MAKANI AAKULUULA
Meso Aaba Jairo—Mbwaabagwasya Kubelekela Leza
Amweezyeezye kuti mubili wanu woonse ulilebukide kunze buyo lyameso aanu. Oobo mbwabede mwanookwesu Jairo. Nokuba boobo, ulikkomene kupona buumi bulaampindu. Nonditanapandulula ikaambo ncakkomene mubuumi bwakwe, amuleke ndimulwiide kujatikizya buumi bwakwe.
Jairo wakazyalwa kajisi bulwazi bwakubongo (cerebral palsy) ibwiitwa kuti spastic quadriplegia. * Akaambo kabulwazi oobu, taakwe ncakonzya kulicitila. Bongo bwakwe tabukonzyi kubelekela antoomwe amilambi, aboobo zimwi ziindi ulabbubba cakuti tajatiki pe. Alimwi akaambo kakuti ulabbubba cakutayeeyela, inga cipa kuti alicise. Ikuti bantu balaafwaafwi tiibacenjela, abalo balakonzya kulicisa. Pele cuusisya ncakuti, kanji-kanji maanza aakwe alimwi amaulu ayandika kwaangililwa kukacinga kakwe kutegwa kutabi ntenda zili boobo.
KUPONA BUUMI BUKATAZYA KAPATI KUZWA KUBWANA
Mbwaakali buyaabukomena Jairo, bulwazi bwakwe bwakali kuyaabwiindila kucisa. Naakali amyezi yotatwe yakuzyalwa, wakatalika kusuntuka. Kanji-kanji bamaama bakali kumujatisya akubalikila kucibbadela kabayeeya kuti wafwa.
Akaambo kakuti bakali kumujatisya, mukuya kwaciindi mafwuwa aa Jairo akoongomana. Naakali amyaka iili 16, wakagwejuka kasolo calo cakapa kuti ayandike kwaandulwa mucibelo, mucibuno alimwi amukasolo. Ndiciyeeyede Jairo mbwaakali kulila lyoonse masiku akaambo kakucisa kwazilonda.
Kulemana kwa Jairo kupa kuti kacitilwa buya zintu zyoonse, mbuli kulisyigwa, kusamikwa alimwi akulazikwa. Bunji bwaziindi, bamaama abataata mbebacita milimo eeyi. Nokuba kuti Jairo uyandika kugwasyigwa lyoonse, bazyali besu balamuyeezya lyoonse kuti buumi bwakwe buyeeme aali Leza ikutali buyo abantu.
NZILA YAKUBANDIKA YAJANIKA
Bazyali besu Mbaakamboni ba Jehova, aboobo kuzwa ciindi Jairo naakali muvwanda bakali kumubalila makani aamu Bbaibbele. Lyoonse bakalizyi kuti buumi buba ampindu kapati lilikke kuti umwi kajisi cilongwe a Leza. Nokuba kuti Jairo wakali kusuntuka cakwiinduluka-induluka, wakali kukonzya kuba abulangizi businizyide bwakumbele. Pele bazyali bangu bakali kudooneka naa Jairo ulakonzya kukateelela kasimpe kamu Bbaibbele.
Buzuba bumwi, Jairo naakacili mwana, Bataata bakamwaambila kuti, “Kwaambaula kaka Jairo!” Mpoonya bakayungizya kwaamba kuti, “Ikuti kondiyanda ncobeni, ulaambaula!” Bataata nobakacili kumukombelezya kuti aambe noliba bbala lyomwe buyo, misozi yakeenda kumeso aa Jairo. Nokuba kuti wakasoleka kuti aambe mbwaakali kulimvwa, wakali kwiile kubbabbausya kwaamba. Bataata bakausa kapati akaambo kakuti bakapa kuti Jairo alile. Pele eeco cakatondezya buyo kuti Jairo wakacimvwa Bataata ncobakaamba. Penzi lyakali lyakuti tanaakali kukonzya kwaambaula.
Kakutanainda ciindi cilamfwu, bazyali besu bakazyiba kuti Jairo wakali kweenzya meso aakwe cakufwambaana kutondezya kuti kuli ncayanda. Cakali kumucima kapati Jairo akaambo kakwaalilwa kwaamba mbwalimvwa. Pele bazyali bangu nobakazyiba mbwaakali kwaacita meso kutondezya kuti kuli ncayanda, mpoonya akumupa ncico, Jairo wakali kuboneka kubusyu kuti wabotelwa. Kulinguwe kucita boobo yakali nzila yakwaamba kuti ndalumba.
Syaazibwene umwi mumakani aajatikizya kubandika wakapa muzeezo wakuti, kutegwa kube kubandika kubotu, tweelede kwiimika maanza oonse obilo mujulu ciindi notuyanda kuti aingule mubuzyo uuyanda bwiinguzi bwakuti iiyi naa peepe. Kwiimika janza lyalulyo caamba kuti iiyi, janza lyalumwensi caamba kuti peepe. Aboobo, wakali kukonzya kutondezya ncayanda kwiinda mukugamika meso aakwe kujanza lyeelede.
ZINTU ZIBOTU IZYACITIKA MUBUUMI BWA JAIRO
Bakamboni ba Jehova balacita miswaangano mipati ziindi zyotatwe amwaka, ooko makani aamu Bbaibbele nkwaapegwa kubantu banji kapati. Jairo wakali kubotelwa lyoonse ciindi makani aalubbapatizyo naakali kupegwa kuli basikubbapatizyigwa. Bumwi buzuba Jairo naakali amyaka yakuzyalwa iili 16, bataata bakamubuzya kuti: “Jairo, sena ulayanda kubbapatizyigwa?” Cakutawayawaya wakalanga janza lyalulyo lyaba Taata kutondezya kuti wakali kuyanda kubbapatizyigwa. Mpoonya bataata bakayungizya kwaamba kuti, “Sena wakamusyomezya Leza mumupailo kuti uyanda kumubelekela buumi bwako boonse?” Alimwi Jairo wakainduluka kulangisisya janza lyalulyo lyaba Taata. Aboobo cakalisalede kuti Jairo wakalilyaabide kale kuli Jehova.
Nobakamana kwiiya Bbaibbele ziindi zili mbozibede, cakalibonya kuti Jairo wakalumvwisya ncolwaamba lubbapatizyo lwa Bunakristo. Aboobo, mu 2004 wakaingula mubuzyo uuyandika ngwaakabuzyigwa wakuti, “Sena walyaaba kuli Leza kuti ucite kuyanda kwakwe?” Jairo wakawiingula mubuzyo ooyu kwiinda mukulanga mujulu. Oobu mbobubambe bwakwe ibwakabikkidwe bwakwiingula kuti iiyi. Aboobo, kali amyaka iili 17 wakabbapatizyigwa akuba umwi wa Bakamboni ba Jehova.
MESO AMUGWASYA KUBIKKILA MAANO KUZINTU ZYA LEZA
Mu 2011, kwakajanika nzila mpya yakagwasya Jairo kubandika—ooyu muncini wakkompyuta iweendelezyegwa ameso. Ikuti meso waalanzya asikkilini yakkompyuta, yalo ilazyiba eelyo ilatondezya tudomwi asikkilini. Naa wakalanga kadomwi nkayanda naa kulaba alinkako, cili mbuli kutyanka kanwe aakkompyuta. Kkompyuta eeyi iijisi tufwanikiso alimwi amabala aayendelana atufwanikiso ooto, yakabambwa kutegwa imugwasye Jairo kubandika. Ikuti naa wakalanga komwe akulaba alinkako, pulogilamu yamu kkompyuta ipa kuti mabala aayo aalembedwe aakafwanikiso amvwike kuba majwi.
Mbolwakali kuyaabuvwula luzyibo lwa Jairo kujatikizya Bbaibbele, alwalo luyandisisyo lwakuyanda kugwasya bantu kuzyiba Leza lwakavwula. Ciindi notwiiya Bbaibbele mumukwasyi nsondo ansondo, kanji-kanji inga ulandilanga alimwi akulanga akkompyuta yakwe cakwiinduluka-induluka. Eeyi nenzila njabelesya kundiyeezya kuti ndeelede kulemba twaambo ntwayoobelesya kupa bwiinguzi muzibeela zyakubuzya akwiingula lyamiswaangano yesu yambungano ya Bunakristo.
Twanooli kumiswaangano, ulalanga-langa asikkilini cakukkazika moyo kutegwa alabe aawo aali kadomwi kajisi bwiinguzi bwakwe. Acita boobo, kkompyuta ilaasandula mabala aayo kuti abe majwi kutegwa bantu boonse baamvwe. Ciindi coonse apa bwiinguzi ulamweta-mweta kapati abalo basimbungano balakulwaizyigwa. Alex, umwi wabeenzinyina ba Jairo wakaamba kuti: “Lyoonse cilandikkomanisya kumvwa bwiinguzi bwa Jairo nokuli mubandi wamu Bbaibbele.”
Jairo ubelesya kkompyuta yakwe yeendelezyegwa ameso aakwe kutegwa ape bwiinguzi lyamiswaangano alimwi akukambaukila bamwi kujatikizya nzyasyoma
Kuyungizya waawo, Jairo ubelesya meso aakwe kwaambila bamwi kujatikizya nzyasyoma. Nzila imwi mbwacita oobo nkwiinda mukulanga cifwanikiso cili asikkilini icitondezya muunda uujisi banyama alimwi abantu bamisyobo yoonse ibali muluumuno. Ikuti wacita boobo, kkompyuta yakwe yaamba majwi aakuti, “Cisyomezyo ca Leza ncakuti nyika iyooba paradaiso oomo mutakabi limbi kuciswa alimwi alufwu, Ciyubunuzyo 21:4.” Ikuti naa muntu ngwabandika limwi watondezya luyandisisyo, Jairo ulalanga akulaba akadomwi akamwi ikapa kkompyuta yakwe kwaamba kuti, “Sena inga mwayanda kwiiya Bbaibbele andime?” Cigambya ncakuti basyaanene bakazumina ciiyo ca Bbaibbele. Eelo kaka cilakkomanisya kubona Jairo asyoonto-syoonto kayiisya basyaanene Bbaibbele kwiinda mukugwasyigwa a Kamboninyina! Makani aakkomanisya ngakuti, basyaanene bakabbapatizyigwa lyamuswaangano wacooko ku Madrid mu August 2014.
Kucikolo nkwaiya, bamayi balamulumbaizya Jairo akaambo kabusungu mbwajisi kubelekela Leza. Ba Rosario, umwi wabasyaazibwene mumakani aakwaambaula, cimwi ciindi bakaamba kuti: “Ikuti naa ndayanda kutalika kukomba, inga ndaba umwi wa Bakamboni ba Jehova. Ndabona lusyomo lwa Jairo mbolwamupa kuba ampindu mubuumi, nokuba kuti uli mubukkale bukatazya.”
Lyoonse Jairo ulakkomana kapati ikuti ndamubalila cisyomezyo camu Bbaibbele cakuti: “Mulema uyoosotauka mbuli insya, awalo mulaka wasyaataambi uyakoongolola cakukondwa.” (Isaya 35:6) Nokuba kuti zimwi ziindi ulatyompwa, bunji bwaziindi inga ulikkomene. Ulikkomene akaambo kakuti ulagwasyigwa a Leza alimwi abeenzinyina Banakristo. Lukkomano ndwajisi alimwi alusyomo lwakwe ncitondezyo cakuti kubelekela Leza kupa kuti buumi bube ampindu nokuba kuti bukkale bulakatazya.
^ par. 5 Celebral palsy (CP) kanji-kanji ndibbala libelesyegwa kupandulula kunyonyooka kwabongo ikupa kwaalilwa kucita zintu. Bulwazi oobu alimwi bulakonzya kupa muntu kusuntuka, kutayanda kulya alimwi akutaambaula kabotu. Bulwazi bwa Spastic quadriplegia mbobwiinda kucisa akati kamisyobo yamalwazi aa Celebral palsy; bulakonzya kupa kuti maanza amaulu kaayuminina alimwi akupa nsingo kulebuka.
