Nkaambo Nzi Ncokuli Kupenga?

Kutegwa tumvwisye kaambo ncokuli kupenga alimwi akaambo bantu ncobatakonzyi kwaamana mapenzi, tweelede kuzyiba cipa kuti mapenzi kaaliko. Nokuba kuti kuli zyintu ziindene-indene zipa kuti katupenga alimwi zikatazya kumvwisya, tulakonzya kulumba kuti Bbaibbele lilatugwasya ikuzyiba ciletela mapenzi. Mucibalo eeci tulanga-langa twaambo tupati-pati tosanwe tuyootugwasya kuzyiba ncokuli kupenga boobu. Lino tumukulwaizya kulanga-langa ncolyaamba Bbaibbele akubona Jwi lya Leza mbolitugwasya kumvwisya kabotu twaambo twamasimpe kujatikizya cipa kuti kakuli mapenzi.—2 Timoteyo 3:16.

▪ MICITO YAMFWULUMENDE MBYAABI

Bbaibbele lyaamba kuti: “Na basizibi mbobeendelezya, bantu balatongela.”—Tusimpi. 29:2.

Kuzwa kaindi kwali beendelezi balunya banji, bali kuleta mapenzi aatambiki kubalelwa babo. Masimpe ngakuti, tabali baleli boonse bali boobo. Bamwi inga kabayanda kugwasya bantunyina. Pele ciindi nobaba baleli, bajana kuti kusolekesya kwabo takuzwidilili akaambo kabantu balwanina kuti babe baleli abalo. Alimwi balakonzya kubelesya nguzu zyabo munzila yakulijanina mpindu lwabo beni, calo cipa kuti balelwa babo bapenge. Ba Henry Kissinger, ibakali Balembi Bacisi ca U.S.A. bakati: “Makani aakaindi azwide twaambo itwaamba kusolekesya alimwi amakanze aabantu aatakazwidilila.”

Bbaibbele alyalo lyaamba kuti: “Muntu waansi tezi kubamba kabotu inzila yakwe.” (Jeremiya 10:23) Bantu batalondokede tabajisi busongo bwakweendelezya kabotu zyintu. Ikuti bantu kabatakonzyi kubamba kabotu nzila zyabo beni, ino inga bacikonzya buti kubamba kabotu nzila zyabalelwa babo? Tee mwakabona kaambo kapa kuti baleli banyika kabatakonzyi kumana mapenzi? Mubwini, ziindi zinji mfwulumende mbyaabi naa bweendelezi bubi, mbobuleta mapenzi.

▪ KUYUNGA IKUZWA KUZIKOMBELO ZYAKUBEJA

Jesu wakati: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Johane 13:35.

Basololi bazikombelo bamusyobo uuli oonse wabukombi bakambauka zyaluyando alukamantano. Masimpe ngakuti baalilwa kugwasya basikubatobela kuba aluyando lwini-lwini lwakumana lusalululo. Muciindi cakugwasya bantu kuba aluyando, zikombelo kanji-kanji nzezileta kwaandana, lusalululo, alimwi akuzwangana akati kabantu alimwi azisi. Kumamanino aabbuku lyakwe litegwa Christianity and the World Religions, sikwiiya zyabukombi Hans Küng wakalemba kuti: “Micito yalunya alimwi amanyongwe mapati aacitika mutwaambo twacisi ngayaayo aaletwa azikombelo.”

Kuyungizya waawo, basololi bazikombelo zinji  caantangalala balazumizya bwaamu, bumambi, alimwi akoonana kwabantu bakozyenye zizo. Eeci capa kuti kube malwazi, kugwisya mada, kuba amada aamusyokwe, manyongwe muzikwati amumikwasyi, alimwi amacise manji aataambiki.

▪ KUTALONDOKA KWABANTU AKULOMBOZYA KUTALI KABOTU

“Umwi aumwi ulasunkwa kwiinda mukoongelezyegwa akucegwa azisusi zyakwe mwini. Lino zisusi eezyo zyamita, zizyala cibi; mpoonya cibi eeco cacitwa, cileta lufwu.”—Jakobo 1:14, 15.

Toonse buyo, akaambo kakutalondoka nkotwakakona, tulakonzya kubisya alimwi tuyandika kulwana mizeezo iiyanda kuti “katucita zisusi zyanyama.” (Baefeso 2:3) Cilakatazya kukazya mizeezo iitali kabotu ciindi notwalijana mubukkale bukonzya kutupa kucita zili mumizeezo yesu. Ikuti twazumizya mizeezo iitali kabotu, tulakonzya kucitikilwa zyintu zibi.

Mulembi wazyina lya P. D. Mehta wakalemba kuti: “Bunji bwamapenzi alaboola akaambo kakulombozya zyintu zibi, kuciindizya kulikondelezya, busyaacivwulemwangu, alimwi azyintu nzyotukanza kucita.” Zyintu nzyotulombozya alimwi akulizibizya—bukoko, misamu iikola, njuka yakulyana mali, koonana, alimwi azimwi buyo—zyanyonyoona bantu ibabonwa kuti balalemekwa alimwi zyaleta mapenzi mumikwasyi yabo, kubeenzinyina, alimwi akubantu bamwi. Mbwaanga bantu tabalondokede, tweelede kwaazumina majwi aali mu Bbaibbele aakuti: “Nkaambo tulizyi kuti zilenge zyoonse zilatongela lyoonse akuba amacise caantoomwe kusikila lino.”—Baloma 8:22.

▪ NGUZU ZYAMYUUYA MIBI

Bbaibbele lyaamba kuti Saatani ngu “leza wabweende bwazyintu oobu” alimwi akuti ubelekela antoomwe azilenge zyamyuuya zijisi nguzu zitegwa madaimona. —2 Bakolinto 4:4; Ciyubunuzyo 12:9.

Mbubwena mbuli Saatani, aalo madaimona ajisi bubi kweendelezya bantu akubeena. Imwaapostolo Paulo wakaazumina makani aaya naakaamba kuti: “Tujisi nkondo yakutingana, ikutali abantu bajisi mubili wanyama abulowa pe, pele amfwulumende, beendelezi, baleli banyika bamudima ooyu alimwi amyuuya mibi iili mumasena aakujulu.”—Baefeso 6:12.

Nokuba kuti madaimona alakkomana kupenzya bantu, eeco tacili ncecintu cipati ncobayanda. Makanze aabo ngakuti, bantu batabi kulubazu lwa Jehova Leza, Mupatikampatila. (Intembauzyo 83:18) Imicito mbuli kusonda kwiinda mukubelesya bweende bwanyenyeezi, masalamuzi, bulozi alimwi kusonda kujatikizya makani aacolwe, eezyi nzimwi zyazyintu madaimona nzyaabelesya kweena alimwi akweendelezya bantu. Nkakaambo kaako Jehova ulatucenjezya kujatikizya ntenda eezyi alimwi ulabakwabilila aabo boonse ibamukazya Saatani amadaimona aakwe.—Jakobo 4:7.

▪ TUPONA “KUMAZUBA AAMAMANINO”

Myaka iili 2,000 yainda, Bbaibbele lyakaambila limwi kuti “Kozyiba kuti, kumazuba aamamanino kuyooba ziindi zikatazya ncobeni.”

Ikujatikizya cipa kuti ziindi kazikatazya, Bbaibbele lilazumanana kwaamba kuti: “Nkaambo bantu bayooba basikuliyanda, bayandisya mali, basikulidunda, basikulisumpula, . . . batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu, basikwaaba bamwi, batalaiki, basikulitukumuna, bayandisya zyakulikondelezya kwiinda kuyandisya Leza.” Masimpe, ikaambo kapati ncokuli kupenga nkotubona sunu nkakuti tupona “kumazuba aamamanino.”—2 Timoteyo 3:1-4.

Kweelana abumboni mbotwalanga-langa, sena cilakatazya kumvwisya ikaambo bantu ncobatakonzyi kumana mapenzi, nokuba kuti bajisi makanze mabotu? Aboobo, ino nkuli nkotukonzya kujana lugwasyo? Tweelede kulangila ku Mulengi wesu, walo uusyomezya ‘kunyonyoona milimo ya Diabolosi” alimwi abasikumutobela. (1 Johane 3: 8) Mucibalo citobela tuyakulanga-langa ncayoocita Leza kutegwa agwisye zyintu zyoonse zipa kuti bantu kabapenga.

[Cifwanikiso icili apeeji 4]