Ndakazyalilwa ku Riga, dolopo lipati mu Latvia. Mebo amwanookwesu musimbi, twaakomezyegwa abamaama. Nokuba kuti bamaama mba Katolika, twakali kuunka buyo kucikombelo ciindi camazuba aakulyookezya aazikombelo. Lyoonse ndali kusyoma kuti kuli singuzu uusumpukide, pele mbwanga ndakali mwana, ndakali kunyonganizigwa azintu zinji nzyondakali kuyanda kucita.

Nondakali kuyaabukomena, bamaama bakabona kuti ndakali mupampu kumakani aakupasaula zintu akuzipanga alimwi. Mbwaanga kwakali zintu zinji muŋanda nzyondakali kukonzya kupasaula, bamaama bakali kulibilika kundisiya endikke. Aboobo, bakandipa zibeela-beela zyazibulo, nzyondakali kukkomanina kupanga alimwi akuzipasaula. Luyandisyo oolu, lwakeendelana aluyandisyo lumwi lwakweenzya mahonda. Bamaama bakandilembya kukabunga kabasikweenzya mahonda aamizundano kaitwa kuti The Golden Moped. Ndakatalika kweenzya mahonda aakukabunga aaka, mpoonya ndakasangana akabunga kategwa motorcycles.

Ndakali kwiiya zintu cakufwambaana alimwi kalitanalampa ndakazwidilila mucisobano eeci cakali kukonzya kuleta ntenda. Ziindi zyotatwe ndakawina kumizundano yaku Latvia kandili aba superbikes, mpoonya ziindi zyobilo ndakawina mumizundano ya Baltic States Superbike.

: Kandicibeleka mulimo wangu wakweenzya mahonda, ba Evija, mukaintu ngondakasyabide (mukuya kwaciindi ngondakakwata) wakabazyiba Bakamboni ba Jehova ciindi naakajana bbuku lyabo lyakajisi kapepa katondezya mbokulombwa ciiyo ca Bbaibbele. Mpoonya wakakasaina kapepa aaka akukatuma. Kakutanainda ciindi, Bakamboni bobilo bakamuswaya, mpoonya wakatalika kwiiya Bbaibbele ambabo. Kulindime cakali buyo kabotu nokuba kuti aciindi eeci tiindakali kwaabikkila maano makani aajatikizya kukomba.

Mukuya kwaciindi, Bakamboni aaba bakanditamba kuti ndijanike aciiyo ncobakali kucita aba Evija. Ndakazumina, alimwi ndakazikkomanina zintu nzyondakamvwa aciiyo eeci. Cintu  comwe cakandisika amoyo, ncisyomezyo camu Bbaibbele cijatikizya nyika yaparadaiso. Mucikozyanyo, bakanditondezya lugwalo lwa Intembauzyo 37:10, 11, ilwaamba kuti: “Kaba kaindi kaniini sizibi takooyooba wo; Unooyeeya nkwaakabede, pele takooyooba nkuko. Pele babombemyoyo bayoovuba nyika, Bayookondwa muluumuno lunji.” Eeci cisyomezyo cakandibotela loko.

Ndakazumanana kuyandisya zintu zyakumuuya. Ndakazoozyiba kuti kwakali twaambo tunji twakubeja mumakani aabukombi. Nokuba boobo, njiisyo zyamu Bbaibbele zyakandibotela nkaambo zyakajisi twaambo tutobeleka alimwi tutakatazyi kumvwisya.

Nondakali kuyaabwiiya Bbaibbele, ndakaiya Jehova mbwabulemeka kapati buumi alimwi abuumi mbobuli bubotu mumeso aakwe. (Intembauzyo 36:9) Eeci cakandijatikizya, mbwaanga ndakali sikweenzya mahonda aamizundano—tiindakacili kuyanda kubikka buumi bwangu muntenda alimwi. Muciindi caboobo, ndakayanda kuti ndilemeke Jehova mubuumi bwangu kwiinda mukumubelekela. Aboobo, kuba ampuwo, kulemekwa alimwi akulikondelezya kwiinda mukweenzya mahonda aamizundano tiizyakacili zintu ziyandika kulindime.

Mumwaka wa 1996, ndakaswaangana kumuswaangano wamasi wa Bakamboni ba Jehova iwakali ku Tallinn, Estonia. Busena oobu bwakali afwaafwi abbuwa nkotwakali kweenzyela mahonda aamizundano. Amuswaangano ooyu, ndakabona bantu ibakazwa muzisi ziindene-indene bakakamantene alimwi bakali basiluumuno. Mucikozyanyo, ciindi Kamboni umwi naakasweekelwa kapeesi kamali, ndakayeeya kuti taakwe nayookabona alimwi. Pele kalitanalampa, Kamboni umwi wakakajana akukapilusya kakajisi zintu zyoonse. Ndakagambwa kapati! Eeci cakandipa kuzyiba kuti ncobeni Bakamboni beendelezyegwa azyeelelo zisumpukide zyamu Bbaibbele. Mebo aba Evija, twakazumanana kuyaambele muciiyo cesu ca Bbaibbele. Mpoonya mu 1997 twakabbapatizyigwa akuba Bakamboni ba Jehova.

Beenzuma bamwi bakafwa akaambo kakweenzya mahonda aamizundano cabuyamba. Kwiinda mukuba aciiyo ca Bbaibbele, ndakazoozyiba kuti ndilaamukuli kuli Sikupa buumi Jehova. Ikuzyiba kaambo aaka, ambweni ncicandigwasya kupona kusikila sunu.

Kwamyaka yone, mebo aba Evija twakajisi coolwe cakubeleka katuli babelesi baciindi coonse amutabi wa Bakamboni ba Jehova mu Riga. Lino tulikkomene kukomezya mwaneesu musimbi Alise, alimwi akumugwasya kuyanda Jehova. Alimwi ndijisi coolwe cakubeleka buzuba bomwe mumvwiki kuofesi lyabasanduluzi kugwasilizya kubamba myootoka alimwi azintu zimwi zitali kabotu. Cindiletela lukkomano ncobeni kubelesya luzyibo lwangu ndondakajisi kubwana! Noliba lino ndicipasaula zintu akuzipanga alimwi.

Ndilacibikkila maano coolwe ncondijisi cakukambauka kujatikizya Leza mwini-mwini antoomwe amukwasyi wangu. Ndilalumba kapati kujatikizya nzyondakaiya kuzwa mu Bbaibbele. Ncobeni cisyomezyo canyika yaparadaiso cakacinca buumi bwangu!