Mbubonya mbuli ba Alex, bantu banji mazuba aano tabakkomani kubeleka mulimo uuminya. Ba Aaron ibabeleka mulimo wazyakupanga-panga bakaamba boobu: “Bantu banji bayeeya kuti tabayandiki kubeleka mulimo uuminya. Inga bayeeya buyo kuti: ‘Ndaakujana mulimo mubotu, ndiyakuuleka mulimo ooyu uuminya.’”

Ino nkaambo nzi bantu banji ncobalimvwa kuti tabayandiki kubeleka mulimo uuminya? Ambweni akaambo katwaambo ntobamvwa muli sikapepele naa a TV, oomo mobatondezya “buumi bubotu” bwakulikondelezya alimwi akutaminwa kapati. Ba Matthew, ibabeleka mulimo wakubamba-bamba zintu baamba kuti: “Bantu bayeeya kuti, ikuti kobeleka mulimo uuminya lyoonse kutegwa koligwasya mubuumi, tokonzyi kusumpuka pe.” Ba Shane ibabeleka mulimo wakulanganya ŋanda bakaamba majwi aakozyenye aaya nobakaamba kuti: “Bantu tabayandi kubeleka canguzu buzuba boonse kutegwa bavwole kweelana amulimo ngobabeleka abuzuba.”

Kulubazu lumwi, bantu banji ibazwidilila mubuumi balakkomana kubeleka mulimo muyumu. Ba Daniel ibabeleka mulimo wakuyaka ibajisi myaka iili 25 baamba kuti: “Ndiyeeya kuti kubeleka mulimo muyumu kulagwasya kapati, kwaambisya ikuti kamubeleka kumwi kamujisi makanze mabotu.” Ba Andre ibajisi myaka iili 23 balakazumina kaambo aaka nobaamba kuti: “Ndiyeeya kuti lukkomano luliswaangene amulimo. Kutabeleka canguzu tacikonzyi kupa muntu kukkomana lyoonse—pele cisololela buyo kumapenzi!”

Ino mbuti bantu bali mbuli ba Daniel aba Andre mbobacikonzya kukulanga munzila yeelede kubeleka mulimo muyumu? Bacikonzya kucita oobo akaambo kakutobela njiisyo zyamu Bbaibbele mubuumi bwabo. Bbaibbele talitukulwaizyi kutabeleka mulimo muyumu, pele likulwaizya kuba basungu kubeleka canguzu. Nokuba boobo, Bbaibbele talitwaambili buyo kubeleka, pele alimwi lilatwaambila mbotukonzya kuukkomanina mulimo ngotucita.

Ino ninjiisyo zili zyamu Bbaibbele zikonzya kumugwasya kuba alukkomano mumulimo ngomucita? Twamulomba kuti mulange-lange njiisyo zimwi kweelana ambokutiibandikwe mucibalo citobela.