BASIKUBALA BALABUZYA . . .

Nkaambo nzi bantu bamu Bbaibbele bamwi ncobataambidwe mazyina?

Mubbuku lyamu Bbaibbele lya Rute, mwaalumi iwakakaka kucita mulimo wakwe kweelana a Mulawo wa Musa waambwa buyo kuti nyomfwi. (Rute 4:1-12) Sena tweelede kuyeeya kuti boonse bantu bamu Bbaibbele ibataambidwe mazyina bakajisi bube butali kabotu alimwi akuti tabayandiki kapati?

Peepe. Amubone cikozyanyo cimbi. Kutegwa alibambile pobwe lyakwe lya Kwiindilila lyamamanino, Jesu wakaambila basikwiiya bakwe kuti “kamuya mumunzi kuli Ndaba” mukabambile kuŋanda yakwe. (Matayo 26:18) Sena inga twaamba kuti muntu waambwa kuti “Ndaba” mukapango aaka wakali muntu mubi naa kuti taakali kuyandika kapati cakuti inga taambwa zyina? Peepe; tacidoonekwi kuti “Ndaba” waambwa waawa wakali sikwiiya wa Jesu. Akaambo kakuti zyina lyakwe tiilyakali kuyandika kapati mucibalo, tiilyakaambwa pe.

Kuyungizya waawo, mu Bbaibbele muli mazyina manji aabantu babyaabi; alimwi lilijisi azikozyanyo zyabantu banji basyomeka ibataambidwe mazyina. Mucikozyanyo, izyina lya Eva, mukaintu wakusaanguna lilizyibidwe kapati, nokuba kuti kuliyanda kwakwe alimwi akutamvwida kwakasololela kucibi ca Adamu calo caleta mapenzi aataambiki kubantu boonse. (Baloma 5:12) Mukwiimpana, muka Nowa taambidwe zyina mu Magwalo, pele tulamulumba kapati akaambo kakulyaaba kwakwe, alimwi akuba amuuya wakumvwida naakali kugwasyilizya mulumaakwe mumulimo uuyandika kapati. Akaambo kakuti zyina lyakwe talyaambidwe tacaambi kuti taakali kuyandika kapati naa kuti Jehova taakamulongezya.

Kuli bantu abamwi bataambidwe mazyina mu Bbaibbele balo bakacita milimo iiyandika kapati mukuzuzikizya makanze aa Jehova. Amuyeeye kujatikizya mwana musimbi muna Israyeli iwakali muzike muŋanda ya Naamani, mupati wabasikalumamba muna Aramu. Cabusicamba, wakaambila namalelo wakwe, muka Naamani, kujatikizya musinsimi wa Jehova waku Israyeli. Eeci cakasololela kumaleele mapati. (2 Bami 5:1-14) Awalo mwana musimbi wa Jefita, mubetesi muna Israyeli wakatondezya cikozyanyo cibotu calusyomo. Cakulisungula wakalyaaba kutakwatwa, alimwi akutazyala bana kutegwa azuzikizye cikonke ncobakapanga bausyi. (Babetesi 11:30-40) Mbubwenya buyo, kuli basikulemba ntembauzyo ziinda ku 40 alimwi abasinsimi ibakacita milimo mipati cakusyomeka ibataambidwe mazyina.—1 Bami 20:37-43.

Ambweni cikozyanyo cibotu kwiinda, ncabangelo basyomeka. Kuli myaanda-myaanda yamamiliyoni aabangelo, pele bobilo buyo mbebaambidwe mazyina mu Bbaibbele—Gabriyeli and Mikayelo. (Daniele 7:10; Luka 1:19; Juda 9) Aaba boonse basyaala tabaambidwe mazyina muzibalo zyamu Bbaibbele. Mucikozyanyo, Manowa, usyi Samsoni, wakabuzya mungelo umwi kuti: “Nduweni izina lyako? Majwi aako naayooba ncobeni, tulayanda kukulemeka. Mungelo wakaingula kuti: “Ino nkaambonzi wandibuzya izina lyangu?” Cabulemu, mungelo ooyu wakakaka kuzumina bulemu bwakali kweelela buyo Leza alikke.—Babetesi 13:17, 18.

Ibbaibbele talipandululi kaambo, bamwi bantu ncobaambidwe mazyina alimwi bamwi ncobataambidwe. Pele tulakonzya kwiiya zinji kubantu basyomeka ibakamubelekela Leza kabatajisi bulangizi bwakuba ampuwo.