Ndakazyalilwa mu Paddington, busena bujisi bantu banji bwaku London mu England. Ndakali kukkala abamaama alimwi abapati bangu basimbi botatwe. Bataata bakali acilengwa cakutusiya aŋanda alimwi akuboola kwainda ciindi akaambo kakuciindizya kunywa bukoko.

Nondakacili mwana musyoonto, bamaama bakandiyiisya kupaila masiku lyoonse. Ndakajisi ka Bbaibbele kasyoonto ikakajisi buyo Intembauzyo, alimwi ndakapanga matyuni kutegwa kandikonzya kwiimba Intembauzyo. Ndilayeeya kubala majwi amwi mubbuku limwi lyakunyika alo aakandijila kapati mumizeezo aakuti: “Bumwi buzuba buumi buyoogola.” Majwi aayo akali kundipa kuba acilabila masiku kuyeeya kujatikizya kumbele. Ndakali kulyaambauzya mumoyo, ‘Masimpe kweelede kuti nzinji zijatikizyidwe mubuumi. Nkaambo nzi ncondiponena?’ Tiindakali kuyanda kufwa!

Ndakatalika kuyanda kuzyiba kujatikizya mizimo. Aboobo ndakali kubandika abantu bafwide, kuunka kunamaumbwe abasicikoloma, alimwi akweebelela mafilimu aayoosya ambabo. Twakali kubona kuti cakali kukkomanisya alimwi aciindi nciconya cakali kuyoosya.

Ndakatalika kuzanga ciindi nondakajisi buyo myaka iili 10. Ndakatalika kufweba tombwe, alimwi tiilyaakalampa, kufweba cakaba cilengwa cangu. Mukuya kwaciindi, ndakatalika kufweba lubanje. Nondakajisi myaka iili 11, ndakatalika kunywa bukoko. Nokuba kuti tiindakali kukkomana mbobwakali kumvwika, pele ndakali kumvwa kabotu kukolwa. Alimwi ndakali kuziyanda nyimbo akuzyana. Ndakali kuunka kumapobwe alimwi akumasena aakunywida bukoko kufwumbwa nocakali kukonzyeka. Ndakali kuzwa muŋanda cakuyubaila masiku alimwi akujoka kubucedo. Kandikatede buzuba butobela, kanji-kanji ndakali kulovwa kucikolo. Ikuti naa ndaunka kucikolo, bunji bwaziindi ndakali kunywa bukoko nokuba kuti tulaiya.

Mumwaka wamamanino wakwiiya kucikolo ndakafeela kapati. Akaambo kakutazyiba bukkale bwangu bwabuzangi mpobwakasikide, bamaama bakatyompwa kapati alimwi akunyema. Twakazwangana, mpoonya ndakazwa aŋanda. Kwaciindi cili mbocibede, ndakali kukkala amusankwa wangu, Tony walo iwakali mu Rasita. Wakali situlandu-landu, wakali kusambala misamu iikola alimwi wakajisi mpuwo yakulwana kapati. Tiilyakalampa,  ndakamita kandijisi myaka iili 16, mpoonya ndakatumbuka mwana musankwa.

Ciindi cakusaanguna nondakwaswaangana a Bakamboni ba Jehova ndakali kukkala kumaanda aabamazyali bamakaintu ibatakwetwe antoomwe abana babo bavwanda. Bamfwulumende bakandipede luumu yakukkala kubusena ooku. Bamakaintu Bakamboni bobilo kanji-kanji bakali kuswaya bamakaintu bamwi ibakali kukkala kumaanda aaya. Buzuba bumwi ndakabasangana mumubandi ngobakajisi. Ndakajisi makanze aakubatondezya kuti nzyobakali kwaamba Bakamboni zyakali zyakubeja. Pele mibuzyo yangu yoonse bakayiingula cakukkazika moyo alimwi cakusalazya kwiinda mukubelesya Bbaibbele. Bakajisi luzyalo alimwi bakali babombe myoyo, calo icakandikkomanisya kapati. Aboobo ndakazumina kwiiya Bbaibbele ambabo.

Tiilyakalampa, ndakaiya cintu cimwi mu Bbaibbele icakacinca buumi bwangu. Kuzwa ciindi nondakali mwana, ndakali kukuyoowa kufwa. Pele lino ndakazyiba njiisyo ya Jesu kujatikizya bubuke! (Johane 5:28, 29) Alimwi ndakaiya kuti Leza wakali kundibikkila maano. (1 Petro 5:7) Ndakakulwaizyigwa kapati amajwi aali mulugwalo lwa Jeremiya 29:11, ilwaamba kuti: “‘Nkaambo ndiliizyi kabotu mizeezo njendiyeeya kujatikizya ndinywe,’ mbwaamba Jehova, ‘mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi.’” Ndakatalika kusyoma kuti ndilakonzya kuba abulangizi bwakupona kukabe kutamani mu Paradaiso anyika.—Intembauzyo 37:29.

Bakamboni ba Jehova bakanditondezya luyando lwini-lwini. Ciindi cakusaanguna nondakajanika kumiswaangano yabo, bube mbobakanditondezya bwakali kukulwaizya—boonse bakali balongwe! (Johane 13:34, 35) Oolo lwakali lwiindano lupati ndondakabona kweelana ambobakanditambula mucikombelo cimwi. Bakamboni bakanditambula kabotu nokuba kuti bukkale bwangu tiibwakali kabotu. Bakandibikkila maano, bakandilanganya alimwi buya akundipa lugwasyo lweelede. Ndakalimvwa mbuli kuti ndili mumukwasyi mupati uujisi luyando.

Muciiyo cangu ca Bbaibbele, ndakabona kuti ndakeelede kucinca mubuumi bwangu kutegwa ndisike azyeelelo zyakulilemeka zisumpukide zya Leza. Tiicakali cuuba-uba kuleka kufweba tombwe. Aciindi nciconya, ndakajana kuti nyimbo zimwi nzyondakali kuswiilila zyakali kundikulwaizya kufweba lubanje, aboobo ndakacinca nyimbo nzyondakali kuswiilila. Akaambo kakutayanda kukolwa, ndakacileka kuunka kumapobwe alimwi amumasena aakunywida bukoko kutegwa nditasunkwi. Alimwi ndakajana balongwe bapya balo ibakali kukonzya kundigwasya mubukkale bwangu bupya.—Tusimpi 13:20.

Kulubazu lumwi, awalo Tony wakali kwiiya Bbaibbele a Bakamboni ba Jehova. Ciindi Bakamboni nobakayiingula mibuzyo yakwe kwiinda mukubelesya Bbaibbele, awalo wakasyoma kuti nzyaakali kwiiya kakali kasimpe. Wakacinca kapati mubuumi bwakwe: wakaleka kuyanzana abalongwe bakwe bakaindi basinkondo, wakaleka kucita tulandu-landu, alimwi wakacileka kufweba lubanje. Kutegwa tumukkomanisye Jehova cakumaninina, twakabona kuti twakeelede kuleka bukkale bwesu bwakutalilemeka kutegwa mwana wesu akomene kabotu. Mpoonya twakakwatana mu 1982.

Ndilayeeya kandivwuntauzya zibalo mumamagazini aa Ngazi Yamulindizi alimwi a Sinsimuka! * izyakajisi makani aabantu ibakazwidilila ciindi nobakapanga kucinca nkondakali kuyanda kucita. Ndakakulwaizyigwa kapati akaambo kazikozyanyo zyabo! Ndakayumizyigwa kuzumanana kusoleka canguzu alimwi akutatyompwa. Ndakazumanana kupaila kuli Jehova kutegwa atandilekelezyi. Mebo aba Tony twakabbapatizyigwa kuba Bakamboni ba Jehova mu July 1982.

Kuba acilongwe a Jehova Leza kwakafwutula buumi bwangu. Mebo aba Tony twalibonena mbwagwasya Jehova mubukkale bukatazya. Twaiya kusyoma Leza muziindi zikatazya, alimwi tulimvwa kuti lyoonse wali kutugwasya akutujanina nzyotuyandika mumukwasyi.—Intembauzyo 55:22.

Ndilakukkomanina kugwasya mwana wesu musankwa alimwi amusimbi kutegwa bamuzyibe Jehova mbubwenya mbondimuzyi. Lino ndilimvwa kukkomana kubona bana babo abalo kabakomena muluzyibo lwa Leza.

Lino tandicijisi cilabila masiku kuyeeya kujatikizya kumbele naa lufwu. Mebo aba Tony tujisi bubi kuswaya mbungano zisiyene-siyene zya Bakamboni ba Jehova nsondo ansondo kubakulwaizya. Tulabasangana kuyiisya bamwi kuti, ikuti baba alusyomo muli Jesu, abalo balakonzya kuyookkomana kuba abuumi butamani.