Ncinzi Ncotukonzya Kwiiya Kuli Sizibi?
AMUBAYIISYE BANA BANU
Ncinzi Ncotukonzya Kwiiya Kuli Sizibi?
Sizibi uujisi cikozyanyo ncotukonzya kwiiya ngooyu ngomubwene mucifwanikiso iwaambaula aa Jesu. Sizibi ooyu uluuside akaambo kazibi zyakwe. Walomba Jesu kuti: “Ukandiyeeye waakunjila mu Bwami bwako.” Lino, mbubwenya mbuli mbomwabona mucifwanikiso, Jesu ulabandika asizibi ooyu. Sena mulizyi Jesu ncaambila sizibi ooyu?— * Jesu umusyomezya kuti: “Ncobeni sunu ndikwaambila kuti, uyooba andime mu Paladaiso.”
Ino muyeeya kuti Paradaiso eeyo inooli buti?— Kutegwa tujane bwiinguzi buluzi, atubandike kujatikizya Paradaiso Leza njaakabambilide mwaalumi amukaintu wakusaanguna, Adamu a Eva. Ino Paradaiso eeyi yakali kuli? Sena yakali kujulu, naa yakali anyika?—
Muliluzi ikuti naa mwaamba kuti yakali anyika. Aboobo, ciindi notuyeeya sizibi ooyu kuba “mu Paladaiso,” tweelede kuyeeya kuti unooli waano anyika ciindi yaakuba Paradaiso. Ino Paradaiso eeyo inooli buti?— Atubone.
Ciindi Jehova Leza naakalenga bantu bakusaanguna ba Adamu a Eva, Ibbaibbele lyaamba kuti wakababikka mu Paradaiso mpoonya aano anyika. Yakali kwiitwa kuti ‘muunda waku Edeni.’ Amweezyeezye buyo mbowakali mubotu ‘muunda waku Edeni.’— Masimpe, bwakali busena bubotu kapati butanabwenwe amuntu uuli woonse wamazuba aano!
Ino muyeeya buti? Sena Jesu unooli waano anyika antoomwe asizibi ngwaakafwida luse?— Peepe, aciindi eeco Jesu unooli kujulu kali Mwami weendelezya nyika ya Paradaiso. Aboobo Jesu unooli antoomwe asizibi mukuti uyoomubusya akumubikka munyika ya Paradaiso. Pele nkaambo nzi Jesu ncayoozumizya muntu wakali sizibi kupona mu Paradaiso?— Atubandike kujatikizya mubuzyo ooyu.
Inzya, masimpe kuti sizibi ooyu wakacita zyintu zibi kapati. Ncimwi buyo amabbiliyoni aabantu bambi ibakapona anyika. Nokuba boobo, bunji bwabo bakacita zyintu zibi akaambo kakuti tiibakayiisyigwa kujatikizya Jehova alimwi ancaakali kuyanda kuti bacite.
Aboobo, bantu bali boobo kubikkilizya asizibi iwakabandika a Jesu acisamu cakupenzezya, bayoobusyigwa kubuumi bwamu Paradaiso mpoonya aano anyika. Bayooyiisyigwa ncayanda Leza. Mpoonya bayootondezya kuti balamuyanda Jehova.
Sena mulizyi mbobakonzya kutondezya oobo?— Kwiinda mukucita ncayanda Leza. Eelo kaka cinooli cibotu kupona mu Paradaiso akuba akati kabantu bamuyanda Jehova alimwi bayandana umwi amweenzinyina!
Mubale mu Bbaibbele lyanu
[Bupanduluzi buyungizidwe]
^ munc. 3 Ikuti kamubala amwana, keengo kamuyeezya kuti mweelede kwiima asyoonto akukulwaizya mwanaanu kuti aambe mbwalimvwa.
