuzimvwisya zyakali kubandikwa amiswaangano, zyakandisika amoyo alimwi ndakali kuyanda kwiiya zinji. Kwiinda mukugwasyigwa a Stéphane, luzyibo lwangu lwa Bbaibbele lwakayaambele, mpoonya mu 1992, ndakaaba buumi bwangu kuli Jehova Leza akubbapatizyigwa. Nokuba kuti ndakayaambele kumuuya, ndakajisi nsoni alimwi cakali kundikatazya kukkala antoomwe abantu nkaambo tiindakali kukonzya kwaambaula abantu nondakacili mwana.

 KULWANA PENZI LYAKUYOOWA

Mukuyakwaciindi, kabunga kasyoonto kabasyaataambi mondakabede kakasangana ambungano yaku Pessac, cibeela cadolopo liitwa kuti Bordeaux. Eeci cakagwasya kapati, alimwi ndakazumanana kuyaambele kumuuya. Nokuba kuti ndakacili kulwana penzi lyangu lyakuyoowa kubandika abantu, balongwe bangu ibatakali basyaataambi bakali kubikkila maano kapati kubona kuti ndilazimvwisya zyoonse. Banabukwetene bamwi bobilo, ba Gilles alimwi aba Elodie, bakali kusolekesya kapati kwaambaula andime. Kanji-kanji bakali kunditamba kuti tulide antoomwe cakulya naa kunywa kkofi noyamana miswaangano, calo cakapa kuti tube acilongwe cibotu kapati. Eelo kaka cilakkomanisya kapati kuba akati kabantu ibatobela nzila zibotu zya Leza!

Mwakali mumbungano eeyi mundakaswaangana a Vanessa, iweebeka kapati. Icakandikonda kapati kujatikizya nguwe ncakuti wakali kubabikkila maano bantu alimwi ambwaakali kuyandisisya bululami. Taakwe naakayeeya kuti mbondili syaataambi inga camulesya kwaambaula andime, pele wakacibona kuba coolwe cakwiiya kukanana amuntu uutaambauli. Twakayandana, mpoonya twakakwatana mu 2005. Nokuba kuti cilandikatazya kubandika kabotu, Vanessa wandigwasya kulwana penzi lyakuyoowa akuti kandikanana cakwaanguluka. Ndilamulumba kapati akaambo kalugwasyo ndwandipa ciindi nondilanganya mikuli njendijisi.

CIPEGO ACIMWI KUZWA KULI JEHOVA

Mwaka ngotwakakwatana, ofesi yamutabi ya Bakamboni ba Jehova yaku France iili mudolopo lya Louviers yakanditamba kwamwezi omwe kutegwa ndikaiye mulimo wakusandulula. Mumyaka yaino-ino, ofesi yamutabi yabeleka canguzu kugwisya mabbuku aali mbwaabede mumwaambo wakutambaika waku France ama DVD. Pele akaambo kakuti kuli mulimo mupati weelede kucitwa kumbele, mweelwe wabasikusandulula wakeelede kuyungizyigwa.

Vanessa andime twakalimvwa kuti ncoolwe cipati alimwi ncipego icizwa kuli Jehova Leza kuti ndibelekele amutabi, pele twakali kuyoowa. Twakali kulibuzya kuti, “ino ncinzi ciyoocitika kukabunga kesu kabelesya mwaambo wakutambaika? Ino aŋanda yesu tuyooicita buti? Sena Vanessa wakali kuyoojana mulimo mucooko eeco? Munzila iigambya, Jehova wakayiingula mubuzyo eeyi yoonse. Ndakalimvwa kuti Jehova ulatuyanda alimwi ulabayanda basyaataambi.

TWAGWASYILIZYIGWA ABANTU BAKAMANTENE

Mbwaanga ndilijatikizyidwe mumulimo wakukambauka, ndilazimvwisya zyoonse zicitwa kutegwa basyaataambi bapegwe cakulya cakumuuya. Alimwi cilakkomanisya kaka kubona basimilimoma banji kabasoleka kwaambaula andime. Nzila zisyoonto nzyobaiya kwaambaula mumwaambo wakutambaika alimwi akusoleka kuzibelesya cindipa kukkomana kapati. Taakwe nondilimvwa kuti balanditantamuka. Nzila eezyi zyoonse zyakutondezya luyando zitondezya lukamantano lulibedelede luli akati kabantu ba Jehova.—Intembauzyo 133:1.

Ndilamulumba kapati Jehova akaambo kakuti kwiinda mumbungano ya Bunakristo, lyoonse wakali kusinizya kuti umwi wakaliko kutegwa andigwasye. Ndilalumba alimwi akaambo kalubazu lusyoonto ndondijisi lwakugwasya basyaataambi bambi kutegwa bamuzyibe Mulengi wesu siluyando akuba acilongwe anguwe. Ndilangila kumbele ciindi zyintu zyoonse izipa kuti kube buyumuyumu bwakwaambaula noziyoogwisyigwa alimwi abantu boonse nobayookanana “mwaambo uusalala”—kasimpe kajatikizya Jehova Leza alimwi amakanze aakwe—kandili cibeela camukwasyi wakwe uukamantene.—Zefaniya 3:9.

[Bupanduluzi buyungizidwe]

[Cifwanikiso icili apeeji 10]

Ciindi nondakajisi myaka yosanwe yakuzyalwa

[Cifwanikiso icili apeeji 11]

Ba Stéphane ibakandigwasya kulimvwisya Bbaibbele

[Cifwanikiso icili apeeji 12]

Mukaintu wangu, Vanessa, ulandigwasya kapati

[Cifwanikiso icili apeeji 12]

Kandipa makani aa Bbaibbele Mumwaambo Wakutambaika waku France

[Cifwanikiso icili apeeji 12]

Kandibelekela mu Dipatimenti Yabasikusandulula kuofesi yamutabi