“Sikupa Bulumbu Kuli Baabo Bamuyandaula Cabusungu”
AMUBE ACILONGWE A LEZA
“Sikupa Bulumbu Kuli Baabo Bamuyandaula Cabusungu”
Sena Jehova ulazibikkila maano nzyobacita bakombi bakwe ibasola kumukkomanisya? Bamwi balakonzya kwiingula kuti peepe, akwaamba kuti Leza tatubikkili maano. Pele kuyeeya kuli boobu kuliindene kapati abwini mbwabede Leza. Ijwi lyakwe, Bbaibbele lilakalulamika kaambo aaka. Litwaambila kuti Jehova ulabakkomanina bakombi bakwe basyomeka akaambo kakusolekesya nkobacita. Amulange-lange majwi aamwaapostolo Paulo aajanika mulugwalo lwa Bahebulayo 11:6.
Ino Jehova inga twamukkomanisya buti? Paulo wakalemba kuti: “Ikuti kakunyina lusyomo tacikonzyeki pe kumukkomanisya Leza.” Amubone kuti mwaapostolo Paulo taambi kuti nciyumu kukkomanisya Leza kuti kakunyina lusyomo. Pele waamba kuti tacikonzyeki kucita oobo. Munzila imwi, wakali kwaamba kuti lusyomo lulayandika kapati kutegwa muntu amukkomanisye Leza.
Ino Leza ukkomanina lusyomo luli buti? Kuli zyintu zyobilo zijatikizyidwe mukuba alusyomo muli Leza. Cakusaanguna, tweelede “kusyoma kuti nkwali ncobeni.” Nkaambo kuti katutasyomi kuti Leza nkwali ncobeni, tatukonzyi kumukkomanisya. Nokuba boobo, lusyomo lwini-lwini lubikkilizya zyintu zinji, nkaambo naaba madaimona alasyoma kuti Jehova nkwali ncobeni. (Jakobo 2:19) Kusyoma kuti Leza nkwali ncobeni kweelede kutupa kubweza ntaamu yakutondezya lusyomo lwesu kwiinda mukupona munzila iimukkomanisya.—Jakobo 2:20, 26.
Cabili, tweelede “kusyoma kuti” Leza ngu “sikupa bulumbu.” Muntu uujisi lusyomo lwini-lwini ulizyi kuti kusolekesya kwakwe kupona munzila iimukkomanisya Leza takuli kwabuyo pe. (1 Bakolinto 15:58) Ino inga twamukkomanisya buti Jehova ikuti katutasyomi kuti ulakonzya alimwi uliyandide kutupa bulumbu? (Jakobo 1:17; 1 Petulo 5:7) Muntu uuyeeya kuti Leza tabikkili maano, talumbi, alimwi akuti tali mwaabi, nkokuti tamuzyi Leza waambwa mu Bbaibbele.
Ino mbaani Leza mbapa bulumbu? Paulo waamba kuti upa “baabo bamuyandaula cabusungu.” Bbuku limwi lyabasanduluzi ba Bbaibbele lyaamba kuti ibbala lyamu Chigiliki lyakasandululwa kuti “bamuyandaula cabusungu” talipandululi “kuunka buya kuyooyandaula” pele lyaamba “kukomba Leza.” Ibbuku limbi lipandulula kuti, ibbala lyamu Chigiliki lyakasandululwa kuti “bamuyandaula cabusungu” lipa muzeezo wakubeleka canguzu alimwi akubikkila maano. Masimpe ngakuti, Jehova ulabapa bulumbu aabo ibajisi lusyomo lubapa kumukomba caluyando luzwa ansi aamoyo alimwi acabusungu.—Matayo 22:37.
Mbuti Jehova mbwapa bulumbu kubakombi bakwe basyomeka? Wasyomezya kutupa bulumbu butaliboteli bwakupona buumi butamani mu Paradaiso anyika calo citondezya kuti mwaabi alimwi ngusiluyando. (Ciyubunuzyo 21:3, 4) Noliba lino, aabo bayandaula Jehova cabusungu ulabapa zilongezyo zinji. Kwiinda mukugwasyigwa amuuya wakwe uusalala alimwi abusongo bujanika mu Jwi lyakwe, bantu aabo bapona buumi bukkomanisya alimwi bulaampindu.—Intembauzyo 144:15; Matayo 5:3.
Masimpe ngakuti Jehova ngu Leza uulumba babelesi bakwe balyaabide akaambo kamilimo njobacita. Sena kuzyiba makani aaya takumupi kuyanda kuba acilongwe anguwe? Ikuti kacili boobo, tumukulwaizya kwiiya mbomukonzya kuba alusyomo alimwi ambomukonzya kutondezya lusyomo luyoopa kuti Jehova akamupe bulumbu.
Magwalo Aamu Bbaibbele Aasalidwe Kubalwa mu November
[Majwi aakwelelezya sikubala aali apeeji 11]
Ino inga twamukkomanisya buti Jehova ikuti katutasyomi kuti ulakonzya alimwi uliyandide kutupa bulumbu?
