IBBAIBBELE LILAKONZYA KUBACINCA BANTU

“Bantu banji tiibakali kundiyanda”

AKALUULWA ABA WALDO MOYA

MWAKA WAKUZYALWA: 1978

KUCISI NKWAZWA: CHILE

MBWAAKABEDE KAINDI: BAKALI BAKALI KAPATI

MBONDAKABEDE KAINDI: Ndakakomenena ku Santiago, dolopo mpati lyamucisi ca Chile kwalo kudumide misamu iikola, tubunga twazigwebenga alimwi abugwebenga. Bataata bakajaigwa nindakajisi myaka yosanwe yakuzyalwa. Kuzwa waawo, bamaama bakatalika kukkala amwaalumi silunya. Ciindi aciindi, mwaalumi ooyu wakali kutuuma, mebo abamaama. Noliba lino, ndilaziyeeya zyintu zibi zyakali kutucitikila.

Nondali kukomena, ndakali mukali kuzyintu nzyondatakali kukkomanina. Ndakali kuswiilila nyimbo zitegwa heavy-metal, kunywa kapati bukoko, alimwi zimwi ziindi ndakali kubelesya misamu iikola. Ndakali kutola lubazu mukulwana abasikusambala misamu iikola, balo ziindi zinji ibakali kuyanda kundijaya. Aciindi cimwi kabunga kazigwebenga ikakali kutulwana, kakatuma cigwebenga cimwi kuti cindijaye, pele ndakacikonzya kutija nokuba kuti ndakali acilonda cakuyaswa. Alimwi aciindi cimwi bamukabunga kabasikusambala misamu iikola bakanditondeka ntobolo kumutwe alimwi akusola kundisina.

Mumwaka wa 1996, ndakasyaba mukaintu wazyina lya Carolina, mpoonya mumwaka wa 1998 twakakwatana. Naakazyalwa mwaneesu mutaanzi, ndakayoowa kuti akaambo kabukali bwangu ambweni andime inga ndatalika kutalanganya kabotu mukwasyi mbuli bataata bakujana. Aboobo, ndakalomba lugwasyo kukabunga kagwasyilizya bantu kupona kabotu abamwi. Nokuba kuti ndakapegwa musamu, tiicakagwasya pe. Ndakazumanana kuba mukali nomuba muzyintu zisyoonto-syoonto; tiindakali kunyoneka. Mukusola kuleka kupenzya mukwasyi wangu ndakasola kulijaya. Pele tiindakazwiidilila.

Kwamyaka minji, tiindakali kusyoma kuti Leza nkwali, pele lino ndakaba aluyandisisyo lwakuzyiba Leza. Aboobo, kwaciindi cisyoonto ndakatalika kuswaangana acikombelo citegwa evangelical religion. Aciindi nciconya, mukaangu wakali kwiiya Bbaibbele a Bakamboni ba Jehova. Tiindakali kubayanda Bakamboni ba Jehova, alimwi ziindi zinji ndakali kubatukila. Pele lyoonse bakali kundiingula kabotu.

Bumwi buzuba, Carolina wakandaambila kubala lugwalo lwa Intembauzyo 83:18 mu Bbaibbele lyangu. Kapango aaka kalasalazya kwaamba kuti izyina lya Leza ngu Jehova. Cakandigambya nkaambo kucikombelo cesu ndakayiya kujatikizya leza, pele kutali Jehova. Kumatalikilo aamwaka wa 2000, andime ndakatalika kwiiya Bbaibbele a Bakamboni.

BBAIBBELE MBOLYAKANDICINCA: Nindakaiya zinji, ndakaumbulizyigwa kuzyiba kuti Jehova ngu Leza silweetelelo alimwi uulekelela. Mucikozyanyo, mubbuku lya Kulonga 34:6, 7, Bbaibbele lyaamba kuti Jehova ngu “Leza siluzyalo asibuuya uutafwambi kukalala, uuzwide luse alusyomo, uufwida bantu bali zyuulu luzyalo, uujatila milandu andeyo azibi.”

Nokuba boobo, tiicakali cuuba-uba kubelesya zyintu nzyondakali kwiiya. Ndakali kubona mbuli kuti tandikacinci. Lyoonse naa kuti ndaalilwa, Carolina wakali kundiyumya-yumya caluyando. Wakandiyeezya kuti Jehova wakali kubona kusolekesya kwangu. Wakandipa nguzu zyakuzumanana kukkomanisya Jehova, nokuba kuti tiindakali kuyeeya kuti inga ndacinca.

Bumwi buzuba, ba Alejandro, ibakali kundiyiisya Bbaibbele bakandaambila kubala lugwalo lwa Bagalatiya 5:22, 23. Tupango ootu twaamba kuti “luyando, lukkomano, luumuno, kukkazyika moyo, luzyalo, bubotu, lusyomo, kubomba moyo, kulilesya,” mucelo wamuuya wa Leza. Ba Alejandro bakapandulula kuti kuba abube oobu kwakali kuyandika muuya uusalala wa Leza, ikutali kubelesya nguzu zyangu. Kaambo aaka kamasimpe kakapa kuti ndicince kuyeeya kwangu!

Mukuya kwaciindi, ndakajanika kumuswaangano wacooko wa Bakamboni ba Jehova. Kucita zyintu kabotu-kabotu, bulondo, alimwi akuyanzana nkondakabona kwakandipa kusyoma kuti ndacijana cikombelo cakasimpe. (Johane 13:34, 35) Ndakabbapatizyigwa mu February 2001.

MBONDAGWASYIGWA: Jehova wapa kuti ndileke bukali akuba muntu siluumuno. Ndilimvwa mbuli kuti ndakalisinkilidwe mucilindi mpoonya wakandigwisya. Bantu banji tiibakali kundiyanda, alimwi tandibapi mulandu. Pele lino ndibelekela Jehova caluumuno antoomwe amukaintu wangu alimwi abana bangu basankwa bobilo.

Babbululu bangu abeenzuma mbondakajisi kaindi balagambwa mbondakacinca. Akaambo kaceeci, bunji bwabo batondezya kuyanda kwiiya kasimpe kamu Bbaibbele. Alimwi ndakaba acoolwe cakugwasya bamwi kuzyiba Jehova. Eelo kaka cilakkomanisya kubona mbolyabancica Bbaibbele abalo!

[Cifwanikiso icili apeeji 12]

[Cifwanikiso icili apeeji 12]

 [Majwi aakwelelezya sikubala aali apeeji 13]

Ndakaumbulizyigwa kuzyiba kuti Jehova ngu Leza silweetelelo alimwi uulekelela

[Cifwanikiso icili apeeji 13]

Ndilakkomana kuyiisya bamwi zyintu nzyondakayiya

[Cifwanikiso icili apeeji 13]

Ndibelekela Jehova caluumuno antoomwe amukwasyi wangu