Kuti ndayeeya ciindi nondakali mwana, cindiyeezya mazuba mabotu mukaanda motwakali kukkala abazyali mucisi ca France nkocili kumusanza. Bataata bakandipangila kampeelwa, alimwi ndakali kukkomana kubalika-balika kuzinguluka gaadeni. Mu 1966, Bakamboni ba Jehova bakatuswaya aŋanda yesu alimwi bakabandika abataata ciindi cilamfwu. Mpoonya nokwakainda myezi iili ciloba, bataata bakasala kuba Kamboni wa Jehova. Kalitanalampa, abalo bamaama bakacita mbubwenya alimwi bakandikomezya mumukwasyi uukkomanisya.

Penzi lyangu lyakatalika nokwakainda buyo ciindi cisyoonto kuzwa notwakapiluka ku Spain kwalo nkobazwa bazyali bangu. Ndakatalika kumvwa kuyasa-yasa mumaanza alimwi amungo. Nokwakainda myaka yobilo kandibonana abamadokota baindene-indene, ndakazikubonana asyaazibwene mumalwazi aamilambi amanungo walo iwakandaambila kumwi kauside kuti, “Mwakamuka.” Bamaama bakatalika kulila . Buzuba oobu katuli mukaanda katontola kasiya-siya twakamvwa mabala ngotutanamvwide mbuli aakuti “autoimmune chronic illness” alimwi aakuti “juvenile polyarthritis.” * Nokuba kuti tiindakamvwisya zyakali kucitika mbwanga ndakali buyo amyaka iili 10 yakuzyalwa, pele ndakazyiba kuti zintu tiizyakali kabotu.

Badokota bakapa muzeezo wakuti ndisilikwe kucibbadela cabana cilanganya bantu ibaciswa kwaciindi cilamfwu. Nindakasika kucibbadela eeci, ndakatyompwa akaambo kabusena mbobwakabede. Bakali kusinizya kuti milawo yoonse ilatobelwa: Bamasiite bakooku, bakandigela masusu alimwi akundisamika yunifomu yafasyoni yakaindi. Kumwi kandilila ndakalyaambauzya kuti: ‘Mbuti mbondikonzya kuliyumya kuno?’

Akaambo kakuti bazyali bangu bakandiyiisya kubelekela Jehova, ndakakaka kutola lubazu mutunsiyansiya twaba Katolika acibbadela eeci. Bamasiite baacibbadela eeci cakabakatazya kumvwisya kaambo ncondakali kukakila. Ndakapaila kuli Jehova kuti atandilekelezyi, mpoonya ndakalimvwa kukwabililwa ajanza lyakwe, mbubwenya mbuli usyi siluyando mbwakumbatila mwanaakwe.

Bazyali bangu bakali kubazumizya kundiswaya kwaciindi cisyoonto mu Mujibelo. Bakali kundiletela mabbuku aamba zyamu Bbaibbele kutegwa ndibe alusyomo luyumu. Bana tiibakali kuzumizyigwa kuba amabbuku aabo,  pele bamasiite bakandizumizya kuba amabbuku antoomwe a Bbaibbele lyalo ndendakali kubala buzuba abuzuba. Alimwi ndakali kubandika abeenzuma kujatikizya bulangizi bwangu bwakuyoopona buumi butamani munyika ya Paradaiso mwalo imutakabi muntu naba omwe uyoociswa. (Ciyubunuzyo 21:3, 4) Nokuba kuti zimwi ziindi ndakali kulimvwa kutyompwa akulendelelwa, ndakabotelwa kuti lusyomo lwangu muli Jehova lwakali kuyaabukomena.

Nokwakainda myezi iili cisambomwe, bamadokota bakandisaina. Bulwazi oobu tiibwakamana, pele ndakakkomana kuba antoomwe abazyali bangu alimwi. Mumanungo mwakaindila kucisa, alimwi tiimwakali kulibonya kabotu. Ndakasika mumyaka yakukubuka kanditajisi nguzu. Nokuba boobo, nindakakkwanya myaka iili 14, ndakabbapatizyigwa kandijisi makanze aakuzumanana kubelekela Taata wakujulu kusika mpondigolela. Pele zimwi ziindi ndakali kutyompwa kujatikizya nguwe akupaila kuti: “Nkaambo nzi eeci ncocandiwida? Ndakomba kaka kondiponya? Sena tobwene mbondipenga?”

Ciindi cakukubuka tiicakali cuubauba kuli ndime. Ndakeelede kuzyiba kuti tiindakali kuyoopona bulwazi oobu. Ndakali kulyeezyanisya kapati abeenzuma ibakali kukkomana mubuumi. Ndakalimvwa kuti ndili muntu wabuyo alimwi ndakazooba muumuzi. Nokuba boobo, bazyali bangu alimwi abalongwe bangu tiibakandilekelezya. Ndilabayeeya ba Alicia ibakali bapati kuli ndime amyaka iili 20, balo ibakaba balongwe bangu bancobeni. Bakandigwasya kubikkila maano bamwi muciindi cakubikkila buyo maano kumapenzi angu.

Nondakajisi myaka iili 18, ndakaciswa kapati alimwi nokuba kujanika kumiswangano ya Bunakristo cakali kundipa kukatala kapati. Nokuba boobo, ndakabelesya ciindi ncondakali kukkala aŋanda kwiiya Bbaibbele cakusitikila. Ndakagwasyigwa kwiinda mukubala bbuku lya Jobu alimwi alya lntembauzyo kuzyiba kuti calino Jehova utulanganya kapati munzila yakumuuya ikutali yakumubili. Mipailo njondakali kupaila ziindi zinji yakandipa “nguzu zigambya iziinda zyabantu” alimwi a “luumuno lwa Leza oolo lwiinda kumvwisya koonse.”—2 Bakolinto 4:7; Bafilipi 4:6, 7.

Kandili amyaka iili 22, ndakazyiba kuti lino buumi bwangu bwakali kuyooba buyo bwakweendela akacinga kabalema. Ndakali kulibilika kuti bantu balaleka kundibikkila maano pele bakali kunoobona buyo mukaintu uucisidwe uuli akacinga kabalema. Nokuba boobo kacinga kabalema kakandipa kuba alwaanguluko, alimwi muciindi cakulimvwa kusinganizyigwa ndakalimvwa kulongezyegwa. Mweenzuma wazina lya Isabel wakandipa muzeezo wakuba aambaakani yakubeleka mawoola aali 60 mumulimo wakukambauka antoomwe anguwe mwezi omwe.

Kumatalikilo, ndakali kuyeeya kuti muzeezo ooyu taukonzyi kubeleka. Pele ndakalomba Jehova kuti andigwasye, alimwi kwiinda mukugwasyigwa amukwasyi wangu alimwi abeenzuma, ndakacikonzya. Mweezi ooyu ngondakajisi bubi, wakainda cakufwambaana alimwi ndakazoobona kuti ndakazunda kulibilika nkondakajisi alimwi ansoni. Ndakabotelwa kapati cakuti mu 1996 ndakasala kuti ndibe mupainiya—kubeleka mawoola aagaminide mwezi amwezi mumulimo wakukambauka. Eeci cakali cakusala ciinda kubota, cakandipa kuba acilongwe ciyumu a Leza alimwi akundiyumya kumubili. Kutola lubazu mumulimo wakukambauka cakandipa coolwe cakwaambila bantu zintu nzyondakali kusyoma alimwi akugwasya bamwi kuba balongwe ba Leza.

Mu 2001, ndakajanika muntenda yamumugwagwa iyakatyolaula maulu aangu oonse obilo. Nindakali abulo mucibbadela, kumwi kandilimvwa kucisa kapati, ndakapaila cakaumuumu amoyo woonse kuti: “Jehova, ndakomba kaka utandilekelezyi!” Mpoonya mukaintu umwi iwakalede abulo bwakali afwaafwi abulo bwangu wakandibuzya kuti, “Sena uli Kamboni wa Jehova?” Tiindakajisi nguzu zyakumwiingula aboobo ndakazumina kwiinda mukunyanyaasya mutwe. Wakati: “Ndilimuzyi nobantu nywebo! Ndilabala mamagazini aanu.” Majwi aaya akanduumbulizya kapati. Nokuba kuti ndakali mubukkale bweetezya, ndakapa bumboni kujatikizya Jehova. Taciliboteli kaka coolwe eeci!

Nondakalimvwa kabotu asyoonto, ndakazumanana kukambauka. Bamaama bakali kundikuba akacinga kabalema muwaadi yamucibbadela kumwi maulu aangu kaali mupulasita. Buzuba abuzuba, twakali kuswaya balwazi bali mbobabede akubabuzya mbobakali kulimvwa, alimwi akubasiila mabbuku aamba zyamu Bbaibbele. Kuswaya ooku kwakali kundilemya kapati, pele Jehova wakandipa nguzu nzyondakali kuyandika.

Mumyaka misyoonto yainda, zicisa mumubili wangu zyavwula kapati, alimwi lufwu lwabataata lwayungizya mapenzi ngondijisi. Nokuba boobo, ndilasoleka kulanga  zintu munzila yeelede. Munzila nzi? Kufwumbwa buyo nocikonzyeka ndilasoleka kujanika antoomwe abeenzuma alimwi abanamukwasyi, eeci cindipa kutabikkila kapati maano kumapenzi ngondijisi. Alimwi ciindi nondili ndelikke, ndilabala akwiiya Bbaibbele alimwi akukambaukila bamwi kubelesya fooni.

Alimwi ndilasoleka kulikkomanisya azintu zyuuba-uba mbuli kuumwa muuwo kumeso naa ikumvwa kununkilila kwamaluba-luba. Eezyi zindipa kaambo ncondeelede kutondezya kulumba. Kuseka-seka abantu akwalo kulandigwasya. Buzuba bumwi kandili mumulimo wakukambauka, mweenzuma iwakali kundikuba wakaima kutegwa alembe kaambo kamwi. Mpoonya cakutayeeyela ndakakunkulika akuyoolyuumputa mumootokala wakaimvwi. Toonse twakagambwa kapati, pele notwakabona kuti kunyina ntenda yacitika, twakafwa kuseka.

Kuli zintu zinji mubuumi zyondaalilwa kucita. Zintu eezyi ndizyaamba kuti nzintu nzyondilangila kuyoocita kumbele. Ciindi aciindi inga ndilayeeyesya kujatikizya nyika mpya Leza njasyomezya. (2 Petulo 3:13) Inga ndileezyeezya kuti ndijisi buumi bubotu, kandendeenda alimwi akukkomana mubuumi. Ndilaabikkila maano majwi aa Mwami Davida aakuti: “Lindila Jehova! Koyuma, amoyo wako ujate inguzu. Lindila Jehova!” (Intembauzyo 27:14) Nokuba kuti mubili wangu wazumanana kuyaabumana nguzu, Jehova wandiyumya. Ndazumanana kujana nguzu mukukompama kwangu.