Naoko iwaambwa mucibalo cakusaanguna, wakaamba boobu kujatikizya mbwaakacileka kufweba: “Ndakacikonzya kucinca buumi bwangu akaambo kakwiiya kasimpe kajatikizya bube bwa Leza alimwi amakanze aakwe.” Nzyaakaiya zijanika mu Bbaibbele. Nokuba kuti Bbaibbele talyaambi kujatikizya tombwe, pele lilatugwasya kumvwisya Leza mbwakubona kufweba. * Ibantu banji, luzibo oolu lwabagwasya kucikaka naa kucileka ciyanza eeci. (2 Timoteyo 3:16, 17) Atulange-lange ntenda zyotatwe zizyibidwe kapati iziboola akaambo kakufweba alimwi akubona ncolyaamba Bbaibbele kujatikizya ntenda eezyi.

Tombwe ilijisi musamu uupa kuba acizibilizi uutegwa nicotine. Upa kuti mubili kaubeleka cakufwambaana akupa kuti moyo kauzuzaana. Kufweba kupa kuti musamu ooyu utegwa nicotine uunke kubongo cakufwambaana alimwi cakwiinduluka-induluka. Mbwaanga kukwela ciindi comwe kunjizya musamu munji wa nicotine, nkokuti muntu uufweba kapakete komwe abuzuba unjizya musamu ooyu ziindi zibalilwa ku 200, musamu ooyu munji kapati kwiinda misamu imwi njobabelesya bamwi. Kufweba cakwiinduluka-induluka cipa kuti muntu abe acizibilizi akaambo ka nicotine. Kufwumbwa kuti muntu waba aacizibilizi cakufweba, cilakonzya kukatazya kucileka, akaambo ka nicotine.

Bbaibbele lilatugwasya kubona makani aaya munzila yeelede nolyaamba kuti: “Sena tamuzyi kuti, ikuti naa kamulyaaba kuli umwi mbuli bazike bamvwida, muli bazike bamuntu ooyo ngomuswiilila?” (Baloma 6:16) Ciindi mizeezo alimwi amicito yamuntu noyeendelezyegwa atombwe, kalitanalampa ulaba muzike kucilengwa cakufweba. Nokuba boobo, Leza, uuli azina lyakuti Jehova, uyanda kuti katutaciti micito ikutali buyo iisofwaazya mubili wesu, pele alimwi ayeeyo iisofwaazya muuya wesu, nkokuti muuya weendelezya mizeezo yesu lyoonse. (Intembauzyo 83:18; 2 Bakolinto 7:1) Aboobo kulumba alimwi abulemu muntu mbwapa kuli Jehova bulakomena, ulaibaluka kuti Jehova uyanda zintu ziinda kubota alimwi akuti takonzyi kupa Jehova ziinda kubota kumwi kali muzike kucilengwa cisofwaazya mubili. Kuyeeya kuli boobo kugwasya muntu kuti atabi azisusi zibi.

Ba Olaf ibakkala kucisi ca Germany, bakatalika kufweba nobakali amyaka iili 12, bakazunda cizibilizi cakufweba icakatola myaka iili 16. Bakaamba kuti: “Musanga wakusaanguna, ndakaubona mbuli cintu cakusobanya citakonzyi kusofwaazya mubili. Pele mumyaka minji iyakatobela tombwe ngondakafweba wakavwula kapati. Cimwi ciindi noyakandimanina misanga, ndakacimwa kapati cakuti ndakabwezelela tusyiki twatombwe twakali mukatiba akusangila musanga kubelesya pepa lyamuteende. Kuti ndayeeya ndicibona kuba cintu cijazya nsoni.” Ino bakacileka buti cilengwa cibi eeci cakufweba?” Bakaamba kuti: “Cintu cakali kuyandika kapati nkuyandisisya kukkomanisya  Jehova. Luyando ndwajisi Jehova kubantu alimwi abulangizi mbwapa, cakandipa nguzu zyakucilekela limwi cizibilizi eeci.”

Bbuku litegwa The Tobacco Atlas lyaamba kuti: “Kufweba tombwe . . . basayaansi bakwaamba kuti kulanyonyoona zizo zili mumubili zinji alimwi kupa kuti mweelwe wabantu baciswa alimwi awabaabo bafwa utante.” Bantu banji balizyi kuti kufweba kuletela malwazi aatayambukili mbuli kkansa, bulwazi bwamoyo alimwi abwamapunga. Pele kweelana anzyoyaamba mbunga ya World Health Organization (WHO), kufweba ncilengwa cimwi icipa bantu banji kufwa akaambo kamalwazi aayambukila mbuli bulwazi bwakakweekwe.

Kwiinda mu Jwi lyakwe, Ibbaibbele, Jehova Leza ulatuyiisya mbotukonzya kububona munzila yeelede buumi bwesu, mubili wesu, alimwi amizeezo yesu. Jesu, Mwanaakwe, wakacaamba eeci naakati: “Weelede kuyanda Jehova Leza wako amoyo wako woonse abuumi bwako boonse amizeezo yako yoonse.” (Matayo. 22:37) Cilasalala kuti Leza uyanda kuti katububelesya kabotu buumi alimwi amubili wesu alimwi akuzilanganya cabulemu. Mbotuyaabwiiya kujatikizya Jehova, tulatalika kumuyanda alimwi akuzikkomanina zyoonse nzyaatucitila. Eeci citukulwaizya kuzumanana kuzitantamuka zintu zyoonse zisofwaazya mubili wesu.

Ba Jayavanth, badokota baku India, ibakafweba myaka iili 38 bakaamba kuti: “Ndakaiya bubi buboola akaambo kakufweba kwiinda mukubala mabbuku aamba zyabusilisi. Ndakalizyi kuti tiicakali kabotu, aboobo ndakali kubaambila balwazi mbondakali kusilika kuti bacileke kufweba. Pele mebo cakali kundaalila kuleka, nokuba kuti ndakasoleka ziindi zyosanwe naa zili cisambomwe.” Mukuya kwaciindi, ino ncinzi cakabagwasya kuti bacileke? Bakaamba kuti: “Ndakacileka kufweba akaambo kakwiiya Bbaibbele. Ikuyanda kukkomanisya Jehova kwakandikulwaizya kuleka mpoonya-mpoonya.”

Busi bwatombwe buzwa kumulomo amumpemo alimwi abusi buzwa kumusanga mbubi kapati. Kuyoya busi bwabantu bafweba cilakonzya kupa kuti muntu aciswe bulwazi bwakkansa amalwazi amwi, alimwi kulajaya bantu batafwebi bali 600,000 amwaka, bunji bwabo mbaamakaintu abana. Lipooti kuzwa kumbunga ya WHO yaamba kuti: “Kunyina bukwabilizi buliko kubantu bayoya busi bwabantu ibafweba.”

 Kweelana ambwaakaamba Jesu, tweelede kusaanguna kuyanda Leza, mpoonya kuyanda basimukoboma, nkokuti mikwasyi yesu, beenzuma alimwi abamwi batuzingulukide kweelede kubikkwa musena bwabili. Wakaamba kuti: “Weelede kuyanda simukobonyoko mbubonya mbuli mboliyanda omwini.” (Matayo 22:39). Ikuti twazumanana acilengwa cinyonganya baabo batuzingulukide, tatutondezyi luyando kuli basimukoboma. Luyando lwini-lwini lutupa kutobela lulayo lwamu Bbaibbele lwakuti: “Umwi aumwi kayandisya kugwasya bamwi ikutali buyo kuligwasya lwakwe mwini.”—1 Bakolinto 10:24.

Ba Armen ibakkala ku Armenia bakaamba kuti: “Akaambo kakuti cakali kubajatikizya bamukwasyi wangu, bakandilomba kuti ndicileke kufweba. Pele tiindakali kuyanda kuzumina kuti kufweba kwakali kukonzya kubajatikizya.” Bapandulula boobu mbobakacinca mizeezo yabo: “Luzyibo lwangu lwamu Bbaibbele alimwi akuyanda Jehova cakandigwasya kuleka kufweba alimwi ndakazumina kuti kufweba kulasofwaazya kutali buyo ndime endikke, pele alimwi abaabo bandizingulukide.”

Luzyibo lwamu Bbaibbele lwakagwasya ba Jayavanth alimwi aba Armen kucileka cilengwa cisofwaazya cakali kubacisa alimwi akucisa bamwi. Bakazwidilila kutali akaambo kakuzyiba buyo kuti tombwe ulaletela ntenda, pele akaambo kakuti bakatalika kumuyanda Jehova alimwi akuyanda kumukkomanisya. Lugwalo lwa 1 Johane 5:3 lulakankaizya mboluyandika luyando nolwaamba kuti: “Nkaambo kuyanda Leza caamba kuti katubamba milawo yakwe; alimwi buya milawo yakwe tiiminyi.” Masimpe, kutobela njiisyo zyamu Bbaibbele tacili cuuba-uba lyoonse, pele ciindi muntu nakulwaizyigwa aluyando luyumu ndwajisi kuli Leza, kumvwida tacikabi cintu ciminya pe.

Kwiinda mumulimo wakuyiisya bantu uucitwa nyika yoonse, Jehova Leza lino ulimukugwasya mamiliyoni aabantu kucileka kufweba naa kucileka kuba bazike batombwe. (1 Timoteyo 2:3, 4) Ino-ino, kwiinda mu Bwami bwakwe, nkokuti, mfwulumende yakujulu yeendelezyegwa a Mwanaakwe, Jesu Kristo, Jehova uyoogwisya basimakwebo basyaacivwulemwangu balo ibapa kuti mamiliyoni aabantu babe bazike batombwe. Uyoolimana penzi lyakufweba cakumaninina alimwi uyoopa kuti bantu bamvwida babe amibili alimwi amizeezo iilondokede.—Isaya 33:24; Ciyubunuzyo 19:11, 15.

Ikuti naa mulwana penzi lyacizibilizi cakufweba, mutatyompwi pe. Kwiinda mukwiiya kuyanda Jehova alimwi akubona makani aakufweba mbubonya mbwaabona, andinywe mulakonzya kuba anguzu nzyomuyandika kutegwa muzwidilile. Bakamboni ba Jehova bayookkomana kumugwasya camulomo mpande kwiiya alimwi akutobela njiisyo zyamu Bbaibbele. Amube masimpe kuti, ikuti kamuyanda kuti Jehova amugwasye kucileka kuba acizibilizi cakufweba, uyoomupa nguzu nzyomuyandika kutegwa mucite oobo.—Bafilipi 4:13.