MIBUZYO YAMU BBAIBBELE YAINGULWA

Sena buumi butamani bulakonzyeka?

Adamu, mwaalumi wakusaanguna, wakapona kwamyaanda yamyaka. Pele mukuya kwaciindi, wakacembaala akufwa. Kuzwa ciindi eeco, bantu basola nzila zisiyene-siyene kutegwa kabatacembaali. Nokuba boobo kunyina uukonzya kulutija lufwu. Ino nkaambo nzi? Adamu wakacembaala akufwa akaambo kakuti wakabisya kwiinda mukuzangila Leza. Aboobo tulacembaala nkaambo twakakona cibi kuzwa kuli Adamu alimwi acisubulo cacibi, nkokuti lufwu.—Amubale Matalikilo 5:5; Baloma 5:12.

Kutegwa tupone buumi butamani, tuyandika muntu umwi kuti atununune. (Jobu 33:24, 25) Cinunuzyo ncintu cibbadelwa kutegwa kunununwe muntu umwi, aboobo swebo tuyandika kunununwa kuzwa kulufwu. (Kulonga 21:29, 30) Jesu wakatubbadelela ciindi naakatufwida.—Amubale Johane 3:16.

Ino inga twabujana buti buumi butamani?

Tabali bantu boonse bayoonununwa kukuciswa alimwi akucembaala. Bantu batamumvwidi Leza mbuli mbwaakacita Adamu, tabakabi acoolwe cakuba abuumi butamani. Balikke bantu ibalekelelwa zibi zyabo mbebayoopona kukabe kutamani.—Amubale Isaya 33:24; 35:3-6.

Kutegwa tulekelelwe, tweelede kubweza ntaamu. Tweelede kumuzyiba Leza kwiinda mukwiiya Jwi lyakwe, Ibbaibbele. Lilatuyiisya mbotukonzya kupona buumi bubotu alimwi ambotukonzya kukkomaninwa a Leza kutegwa tukajane buumi butamani.—Amubale Johane 17:3; Milimo 3:19.

Kutegwa muzyibe zinji, amubone cibalo 3 cabbuku eeli, Ino Ncinzi Cini Bbaibbele Ncoliyiisya?, ilyakamwaigwa a Bakamboni ba Jehova

[Cifwanikiso icili apeeji 16]

Ino mbubambe nzi bukonzya kutunununa kuzwa kulufwu?