MAKANI AAYEEME AMUTWE UULI ACIVWUMBYO: INO NDILILI NOKUYOOBA NYIKA IINYINA LUSALULULO?

Lusalululo Ndipenzi Lyamunyika Yoonse

BA JONATHAN, ibaku Korea ibakazyalilwa ku America, bakacimvwa mbocibede kusalululwa ciindi nibakacili bana. Nobakakomena, bakayandaula busena kwalo bantu nkobatakali kunoobasalulula akaambo kambobakali kulibonya naa mubala wabo. Bakatalika kubeleka mulimo wabudokota mudolopo lili mucooko ca Alaska nkoili kunyika, mucisi ca U.S.A., kwalo nkobakajana kuti bakali kukozyanya abalwazi banji mbobakali kusilika. Bakali kuyeeya kuti ambweni ooku, penzi lyakusalululwa linooli mbubo-mbubo.

Bulangizi boonse oobu bwakamana ciindi nibakasilika mukaintu umwi iwakajisi myaka yakuzyalwa iili 25. Ciindi mukaintu ooyu iwakali kufwumba bulamfwu naakasinsimuka, wakabalanga ba Jonathan kumeso akwaamba majwi aakubafwubaazya, nkaambo kuzwa kubwana wakayiisyigwa kuti weelede kubasulaika bantu baku Korea. Eeci cakabacisa kapati ba Jonathan nkaambo bakabona kuti kusoleka kwabo koonse kwakulongela kubusena ooku tiikwakabagwasya kutija penzi lyakusalululwa.

 Cakacitikila ba Jonathan citondezya cintu cibi cicitika ncobeni. Lusalululo lulajanika munyika yoonse. Cilibonya kuti kufwumbwa kuli bantu, alusalululo nkoluli.

Pele nokuba kuti lusalululo lulidumide kapati, bantu banji tabaluyandi. Masimpe eeci ncintu cikatazya. Ino cintu bantu ncobatayandi inga caduma buti boobu? Cakutadooneka, bantu banji ibataluyandi lusalululo balaalilwa kuzyiba kuti abalo balaalusalululo. Sena oobu mbomubede andinywe? Ino inga mwawiingula buti mubuzyo ooyu?

MAKANI AAJATIKIZYA MUNTU UMWI AUMWI

Kufwumbwa naa tulizyi naa pe, cilakatazya kulizyiba kuti naa tulaalusalululo mumoyo wesu. Ibbaibbele lilapandulula kaambo ncocili boobo ciindi nolyaamba kuti: “Moyo wamuntu uleena kwiinda zintu zyoonse.” (Jeremiya 17:9) Aboobo, tulakonzya kulyeena kwiinda mukuyeeya kuti tulabayanda bantu bamisyobo yoonse. Naa tulakonzya kwaamba kuti tujisi twaambo tumvwika ncotutabayandili bantu bamisyobo imwi.

Kutegwa tubone mbocikatazya kuzyiba naa tulaalusalululo nokuba kuti talulibonyi, amweezeezye bukkale oobu: Muyaabweenda munzila nyolikke masiku. Mpoonya kwalibonya baalumi bobilo mbomutanabwene bayaabuboola kulindinywe. Balibonya kuti balitomene, alimwi umwi ulibonya kuti kuli ncajisi mumaanza.

Sena inga mwayeeya kuti baalumi aaba inga bamucisa? Masimpe, izyakamucitikila kaindi inga zyamupa kuyeeya kuti mweelede kucenjela, pele sena eezyo zyakamucitikila inga kaba nkakaambo kamupa kuyeeya kuti baalumi aaba bobilo inga bamucisa? Mubuzyo umbi inga waba wakuti, Ino mwalikuyeeya kuti baalumi aaba mbasyobo nzi? Bwiinguzi bwanu kumubuzyo ooyu inga bwayubununa mbomulimvwa. Bulakonzya kutondezya kuti ambweni mwakatalika kale kuba amuuya walusalululo.

Ikuti naa tulalilingula cakusinizya, tweelede kuzumina kuti toonse tulijisi lusalululo noluceya. Noliba Bbaibbele lilaamba lusalululo luzyibidwe kapati ciindi nolyaamba kuti: “Muntu ulabona busyu buyo, pele Jehova ulabona moyo.” (1 Samuele16:7) Mbwaanga toonse tulicijisi cilengwa eeci cabuntu—kanji-kanji iciletela mapenzi—sena kuli bulangizi buli boonse bwakuti inga twalizunda penzi lyalusalululo mubuumi bwesu? Alimwi sena kuli ciindi lusalululo noluyoomana munyika yoonse?

[Kabbokesi kali apeeji 3]

LUSALULULO NDIPENZI LYAMUNYIKA YOONSE

Canada: “Nokuba kuti cisi casola kubikka milawo iindene-indene yakukwabilila bantu, penzi lyalusalululo lyazumanana kuba penzi pati likatazya bantu.”—Amnesty International briefing on Canada, 2012.

Europe: “Bantu basika ku 48 pesenti yabaabo bakkala ku Europe basyoma kuti kunyina cintu cini cicitwa kutegwa bamane penzi lyalusalululo mu Europe.”—Intolerance, Prejudice and Discrimination: A European Report, 2011.

Africa: “Lusalululo alimwi akutundululwa kwabamakaintu lyazumanana kuba penzi lidumide kapati muzisi zinji.”—Amnesty International Report 2012.

Nepal: “Bama Dalit (“bantu ibatantamukwa”) balasalululwa ikapati mumakani aabuvwubi, bukkale alimwi azilengwa.”—Human Rights Watch World Report, 2012.

Eastern Europe: “Ba Roma baku Eastern Europe bajisi penzi beendelezi ndyobatayandi kumana, balatamikizyigwa mumasi aambi alimwi balasalululwa muzisi mobazwa.”—The Economist, September 4, 2010.

[Kabbokesi kali apeeji 4]

INO LUSALULULO NINZI?

Basikuvwuntauzya cilabakatazya kupandulula ncolwaamba lusalululo. Bamwi baamba kuti “nkutamulanganya kabotu muntu naa kutalimvwa kabotu kujatikizya muntu ooyo akaambo kakuzulilwa mukabunga kamwi.” Bamwi baamba kuti eeci cilacitika akaambo “kakutazyiba makani aamasimpe” calo cisololela kukusalulula bantu bamukabunga kamwi. Kufwumbwa mbocibede, lusalululo lulakonzya kutalika akaambo kamusyobo wamuntu, nsaizi yamubili, kuba musankwa naa musimbi, mwaambo, bukombi, naa kufwumbwa kwiimpana kuliko.

[Cifwanikiso icili apeeji 4]

Ino inga mwalimvwa buti kuti mwalijana mubukkale buliboobu?