CAINO-INO sikuvwuntauzya wakabuzya bakubusi bainda ku 800 kuzwa kuzikombelo ziinda ku 12, kutegwa baambe naa balasyoma kuti Jesu ulaingula mipailo. Bakubusi bainda ku 60 pesenti bakaamba cakusinizya kuti balasyoma kuti ulaingula. Nokuba boobo, mukubusi omwe abuvwuntauzyi oobo wakalimwaya zina lya Jesu akulemba zina lya “Leza.”

Ino nywebo muyeeya buti? Sena tweelede kugamika mipailo yesu kuli Jesu naa kuli Leza? * Kutegwa tujane bwiinguzi, atusaangune kulanga-langa Jesu mbwaakabayiisya kupaila basikwiiya bakwe.

Jesu wakatuyiisya alimwi akututondezya yooyo nkotweelede kupaila.

MBWAAKAYIISYA: Ciindi umwi wabasikwiiya bakwe naakamulomba kuti, “Mwami, kotuyiisya kupaila,” wakaingula kuti: “Nomupaila, amwaambe kuti: ‘Taata.’” (Luka 11:1, 2) Kuyungizya waawo, mu Mulumbe wakwe waa Cilundu, Jesu wakakulwaizya basikwiiya bakwe kupaila. Wakati: “Amupaile kuli Uso.” Alimwi wakabasyomezya kwiinda mukwaamba kuti: “Uso ulizyi zintu nzyomuyandika kamutaninga akumulomba.” (Matayo 6:6, 8) Masiku aamamanino aakuti juunza ulafwa, Jesu wakaambila basikwiiya bakwe kuti: “Ikuti mwamulomba cintu cili coonse Taata, uyoomupa ncico muzina lyangu.” (Johane 16:23) Aboobo Jesu wakatuyiisya kupaila kuli yooyo ngwaita kuti Taata alimwi andiswe ngotwiita kuti Taateesu, Jehova Leza.—Johane 20:17.

CIKOZYANYO CAKWE: Mbubwenya mbwaakayiisya bamwi kupaila, Jesu lwakwe wakapaila kuti: “Ndakutembaula caantangalala Taata, O Mwami wakujulu aanyika.” (Luka 10:21) Aciindi cimwi, “Jesu wakalanga kujulu akwaamba kuti: ‘Taata, ndakulumba nkaambo wandimvwa.’” (Johane 11:41) Ciindi naakali afwaafwi kufwa, Jesu wakapaila kuti: “Taata, ndabikka muuya wangu mumaanza aako.” (Luka 23:46) Jesu naakali kupaila kuli Bausyi bakujulu, nkokuti “Mwami wakujulu aanyika”, wakasiya cikozyanyo cibotu ncotweelede kutobela. (Matayo 11:25; 26:41, 42; 1 Johane 2:6) Sena oobo mbombubo basikwiiya ba Jesu mbobakali kwaateelela malailile aakwe?

Kakwiindide buyo nsondo zisyoonto kuzwa Jesu naakapiluka kujulu, basikwiiya bakwe bakali kusampaulwa akukongwa kuli basikubakazya. (Milimo 4:18) Cakutadooneka bakapaila, pele ino bakapaila kuli ni? “Amoyo omwe boonse bakapaila kuli Leza,” bakapaila kuti azumanane kubagwasya “kwiinda muzina lyamubelesi [wakwe] uusalala Jesu.” (Milimo 4:24, 30) Aboobo basikwiiya bakaatobela malailile aa Jesu kujatikizya mupailo. Bakapaila kuli Leza kutali kuli Jesu.

Myaka yakatobela, mwaapostolo Paulo wakaamba mbuli mbwaakapaila walo abeenzinyina. Naakalembela Banakristonyina wakati: “Tulamulumba lyoonse Leza Usyi wa Mwami wesu Jesu Kristo notumupailila.” (Bakolose 1:3) Paulo alimwi wakalembela basyominyina kuti ‘lyoonse kabamulumba Leza wesu alimwi Taateesu kujatikizya zintu zyoonse muzina lya Mwami wesu Jesu Kristo.’ (Baefeso 5:20) Kwiinda mumajwi  aaya cilalibonya kuti “lyoonse” Paulo wakakulwaizya bamwi kupaila kuli ‘Leza wakwe alimwi Usyi kujatikizya zintu zyoonse’—pele wakali kucita oobo muzina lya Jesu.—Bakolose 3:17.

Mbubwenya mbuli Banakristo bakusaanguna, tulakonzya kutondezya kuti tulamuyanda Jesu kwiinda mukutobela malailile aakwe kujatikizya mupailo. (Johane 14:15) Notupaila kuli Taateesu wakujulu—alikke—nkokuti majwi aali ku Intembauzyo 116:1, 2 anoojisi bupanduluzi bupati kulindiswe alo aamba kuti: “Ndilamuyanda Jehova nkaambo ulamvwa jwi lyangu . . . ndinoomwiita lyoonse kufwumbwa kuti kandili muumi.” *