IBBAIBBELE LILAKONZYA KUBACINCA BANTU

“Tandicilimvwi kuti ndeelede kwiicinca nyika”

Akaluulwa aba Jukka Sylgren

MWAKA WAKUZYALWA: 1966

KUCISI NKOBAZWA: FINLAND

MBOBAKABEDE KAINDI: SIKULWANINA LWAANGULUKO

MBONDAKABEDE KAINDI: Ndakali kuziyanda zilengwaleza kuzwa kubwana. Kanji-kanji mukwasyi wesu wakali kuunka mukweendeenda muzisaka zikkomanisya kapati alimwi akumaziba mabotu aakali munsi adolopo lya Jyväskylä nkotwakali kukkala, mu Central Finland. Alimwi ndilabayanda banyama. Ciindi nondakandicili mwana, ndakali kuyandisya kukumbata kufwumbwa kakkiti naa mubwa ngondabona! Nondakakomena, tiindakali kulimvwa kabotu kubona bantu mbobatakali kubeendelezya kabotu banyama. Mukuya kwaciindi, ndakanjila mumbunga iilanganya banyama kwalo nkondakajana bantu bakajisi mizeezo mbuli yangu.

Twakatola lubazu mukusumpula lwaanguluko lwabanyama. Twakali kumwaya makani akupanga bubambe bwakutalisya manyongwe muzintoolo mobakali kusambala boya bwabanyama alimwi amumasena mobayiila makani aajatikizya banyama. Mane twakatalisya mbunga mpya yakukwabilila banyama. Akaambo kakuti twakabweza ntaamu yakuyanda kucinca zyintu, kanji-kanji beendelezi bakali kutupenzya. Ndakaangwa akutolwa kunkuta ziindi zinji.

Kunze aakukatazyigwa mumizeezo ambobakali kweendelezyegwa banyama, ndakali kukatazyigwa amapenzi aambi aali munyika. Mukuya kwaciindi, ndakanjila mumbunga zisiyene-siyene kubikkilizya ambunga ya Amnesty International alimwi ambunga ya Greenpeace. Ndakasolekesya canguzu kugwasyilizya milimo yabo. Ndakali kubaiminina mumapenzi aabo bantu bacete, batajisi zyakulya, alimwi abantu bamwi bapengede.

Pele mukuya kwaciindi ndakazyiba kuti tandikonzyi kwiicinca nyika. Nokuba kuti mbunga eezyo zyakasola kwaamana mapenzi amwi masyoonto, mapenzi mapati-pati akali kuyaabwiindila buya. Cakali mbuli kuti bubi bwaimena nyika yoonse alimwi kunyina wakali kubikkila maano. Ndakalimvwa kubula nguzu.

 BBAIBBELE MBOLYAKANDICINCA: Akaambo kakubula bulangizi, ndakausa kapati calo cakandipa kuti nditalike kuyeeya Leza alimwi a Bbaibbele. Kaindi ndakali kwiiya Bbaibbele a Bakamboni ba Jehova. Nokuba kuti ndakalizyi kuti Bakamboni mbaasilubomba alimwi bakali kundibikkila maano, tiindakalibambilide kucinca bukkale bwangu. Pele lino zyintu zyakalicincide.

Ndakabweza Bbaibbele lyangu akutalika kulibala. Lyakanduumbulizya kapati. Ndakabala zibalo zinji zyamu Bbaibbele zituyiisya kuti tweelede kubeendelezya banyama calubomba. Mucikozyanyo, lugwalo lwa Tusimpi 12:10 lwaamba kuti “muntu uululeme ulalela kabotu banyama bakwe.” Alimwi ndakazyiba kuti Leza tali nguwe uuleta mapenzi aali munyika. Muciindi caboobo, mapenzi eesu aindila kuvwula akaambo kakuti bantu banji tababutobeli busolozi bwakwe. Ndakakkomana kapati kuzyiba Jehova mbwali siluyando alimwi ambwakkazyika moyo wakwe.—Intembauzyo 103:8-14.

Aciindi nciconya eeci, ndakajana kapepa katondezya bbuku lyakuti Ino Ncinzi cini Bbaibbele Ncoliyiisya? mpoonya ndakakatuma. Tiilyakalampa, Bakamboni banabukwetene bakandiswaya akundilomba kuti katwiiya Bbaibbele ambabo, mpoonya ndakazumina. Alimwi ndakatalika kuunka kumiswaangano ya Bunakristo ku Ŋanda ya Bwami. Akaambo kaceeci, ndakatalika kuziyanda kapati nzyondakali kwiiya mu Bbaibbele.

Ndilalumba akaambo kakwiiya Bbaibbele, lyalo lyakapa kuti ndicikonzye kucinca kapati mubuumi bwangu. Ndakacileka kufweba alimwi ndakaleka kuciindizya kunywa bukoko. Ndakatalika kulibonya kabotu alimwi akwaambaula kabotu. Alimwi ndakacinca mbondakali kubalanga beendelezi. (Baloma 13:1) Alimwi ndakabuleka bukkale bwakutalilemeka, lubazu ndondatakali kulilesya.

Cintu cakandikatazya kapati nkucinca mbondakali kuzilanga mbunga zilwanina lwaanguluko. Eeci tiicakacitika mubuzuba bomwe. Kumatalikilo, ndakali kulimvwa kuti inga kwaba kutasyomeka kumbunga eezyi kuti naa ndacileka kutola lubazu. Nokuba boobo, ndakazoozyiba kuti Bwami bwa Leza mbobulangizi bwini-bwini bulikke bukonzya kucinca nyika. Ndakasala kuti ndibelesye nguzu zyangu zyoonse kugwasyilizya Bwami oobu alimwi akugwasya bantu kwiiya kujatikizya mbubo.—Matayo 6:33.

MBONDAGWASYIGWA: Mbondakali sikulwanina lwaanguluko, bantu ndakali kubabikka munkamu zyobilo—nkamu yabantu bali kabotu naa yabantu batali kabotu—alimwi ndakalilibambilide kubalwana aabo mbondakali kuyeeyela kuti tabali kabotu. Pele ndilalumba kapati akaambo kakwiiya Bbaibbele, tandicibasulaiki bantu bamwi. Muciindi caboobo, ndilasola kutondezya luyando lwa Bunakristo kubantu boonse. (Matayo 5:44) Akati kanzila zimwi nzyondibelesya kutondezya luyando oolu, nkwiinda mukwaambila bamwi makani mabotu aa Bwami bwa Leza. Ndilikkomene kubona mulimo ooyu mboukulwaizya luumuno alukkomano alimwi akupa bantu kuba abulangizi bwini-bwini.

Ndajana luumuno lwamumizeezo kwiinda mukubikka zyintu mumaanza aa Jehova. Ndilisinizyide kuti mbwali Mulengi, takalekeli banyama abantu kuti kabapenzyegwa lyoonse alimwi takalekeli nyika kuti inyonyoonwe. Mukwiimpana, kwiinda mukubelesya Bwami bwakwe, ino-ino uyoozibambulula zyintu zyoonse izyakanyonyooka. (Isaya 11:1-9) Cilandikkomanisya kapati kuzyiba kasimpe aaka alimwi akugwasya bamwi kuti babe aalusyomo mulinkako. Lino tandicilimvwi kuti ndeelede kwiicinca nyika.

[Nkotwakajana cifwanikiso icili apeejwi 12]

Animalia