Maziyo akali kubelesyegwa kuziya maila kupanga fulaulu wakupangisya zinkwa. Kucita boobu wakali mulimo wabuzuba abuzuba wabamakaintu naa babelesi mumukwasyi uuli woonse. Kaindi, kumvwa kulila kwaziyo tiicakali ceenzu.—Kulonga 11:5; Jeremiya 25:10.

Zyakuzekaula izyakazwa ku Egepita wansiku zilatondezya mbolyakali kubelesyegwa ziyo. Maila akali kubikkwa aziyo. Sikuziya wakali kufwugama munsi-munsi aaziyo kajisi bbwe lisyoonto ilyakali kubelesyegwa kuziya. Kweelana abbuku limwi, ibbwe eeli lisyoonto lyakali kulema makkilogilamu obilo naa one. Ikuti lyabelesyegwa kuba cilwanyo, ibbwe eeli lyakali kukonzya kujaya muntu.—Babetesi 9:50-54.

Kuziya maila kwakali kuyandika kapati kumukwasyi cakuti mulawo wamu Bbaibbele wakali kukasya kunyanga muntu ziyo kacili cijatilizyo. Lugwalo lwa Deuteronomo 24:6 lwaamba kuti: “Kunyina weelede kunyanga umwi ziyo naa mwanaankando kuti cibe cijatilizyo, nkaambo cili mbuli kumunyanga buumi bwakwe kuti bube cijatilizyo.”

Ibbaibbele lyaamba kuti Jesu uli “kucamba ca Usyi.” (Johane 1:18, bupanduluzi buyungizyidwe) Mabala aaya atondezya cilongwe caalubazu Jesu ncajisi a Leza. Majwi aaya aamba cilengwa ncobakali kuccilila ba Juda ciindi nobakali kulya.

Mumazuba aa Jesu, ba Juda bakali kukkala kabazingulukide tebulu lyakulida. Mutwe wamuntu umwi aumwi wakali afwaafwi atebulu pele maulu aakwe akali kulamfwu, kumane wakali kuyaamika kakokola kakwe kakulumwensyi acilitulisyo. Eeci cakali kupa kuti janza lyakwe lyalulyo kalyaangulukide. Mbwaanga bantu boonse bakali kuyaamika tukokola twakulumwensyi kabatobelene, “mutwe wamuntu umwi aumwi wakali afwaafwi acamba cayooyo iwakakkede kusyule lyakwe, aboobo wakali kwaambwa kuti ukkede acamba camuntu ooyo,” kweelana ambolyaamba bbuku limwi.

Kukkala acamba casilutwe wamukwasyi naa mukamwini pobwe cakali coolwe caalubazu. Aboobo, a Pobwe Lyakwiindilila lyamamanino lya Jesu, “sikwiiya ngwaakali kuyandisya Jesu,” wazina lya Johane, wakayeeme acamba ca Jesu. Aboobo Johane “wakayaama acamba ca Jesu” akumubuzya mubuzyo.—Johane 13:23-25; 21:20.