Ba Mwiinga: Kumwaambila masimpe, makani aabukombi tandaazyi kapati. Aboobo ndiyeeya kuti taakwe zinji nzyotukonzya kubandika.

Ba Muchimba: Ndalumba kundaambila mbomulimvwa. Mebo ndime Muchimba. Ino nywebo ndinywe bani?

Ba Mwiinga: Ndime Mwiinga.

Ba Muchimba: Ndakkomana kuswaangana andinywe ba Mwiinga.

Ba Mwiinga: Inzya, andime ndakkomana.

Ba Muchimba: Ndibuzye, sena mwakakomenena mumukwasyi mobakomba?

Ba Mwiinga: Inzya. Pele ciindi nondakazwa aŋanda akuunka kukkoleji, ndakacileka kukomba.

Ba Muchimba: Oowo, ndakabona kaambo. Ino nziiyo nzi nzyomwakali kwiiya kukkoleji?

Ba Mwiinga: Ndakaiya makani aajatikizya bukkale bwabantu (social studies) alimwi amakani aakaindi (history). Ndilakkomana kapati kwiiya makani aakaindi, nkokuti makani aajatikizya buponi bwabantu anyika.

Ba Muchimba: Makani aakaindi alakkomanisya kapati. Bbaibbele alyalo ndibbuku lijisi makani aakaindi. Nomwakali kuvwuntauzya zyakucikolo, sena alyalo Bbaibbele mwakali kulibelesya?

Ba Mwiinga: Peepe. Ndilizyi kuti ndibbuku libotu, pele tiindali kuyeeya kuti Bbaibbele lilakonzya kuba bbuku lijisi makani aakaindi.

Ba Muchimba: Kuboneka kuti inga twabandika makani manji. Ikuti kacikonzyeka, inga ndayanda kumutondezya zikozyanyo zisyoonto buyo zyamakani aaluzi aakaindi aajanika mu Bbaibbele.

Ba Mwiinga: Cili buyo kabotu. Pele tandijisi Bbaibbele.

Ba Muchimba: Taakwe aabubi. Inga ndamutondezya mu Bbaibbele lyangu. Cikozyanyo cakusaanguna nceeci cijanika mulugwalo lwa 1 Makani caandaano 29 kapango 26 alimwi a 27. Tupango ootu twaamba kuti: “Aboobo Davida mwana wa Jese wakalela bana Israyeli boonse, eelyo ciindi ncaakatola kalela mu Israyeli cakakkwana myaka iili 40. Mu Hebroni wakalela myaka iili ciloba, eelyo mu Jerusalemu wakalela myaka iili 33.”

Ba Mwiinga: Ino mbuti makani aaya mbwaali cikozyanyo camakani aakaindi aaluzi?

Ba Muchimba: Basikukazya bamwi cimwi ciindi bakali kwaamba kuti Mwami Davida kunyina naakaponede pe.

Ba Mwiinga: Eena! Ino nkaambo nzi ncobakali kudooneka?

Ba Muchimba: Kwakali makani masyoonto aatali aamu Bbaibbele aakatondezya kuti Davida wakali muntu wini-wini. Nokuba boobo, mu 1993, kakamu kabasikuvwukkula zyakaindi bakavwukkula bbwe lyansiku lyalo ilyakajisi bbala ilisandulwidwe kuti “Ŋanda ya Davida.”

Ba Mwiinga: Eena!

Ba Muchimba: Aumwi muntu iwaambwa mu Bbaibbele ngobakadooneka bantu kuti wakapona ngu Ponto Pilato, imweendelezi iwakali kulela mumazuba aa Jesu. Ulaambidwe mulugwalo lwa Luka caandaano 3, kapango 1. Ulaakati kabalupati-pati bamfwulumende bakaliko kuciindi eeco.

Ba Mwiinga: Oowo ndabona. Kapango kaamba kuti: “Ponto Pilato naakali mweendelezi wa Judaya, Heroda  wakali mweendelezi wacilikiti ca Galilaya.”

Ba Muchimba: Mbombubo. Basikwiiya zyakaindi bamwi bakali kudooneka kuti naa Ponto Pilato wakali muntu wini-wini. Mpoonya myaka iitandila ku 50 yainda, kwakajanwa bbwe ku Middle East ilyakalembedwe zina lya Ponto Pilato.

Ba Mwiinga: Oowo, tandinaamvwide makani aaya.

Ba Muchimba: Cabota kuti mwaazyiba lino.

Ba Mwiinga: Kwaamba masimpe, kuzwa kaindi ndali kulilemeka Bbaibbele mbuli mabbuku aambi, pele kunyina nondali kuyeeya kuti lilagwasya mazuba aano. Inzya, inga kalijisi makani aaluzi aakaindi, pele tandisyomi kuti lilakonzya kubagwasya bantu mazuba aano.

Ba Muchimba: Bantu banji balakonzya kukazumina kaambo aaka. Pele mebo tandiyeeyi boobo pe. Ncindaambila boobu ncakuti: Zintu nzyotuyandika mubuumi kunyina nozyacinca kuzwa kumatalikilo. Mucikozyanyo, lyoonse tuyandika cakulya, zyakusama alimwi aakoona. Lyoonse tulayandisya kubandika abeenzuma alimwi tulayanda kukkomana mumukwasyi. Sena taali masimpe kuti toonse tulaziyanda zintu eezyi?

Ba Mwiinga: Inzya tulaziyanda.

Ba Muchimba: Bbaibbele lilakonzya kutugwasya mumbazu zyoonse eezyi. Nkakaambo kaako ncotukonzya kulyaamba kuti ndibbuku lyakaindi pele lilagwasya mazuba aano.

Ba Mwiinga: Ino mupandulula nzi?

Ba Muchimba: Andaambe boobu: Ibbaibbele lilijisi makani aagwasya mazuba aano mbubonya mbwaakali kugwasya ciindi naakalembwa myaanda yamyaka yainda.

Ba Mwiinga: Eena! Pele ino ligwasya mumbazu nzi?

Ba Muchimba: Caboola kumakani aajatikizya kwaalanga munzila yeelede mali, kukkomana mumukwasyi naa kuba mulongwe uuli kabotu, njiisyo zyamu Bbaibbele zilakonzya kutugwasya. Bbaibbele lili mbuli maapu iitutondezya nzila njotweelede kutola kutegwa tusike nkotuya. Mucikozyanyo, sena tamuzumini kuti mazuba aano cilakatazya kumulumi kweendelezya kabotu mukwasyi wakwe kali silutwe wamukwasyi?

Ba Mwiinga: Inzya, oobo mbomwaamba mbombubo. Kwainda mwaka omwe kuzwa ciindi notwakakwatana amukaintu wangu, pele ndajana kuti lyoonse tacili cuuba-uba kuzuminana mutwaambo.

Ba Muchimba: Masimpe aayo. Pele Bbaibbele lilijisi njiisyo zibotu zigwasya. Mucikozyanyo, atulange-lange makani aajanika mulugwalo lwa Baefeso caandaano 5. Lino atubale tupango 22, 23 alimwi a 28. Sena inga mwatubala tupango ootu?

Ba Mwiinga: Inzya. Twaamba kuti: “Bakaintu kabalibombya kubalumi babo mbuli mbobacita ku Mwami, nkaambo mulumi ngomutwe wamukaintu wakwe mbubonya Kristo mbwali mutwe wambungano, mbwaanga ngomufwutuli wamubili ooyu.” Mpoonya kapango 28 kaamba kuti: “Munzila njiyona eeyi balumi abalo beelede kuyanda bakaintu babo mbuli mbobayanda mibili yabo beni. Mwaalumi uuyanda mukaintu wakwe ulaliyanda mwini.”

Ba Muchimba: Twalumba, mwabala kabotu. Ikuti banabukwetene basoleka kulutobela lulayo oolu mubuumi bwabo, sena mukwasyi wabo taukonzyi kukkomana?

Ba Mwiinga: Inzya, ndisyoma kuti inga bakkomana, pesi ndiyeeya kuti eeco ncuuba-uba buyo kwaamba, kucita cilakatazya.

Ba Muchimba: Masimpe, taakwe muntu uulondokede. Mane buya mucaandaano nciconya eeci camu Bbaibbele kuli kapango katukulwaizya kuba bantu banyoneka. * Mucilongwe cili coonse cilayandika kuzilanga kabotu zintu alimwi akunyoneka. Mebo amukaintu wangu twajana kuti Bbaibbele lilakonzya kutugwasya kuzilanga kabotu zintu.

Ba Mwiinga: Masimpe, eeco inga cagwasya.

Ba Muchimba: Bakamboni ba Jehova balijisi webbusaiti iijisi makani mabotu kujatikizya cikwati alimwi abuumi bwamumukwasyi. Sena inga mwandizumizya kuti ndimutondezye mubufwaafwi makani aajanika mumo?

Ba Mwiinga: Cili buyo kabotu. Inga mwanditondezya.

Ba Muchimba: Cabota. Kkeyala ya Webbusaiti ngu www.pr418.com. Ndeeli peeji lyamatalikilo.

Ba Mwiinga: Ma! Zifwanikiso eezyi nzibotu!

 Ba Muchimba: Eezyi nzibeela-beela zitondezya bukambausi bwesu bucitwa nyika yoonse. Aha, mpaawa ndaajana. Aawa kuli cibeela cakuti “Lugwasyo Kubanabukwetene Akubazyali.” Ansi akatwe aaka, kuli zibalo zifwaafwi-fwaafwi izitondezya bukkale busiyene-siyene. Sena kuli camukkomanisya?

Ba Mwiinga: Inzya. “Mbomukonzya Kuleka Kubikkilila.” Inga ndayanda kuzyiba mbondikonzya kucileka kucita boobo.

Ba Muchimba: Cibalo eeci cilapa nzila zyone izikonzya kumugwasya kutabikkilila. Amuswiilile ncowaamba muncali ooyu. Sena inga mwayanda kuubala ba Mwiinga?

Ba Mwiinga: Inzya. Waamba kuti: “Kubikkilila kulakonzya kunyonganya lukwatano. Ino nkaambo nzi? Akaambo kakuti kunyonganya bube buyandika mulukwatano, nkokuti luyando alimwi akusyomeka.” Eelo kaka bupanduluzi oobu bwandibotela kapati!

Ba Muchimba: Ndalumba, mwabala kabotu. Mumuncali ooyu, kuli lugwalo lwa Baefeso 4:31. Amutyanke aali lugwalo kutegwa mubale.

Ba Mwiinga: Oowo, lwaamba kuti: “Amuzisowe zintu zyoonse eezyi, kulutila, bukali, kunyema, kubwenta alimwi amajwi aakusampaula antoomwe abubi buli boonse.”

Ba Muchimba: Sena mwazibona zilengwa zimwi zibi naa bube mbotweelede kutantamuka?

Ba Mwiinga: Inzya. Tweelede kukutantamuka kulutila alimwi abukali?

Ba Muchimba: Masimpe kuti zimwi ziindi tulanyema, pele sena muyeeya kuti cikwati inga cazumanana ikuti mulumi naa mukaintu kabikkilila yooyo ngwakwetene limwi?

Ba Mwiinga: Peepe.

Ba Muchimba: Sena tamuzumini kuti, ikuti mulumi amukaintu bacileka cilengwa cakubikkilila, nkokuti cikwati cabo ciyooyuma?

Ba Mwiinga: Aayo masimpe.

Ba Muchimba: Aboobo nokuba kuti kapango aaka kakalembwa myaka iitandila ku 2,000 yainda, kalakonzya kubagwasya banabukwetene ikuti bakatobela.

Ba Mwiinga: Kwaamba masimpe, Bbaibbele lilijisi makani manji kwiinda mbondali kuyeeya.

Ba Muchimba: Ba Mwiinga, ndakkomana kumvwa boobo. Inga ndayanda kuti tukabonane alimwi kutegwa ndikamvwe mbomuyeeya kujatikizya katwe aaka kakuti, “Ncomukonzya Kucita,” ikajanika mucibalo nciconya eeci cili a Webbusaiti. *

Ba Mwiinga: Cili kabotu. Mebo amukaintu wangu tuyakwaabala makani aaya antoomwe.