Ndakakomenena mu Ancram, mudolopo lisyoonto lyamu New York, U.S.A. Bunji bwamafaamu mudolopo eeli mwakali kuvwubwa ŋombe zyamukupa. Alimwi buya ŋombe nzizyakali zinji kwiinda bantu.

Bamukwasyi wangu bakali kuunka kucikombelo comwe buyo icakali mudolopo. Lyoonse mu Nsondo kuseeni, basyanene bakali kundipolisyila mabbusu, mpoonya ndakali kuunka ku Sunday school kandijisi aka Bbaibbele kasyoonto katuba nkobakandipa banene. Mebo abasyoonto bangu twakayiisyigwa kubeleka canguzu, kulemeka basimukoboma akubagwasya, alimwi akulumba akaambo kazileleko nzyotujisi.

Nindakakomena, ndakazwa aŋanda yabazyali bangu akuba mwiiyi. Ndakajisi mibuzyo minji kujatikizya Leza alimwi akaambo ncotuponena. Basicikolo bamwi mbondakali kuyiisya bakali basongo. Bamwi tiibakali basongo, pele bakali kubeleka canguzu. Bamwi bakali balema, kakuli bamwi bakali buyo kabotu. Ndakali kubona kuti eeci tiicakaliluleme pe. Zimwi ziindi bazyali babana aabo ibatakali basongo naa balemene bakali kwaamba kuti, “Oobu Leza mbwayanda kuti mwanaangu abe mbubo.” Ndakali kulibuzya ikaambo Leza ncazumizyila kuti bana bamwi bazyalwe kabalemene, kakuli kunyina cibi ncobakacita.

Alimwi ndakali kulibuzya kuti, ‘Ino ncinzi ncondikonzya kucita mubuumi bwangu cikonzya kugwasya?’ Ndakali kulimvwa kuti buumi bwangu mbufwaafwi. Ndakakomenena mumukwasyi uuli kabotu, ndakaunka kuzikolo zili kabotu, alimwi ndakali kubeleka mulimo ngondakali kuyanda. Pele buumi bwangu bwakanyina mpindu. Ndakali kulombozya kukwatwa, kuba aŋanda mbotu alimwi akuba abana, kuzumanana kubeleka kusikila ndacita litaya, mpoonya akuyookkala kuŋanda nkobalanganya bacembeede. Ndakali kulibuzya naa kuli azimbi ziinda waawa.

Bumwi buzuba, ndakaunka kuyooswaya ku Europe abamayi mbotwakali kuyiisya limwi. Twakaunka ku Westminster Abbey, Notre-Dame de Paris, aku Vatican alimwi akuzikombelo zinji zisyoonto-syoonto. Kufwumbwa nkondakali kuunka, ndakali kwiibuzya mibuzyo yangu. Nindakapiluka kuŋanda ku Sloatsburg, New York, ndakaunka kuzikombelo zinji. Pele kunyina wakandipa bwiinguzi bukkazika moyo.

 Bumwi buzuba, sicikolo umwi iwakali aamyaka iili 12 yakuzyalwa wakandisikila akundibuzya mibuzyo yotatwe. Cakusaanguna, wakandibuzya naa ndakalizyi kuti wakali umwi wa Bakamboni ba Jehova. Ndakati inzya, ndilizyi. Cabili, wakandibuzya naa ndakali kuyanda kuzyiba zinji kujatikizya Bakamboni ba Jehova. Alimwi ndakaingula kuti inzya, ndilayanda. Catatu, wakandibuzya nkondikkala. Nindakamwaambila kkeyala yangu, kwakajanika kuti, ani ndakali kukkala afwaafwi amukwasyi wabo. Tiindakazyi kuti mibuzyo eeyi yotatwe njaakandibuzya mwana musimbi ooyu yakali kuyoocinca buumi bwangu.

Tiikwakainda ciindi, wakaboola kuŋanda ancinga yakwe mpoonya wakatalika kundiyiisya Bbaibbele. Ndakamubuzya mibuzyo njondakali kubuzya basololi bazikombelo banji. Mukwiimpana ambabo, walo wakanditondezya bwiinguzi busalede alimwi bulimvwisya mu Bbaibbele lyangu—ibwiinguzi mbondatakalinabwene!

Nzyondakaiya mu Bbaibbele zyakandikkomanisya kapati alimwi zyakandipa kukkutila. Ndakakulwaizyigwa kapati ciindi nindakabala lugwalo lwa 1 Johane 5:19, ilwaamba kuti: “Nyika yoonse ili mumaanza aamubi.” Ndakakatalusyigwa nindakayiya kuti tali Leza pe uuleta mapenzi oonse ngotubona, pele ngu Saatani—alimwi akuti Leza uyoozibambulula zintu. (Ciyubunuzyo 21:3, 4) Ndakajana kuti zintu nzyolyaamba Bbaibbele zilamvwika kapati ikuti zyapandululwa munzila iilimvwisya. Nokuba kuti Kamboni iwakali kundiyiisya Bbaibbele wakali buyo amyaka yakuzyalwa iili 12, ndakazyiba kuti kasimpe nkasimpe, tacikwe makani aciimo camuntu wakuyiisya.

Nokuba boobo, ndakali kuyanda kubona naa Bakamboni balazicita nzyobakambaukila bantu. Mucikozyanyo, ooyu mwana musyoonto wakakankaizya kuti Banakristo bakasimpe balatondezya bube bubotu mbuli kukkazika moyo alimwi aluzyalo. (Bagalatiya 5:22, 23) Ndakayanda kuti ndimusunke kutegwa ndibone naa ulibujisi bube oobu. Bumwi buzuba mbotwakabikkide kuti katwiiya, ndakamuka acaali kusika aŋanda. Ndakali kulibuzya kuti: ‘Sena ulandilindila mane ndisike? Ikuti naa ulandilindila, sena ulanyema akaambo kakuti ndamuka?’ Nindakanyona kuzwa mumugwagwa kuya aŋanda yangu, ndakamubona kakkede aŋanda yangu kandilindila. Wakazuzila kumootokala wangu akwaamba kuti: “Ndali kuyanda kuunka kuŋanda kuyakwaambila bamaama kuti tutume fooni kucibbadela akupolisi kutegwa tumvwe naa muli kabotu, nkaambo lyoonse tamumuki kusika aŋanda kutegwa twiiye. Ndalilibilikide kapati!”

Cimwi ciindi, ndakabuzya mubuzyo ngondakali kuyeeya kuti mwana uuli aamyaka iili 12 takonzyi kuwiingula. Ndakali kuyanda kubona naa ulaamba buyo zyamumutwe wakwe. Nindakamubuzya mubuzyo, wakandilangisisya akwaamba kuti: “Ooyu mubuzyo muyumu. Ndilaulemba kutegwa ndikababuzye bazyali bangu.” Cikkomanisya ncakuti, naakaboola alimwi kuti twiiye, wakaletelezya amagazini ya Ngazi Yamulindizi iyakajisi bwiinguzi bwamubuzyo wangu. Eeci ncecakapa kuti nditalike kubayanda Bakamboni—nkaambo mabbuku aabo akandipa bwiinguzi bwamu Bbaibbele kumibuzyo yangu yoonse. Ndakazumanana kwiiya amwana musimbi ooyu, mpoonya nokwakainda mwaka omwe ndakabbapatizyigwa akuba umwi wa Bakamboni ba Jehova. *

Nindakajana bwiinguzi bukkazika moyo kumibuzyo yangu, ndakayanda kwaambila bantu nzyondakali kwiiya. (Matayo 12:35) Kumatalikilo, bamukwasyi wangu tiibakali kubuyanda bukombi bwangu bupya. Pele mukuya kwaciindi, bakabomba. Bamaama kabacipona, bakatalika kwiiya Bbaibbele. Nokuba kuti bakafwa kabatana kubbapatizyigwa, ndili masimpe kuti bakasalide kumubelekela Jehova.

Mu 1978, ndakakwatwa kuli Kamboni wazina lya Elias Kazan. Mu 1981, mebo aba Elias twakatambwa kuti tukabelekele ku Beteli * yaku United States. Cuusisya ncakuti, notwakabeleka buyo kwamyaka yone, ba Elias bakazimina. Nokuba kuti ndakali mukamufwu, ndakazumanana kubelekela a Beteli, calo icakapa kuti ndibikkile maano kumulimo ngondakali kucita alimwi ndakaumbulizyigwa kapati.

Mu 2006, ndakazookwatwa kuli ba Richard Eldred, mukwesu ngotwakali kubeleka limwi mumukwasyi wa Beteli. Mebo aba Richard tucizumanana acoolwe cakubelekela a Beteli. Akaambo kakuzyiba kasimpe kajatikizya Leza, mubwini ndilimvwa kuti tiindajana buyo bwiinguzi mbondakali kuyandaula, pele alimwi ndazyiba kaambo ncotuponena—zyoonse eezyi zyakatalika kwiinda mumibuzyo yotatwe njaakandibuzya mwana musimbi.