Mumasi manji, kudula kwazintu kwapa kuti buumi bubayumine kapati bantu, kubikkilizya a Bakamboni ba Jehova. Pele muciindi cakulibilika, Bakamboni balaumbulizyigwa kuzyiba kuti Jehova ‘takabalekelezyi pe’ babelesi bakwe. (Bahebrayo 13:5) Cakwiinduluka-induluka, wali kucita kweelana acisyomezyo eeci. Wakacita oobo ku Philippines, mucisi mwalo bantu banji mobali bacete. Nokuba boobo, cakuma 1970 alimwi a 1980, zintu zyakaliyumide kapati mucisi eeci.

 Mucizyi umwi wazina lya Vicky a wakaamba kuti: “Zimwi ziindi ndakali kulila akaambo kakubula cakulya. Kuli ziindi notwakanyina cili coonse ccita buyo laisi, sautu alimwi ameenda.” Mukwesu wazina lya Florencio tanaakali kujana mulimo. Wakaamba kuti: “ndakajisi buyo masyaati otatwe amalukwe otatwe, alo ngondakali kusama lyamiswaangano yambungano ayabbazu.” Mbuti bantu ba Jehova mbobakaliyumya? Ncinzi cakabagwasya kuzumanana kuyuma kumuuya? Alimwi mbuti cikozyanyo cabo mbocikonzya kutugwasya mazuba aano ciindi bukkale bwesu nobwacinca cakutayeeyela?

 Bakamboni baku Philippines bakali alusyomo lwakuti Jehova wakali kuyoobalanganya ciindi nobakali mubukkale bukatazya. (Bahebrayo 13:6) Amana buya wakacita oobo, munzila nzyobatakali kuyeeyela. Mucikozyanyo, mucizyi wazina lya Cecille wakaamba kuti: “Notwakamana kujika nkapu yamamanino yalaisi njotwakajisi kuti tulye kuseeni swebo notwakali 4, twakasyaala kakunyina acakulya cili coonse. Aboobo twakapaila kuli Jehova kuti atupe nzyotwakali kuyandika buzuba oobo. Notwakacili kulya cakulya cakuseeni, mukwesu umwi wakaboola akutuletela laisi munji wama kg aali 5. Yakatweenda misozi yakulumba alukkomano akaambo kacilongezyo eeci cakali kuzwa kuli Jehova. Zintu zinji zili boobu zyakali kutucitikila.”

 Kunze lyaboobo, bantu ba Leza bakali kubelesya busongo bugwasya bwalo bujanika mu Bbaibbele. (Tusimpi 2:6, 7) Mucikozyanyo, mucizyi umwi wakazwide akubbapatizyigwa wazina lya Arcelita, iwatakakwetwe aciindi eeco alimwi iwakali kukatazyigwa kujana ziyandika, wakapaila kuli Jehova. Kumane wakayeeya Tusimpi 10:4, iyaamba kuti: “Maanza aamutolo aletela bucete, pele maanza aamunkutwe aleta buvwubi.” Kutegwa acite ncaamba majwi aaya, wakasala kulima gaadeni. Wakaamba kuti: “Jehova wakakulongezya kusolekesya kwangu. Aboobo, ndakali kukonzya kulima akutebula nzyondakali kukkwana kulya mpoonya zimwi ndakali kusambala kutegwa ndijane mali aakukkwezya.”

 Bakwesu alimwi tiibakajisi mali aakuula masena kutegwa bayake Maanda aa Bwami. Pele eeci tiicakabalesya kumvwida mulawo wakuswaangana antoomwe kutegwa bakulwaizyanye. (Bahebrayo 10:24, 25) Bakacinca kweelana abukkale. Mucikozyanyo, mucizyi wazina lya Deborah wakaamba kuti: “Swebo notubalilwa ku 6 twakali kuswaanganina mukaanda kaniini kalo mebo amucizyi ngotwakali kubelekalimwi mulimo wabupainiya nkotwakayakide. Aciluli twakavwumbide matewo aamakunka aategwa nipa palms, bwaanda bwakayakidwe aamitabi yamakunka aamakkokkonati, mpoonya zisyiko zyangawo nzyotwakali kukkala.”

 Nokuba boobo, bunji bwabakwesu abacizyi, bakali kuswaanganina mumaanda aabo. Mucizyi wazina lya Virginia wakaamba kuti: “kaanda kesu kaniini kakayakidwe aabwizu amatete. Lyoonse Mujibelo twakeelede kulonzya zintu zyesu ikubamba busena kutegwa bakwesu abacizyi bakaswaangane kabotu buzuba butobela.” Kuŋanda imwi, ciluli cakali kusweka. Mukwesu wazina lya Noel wakaamba kuti: “Kufwumbwa yatalika kuwa mvwula, twakali kubelesya tubbakete kuteekezya meenda. Pele tiitwakali kububona buyumuyumu oobu akaambo kakuti twakali kukomba Jehova antoomwe abakwesu abacizyi.”

 Kubula zintu zyakumubili tiikwakacesya busungu mbobakajisi ba Bakamboni bwakukambauka. Ba Lindina, ibakkala ansumbu ya Negros, bakaamba kuti: “Mbwaanga mumukwasyi wesu twakali banji alimwi Bataata balikke mbabakali kubeleka, talili lyoonse notwakali kuba amali aakukkwezya. Aboobo kanji-kanji twakali kweenda buya amaulu kuunka kucilawo. Nokuba boobo cakali kukkomanisya nkaambo toonse mbuli mukwasyi twakali kuba antoomwe. Kunze lyaboobo twakalizyi kuti Jehova wakali kukukkomanina kusolekesya kwesu.”

 Buyumuyumu bumwi bupati mbotwakajisi bwakali bwakuunka kuyookambaukila kumasena aakulamfwu aali mumalundu, nkaambo kwakali buyo zyeendelo zisyoonto mpoonya mumasena aamwi kwakanyina buya. Ba Esther, ibakkala ansumbu ya Luzon, bakaamba kuti: “kabunga kesu ikakajisi Bakamboni bali 6 kusikila ku 12, twakali kutalika kweenda amaulu kakucili kooko nkaambo misinzo yakali milamfwu. Twakali kukambauka buzuba boonse. Caboola kuzyakulya, twakali kutolelezya zijikidwe kale, zyalo nzyotwakali kulida muzimvwule zyazisamu. Nokuba boobo, kwakali bakwesu abacizyi bamwi bakanyina zyakulya, pele twakali kuunka limwi. Twakali kubaambila kuti ‘mutapengi pe, tulijisi cakulya ncotukonzya kukkwana toonse.’”

 Jehova wakaulongezya muuya ooyu wakulyaaba. Mucikozyanyo, mu 1970, mu Philippines kwakali basikumwaya bali 54,789. Kuzikusika mu 1989, mweelwe wakayungizyika ziindi zyobilo akusika ku 102,487. Mu 2023, mweelwe wabasikumwaya ba Bwami mu Philippines wakasika ku 253,876.

 Nokuba kuti Bakamboni bakajisi penzi lyakubula mali, bakazumana kuyuma kumuuya. Mukwesu wazina lya Antonio wakaamba kuti: “kuba bacete tiikwakatulesya kumuyanda Jehova.” Mucizyi Fe Abad wakaamba kuti: “Ciindi mebo abalumi bangu notwakajisi penzi lyakubula mali, twakali kuzumanana kuswena kuli Jehova akulumvwa lukkomano luboola akaambo kakupona buumi buuba-uba. Eeci cakapa kuti, bana besu abalo baiye kusyoma mulinguwe.”

 Ba Lucila ibakkala ku Samar Island bakaamba kuti: “Kuba mucete talili penzi ikuti katubelekela Jehova.” Bakayungizya kuti: “ikuti twabikka Leza mubusena bwakusaanguna, tulakonzya kukkutila alimwi akuzilanga kabotu zintu. Masimpe, ndakakkomana kubona basikwiiya Bbaibbele bangu kabalyaaba kuli Jehova mpoonya mukuya kwaciindi akundisangana mumulimo wabupainiya.”

 Lino mbwaanga tulizyi kuti kumbele toonse tuyooba aziindi zikatazya, atwiiye kumajwi aamwaalu wazina lya Rodolfo, iwakalemba kuti: “Notwakali kupona muziindi zikatazya kuma 1970 alimwi a 1980, ndakalimvwa janza lya Jehova mubuumi bwangu. Nokuba kuti ndakajisi buyo mali masyoonto, tiindakali kulimvwa kuba mucete. Jehova wakandilanganya. Lino ndipona buumi bwiinda kubota, alimwi ndilangila ‘buumi bwini-bwini’ mu Paradaiso iibola kumbele.”​—1 Timoteyo 6:19.