Ndakakomenena mudolopo lya Montreal oomo buumi mobwakali buyumu citaambiki. Nindakali amyezi iili cisambomwe yakuzyalwa, bataata bakafwa, aboobo mikuli yoonse yaaŋanda yakasyaalila bamaama. Twakazyalwa katuli 8 mumukwasyi wesu, mebo ndendime keela.

Nondakali kuyaabukomena, lyoonse ndakali kubelesya misamu iikola, kuuma njuka, kulwana, alimwi akuyanzana azigwebenga. Kandili amyaka iili 10, ndakatalika kubacitila makwebo bavwuule alimwi akukweletesya kaloba. Kanji-kanji ndakali kubeja alimwi ndakali kunonezyegwa kuunina bantu munzila yabumpelenge. Eeci cakandibeda cizibilizi cipati.

Nindakaba amyaka iili 14, ndakazyiba nzila zinji kapati zyakucenga bantu. Mucikozyanyo, ndakali kooda nkoloko, mabbango, alimwi anweenwe ziziluludwe angolida, akuzilemba kuti ningolida iini-ini. Mpoonya ndakali kuzisambala mumugwagwa alimwi amumasena aakusiila myootokala aamumantoolo mapati. Cakali kundikonda kupanga mali munzila ngubauba. Buzuba bumwi ndakapanga mali aasika ku $10,000!

Nindakatandwa kucikolo kandili aamyaka iili 15, ndakabula kwakukkala. Ndakali koona mutuzila, mumapaaki, naa mumaanda aabeenzuma.

Akaambo kamilimo yangu yabumpelenge, kanji-kanji ndakali kubuzyigwa-buzyigwa abamapulisa. Mbwaanga tiindakali kusambala zintu zyakubba, kunyina nondakaangidwe pe. Nokuba boobo, ziindi zinji ndakali kubbadelesyegwa mali manji akaambo kabumpelenge, kwaamba zyakubeja, alimwi akusambala zintu kakunyina kuzumizyigwa amulawo. Kakunyina kuyoowa muntu uuli woonse, ndakali kuunka kuyoosesa mali aabasikukweletesya kaloba. Kucita boobu kwakali kundibikka muntenda mpati kapati, aboobo zimwi ziindi ndakali kweenda antobolo. Zimwi ziindi ndakali kucita zintu akabunga kazigwebenga.

Nondakali amyaka iili 17, nceciindi cakusaanguna nondakamvwa makani aajatikizya Bbaibbele.Ndakali kukkala amusimbi wangu ciindi naakatalika kwiiya Bbaibbele a Bakamboni ba Jehova. Pele mebo tiindakali kuziyanda nzyolyakali kwaamba Bbaibbele kujatikizya kulilemeka, aboobo  ndakamusiya akuunka kuyookkala amusimbi uumbi ngondakasyabide.

Ndakacinca mbondakali kuzibona zintu ciindi musimbi wangu wabili awalo naakatalika kwiiya a Bakamboni! Musimbi wangu wakatalika kucinca bukkale bwakwe, aboobo eeco cakandikkomanisya kapati nkaambo wakatalika kuba amoyo mubombe alimwi akukkazika moyo. Aboobo, bumwi buzuba ndakazumina kuunka kuyooswaangana ku Ŋanda ya Bwami ya Bakamboni ba Jehova. Nondakasika ookuya, bakanditambula kabotu, alimwi bantu aaba bakali aabulemu alimwi alubomba. Eelo kaka eeci cakaliindene kapati abantu mbondakazyibide! Taakwe ciindi nondakalimvwa kubikkilwa maano abamukwasyi wangu; ndakali kulimvwa kutayandwa alimwi akutafwidwa lubomba kuzwa kubwana. Kubikkilwa maano nkondakalimvwa akati ka Bakamboni ba Jehova, nkonkuko nkondakali kuyandisisya. Kamboni umwi naakandilomba kuti kandiiya Bbaibbele anguwe, ndakazumina cakutasowa ciindi.

Ndiyeeya kuti nzyondakali kwiiya mu Bbaibbele, zyakandivwuna. Ndakajisi makanze aakuyoobba abeenzuma bobilo kutegwa ndikabbadele zikwelete nzyondakajisi kunjuka, izyakali kwiinda ku $50,000. Eelo kaka ndilikkomene kuti tiindakabasangana! Beenzuma balo bakazumanana kuunka kuyoobba. Umwi wakaangwa, mpoonya umwi wakajaigwa.

Nondakali kuyaabuzumanana kwiiya Bbaibbele, ndakabona kuti ndakali kuyandika kucinca mumbazu zinji kapati. Mucikozyanyo, ndakaiya ncolyaamba Bbaibbele mulugwalo lwa 1 Bakorinto 6:10 ilwaamba kuti: “Babbi, basyaacivwulemwangu, bakolwi, basimatusi alimwi azigwebenga, tabakanjili mu Bwami bwa Leza.” Nindaakabala kapango aaka, kakandiyeezya kuvwula kwazibi nzyondakacitede mubuumi bwangu, eeci cakandipa kulila. Ndakabona kuti ndakali kuyandika kucinca bukkale bwangu cakumaninina. (Baroma 12:2) Ndakali sinkondo alimwi ndakali mukali, alimwi ndakali mubeji buumi bwangu boonse.

Nokuba boobo, ndakaiya alimwi mu Bbaibbele kuti Jehova ulaaluse alimwi ulalekelela. (Isaya 1:18) Ndakapaila kuzwa ansi aamoyo, ikukombelezya Jehova kuti andigwasye kuleka bukkale bwangu bwakaindi. Kwiinda mulugwasyo lwakwe, asyoonto-syoonto ndakatalika kucinca bukkale bwangu. Ntaamu mpati yakabwezegwa ciindi mebo amusimbi wangu notwakalembya cikwati cesu.

Nindakali aamyaka iili 24 alimwi kandikwete kandijisi abana botatwe, ndakeelede kujana mulimo uuli kabotu. Nokuba boobo ndakaiya buyo asyoonto, aboobo tiindakajisi mapepa aamulimo. Ndakapaila alimwi kuli Jehova. Kumane ndakaunka kuyooyandaula mulimo. Ndakali kubaambila basikulemba milimo kuti ndakali kuyanda kucinca bukkale bwangu akubeleka mulimo uuli kabotu. Zimwi ziindi ndakali kubaambila kuti ndilaiya Bbaibbele, akuti ndakali kuyanda kuba muntu uuli kabotu. Basikulemba milimo banji mbondakali kuyeeyela, bakakaka kundinjizya mulimo. Kumane nondakali kubuzyigwa-buzyigwa kuli sikulemba mulimo uumbi, ndakayubununa bukkale bwangu bwamapenzi mbondakali kupona kaindi, mpoonya sikubuzya-buzya ooyo wakati: “Tandizyi kaambo keni ncondazuminina kukunjizya mulimo, pesi kuli cindaambila kuti ndeelede kukunjizya.” Ndisyoma kuti oobu bwakali bwiinguzi kumipailo yangu. Mukuya kwaciindi, mebo abakaintu bangu twakabbapatizyigwa akuba Bakamboni ba Jehova.

Ndicipona asunu akaambo kakutobela njiisyo zyamu Bbaibbele alimwi akupona buumi bwa Bunakristo. Ndilijisi mukwasyi wangu uundigeme alimwi uukkomene. Akaambo kakuti ndilisinizyide kuti Jehova wakandilekelela, ndilikkomene kuba amanjezeezya aasalala.

Myaka iili 14 yainda ndali kubeleka mulimo waciindi coonse, ikugwasya bantu kwiiya ncoliyiisya Bbaibbele, alimwi caino-ino, bakaintu bangu bakandisangana mumulimo ooyu. Kwamyaka iili 30 yainda, ndaba alukkomano lwakugwasya babelesima ibali 22 kuti abalo batalike kukomba Jehova. Mazuba aano ndicuunka kumantoolo mapati—pele tanduunkili kuyoobbida bantu mbuli mbondakali kucita kaindi. Lino ciindi nonduunka ookuya, kanji-kanji ndilabaambila bamwi nzyondisyoma. Ndiyanda kubapa cintu cimwi: nkokuti kubapa bulangizi bwakuyoopona munyika mpya oomo mutakabi bantu baunina beenzinyina.—Intembauzyo 37:10, 11.