Ciyobwedo camali aakali kusangwa mutempele cakali mu Lubuwa lwa Bamakaintu. Ibbuku limwi lyaamba kuti: “Kwakali misemu yakazingulukide lubuwa oolu, pele mulubuwa oolu kwakali bwaanda, mpoonya abwaanda kwakali zibikkilo zyamali izili 13 naa ‘myeembo.’”

Zibikkilo eezyi zyakali kwiitwa kuti myeembo akaambo kakuti mpozili atala zyakali zisyoonto mpoonya mpozili ansi zyakali zipati. Cibikkilo cimwi acimwi cakalilembedwe musyobo wazyakusanga, mpoonya mali aakali kusangwa akali kubelesyegwa mumulimo uugaminide. Jesu wakali mu Lubuwa lwa Bamakaintu ciindi naakabona bantu banji kubikkilizya amukaintu mukamufwu kababikka mali.—Luka 21:1, 2.

Zibikkilo zyobilo zyakali kubikkwa ambali kutegwa kakubikkwa mutelo watempele wamwaka ooyo alimwi awainda. Cibikkilo catatu kusikila kuli caciloba zyakali zyakubikkila mali aanziba, nkwilimba, nkuni, tununkilizyo, alimwi azibelesyo zyangolida. Ikuti sikusanga wabikka ambali mali aaindilila amuulo uubikkidwe wacituuzyo, nkokuti mali aaindilila akali kubikkwa muzibikkilo eezyo zimwi. Cibikkilo calusele cakali cakubikkila mali aakali kucaala kuzipaizyo zyazibi. Cibikkilo canamba 9 kusikila kuli canamba 12 mwakali kubikkwa mali aakali kucaala kuzipaizyo zyamilandu, zyabayuni, zyaba Naziri, alimwi azyabasicinsenda basalazyidwe. Cibikkilo canamba 13 cakali cakubikkila zyakusanga zyakuliyandila.

Luka wakalemba Makani Mabotu aaitwa azyina lyakwe alimwi abbuku lya Milimo ya Batumwa. Luka wakaamba kuti “ndakaziccililizya zyintu zyoonse kuzwa kumatalikilo cakulomya,” pele basyaazibwene bamwi balaadooneka makani ngaakalemba. (Luka 1:3) Aboobo, sena makani ngaakalemba akaliluzi?

Luka wakalemba makani aakaindi bantu ngobakonzya kusinizya. Mucikozyanyo, wakabelesya mazyina amwi aatazyibidwe kapati aabalupati-pati bamu Roma, mazyina mbuli aakuti beendelezi batwaambo twabuleya mu Filipi; beendelezi bamumunzi ku Tesalonika; beendelezi bamapobwe mu Efeso. (Milimo 16:20; 17:6; 19:31) Alimwi Luka wakaamba Heroda Antipa kuti mweendelezi wacibeela cacooko, alimwi Sergio Paulo kuti mweendelezi wacisi ca Kupro.—Milimo 13:1, 7.

Luka mbwaakaabelesya mazyina aabulemu cilakkomanisya nkaambo ciindi cilawo icakali kweendelezyegwa a Roma nocakali kucinca, alyalo zyina lyabulemu lyamweendelezi lyakali kucinca. Nokuba boobo, sikwiiya Bbaibbele Bruce Metzger wakaamba kuti, “lyoonse makani aali boobu naambwa mubbuku lya Milimo, aliluzi kweelana abusena alimwi aciindi naakacitika.” Aumwi sikwiiya Bbaibbele, William Ramsay, wakaamba Luka kuti wakali “sikwiiya makani aakaindi uusumpukide kapati.”