Kweelana ambotwabona lyankondo ku Ukraine, basololi bazikombelo bakulwaizya bantu kutola lubazu munkondo. Amubone basololi bamwi mbobatondezya kuti balijatikizyidwe munkondo eeyi:

•   “Tulabalumba alimwi akubalemeka kapati basikalumamba besu akaambo kakutukwabilila kuli basinkondoma . . . Lyoonse tulamupailila kuzwa ansi aamyoyo yesu kutegwa muzwidilile.”—Metropolitan Epiphanius I waku Kyiv, kweelana alipooti ya The Jerusalem Post, March 16, 2022.

•   “Musololi wacikombelo ca Orthodox ku Russia, wakajisi muswaangano waalubazu abasikalumamba bamu cisi eeci mu Nsondo akubakulwaizya kuti bazumanane kukwabilila cisi cabo ‘kweelana ambobakonzya,’ mbwaanga basikalumamba baku Moscow bamwi bazumanana kulwana cisi ca Ukraine.”—Reuters, April 3, 2022.

 Sena Banakristo beelede kutola lubazu munkondo? Ino Bbaibbele lyaamba nzi?

 Bbaibbele litondezya kuti basikutobela Jesu Kristo beni-beni tabajatikizyigwi munkondo.

•   “Pilusya panga lyako muciyobwedo candilyo, nkaambo boonse aabo babweza panga bayoojaigwa apanga.”—Matayo 26:52.

   Sena muntu uuzumizya nkondo naa uulwana ulaatobela majwi aa Jesu?

•   “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo. Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Johane 13:34, 35.

   Sena muntu uutola lubazu munkondo utondezya luyando Jesu ndwaakaamba kuti, ndoluyoozyibya bantu kuti mbasikwiiya bakwe?

 Kutegwa muzyibe zinji, amubale cibalo camu Cikuwa cakuti “Is War Compatible With Christianity?”

 Sena kuli kaambo kalimvwisya keelede kupa Banakristo kutatola lubazu munkondo mazuba aano? Inzya. Bbaibbele lyakasinsima kuti mazuba aano ngotupona anooli “mazuba aamamanino,” akuti bantu bamuzisi zyoonse ‘tabakaiyi limbi nkondo pe,’ kweelana ambwaakayiisya Jesu.—Isaya 2:2, 4, bupanduluzi buyungizyidwe.

•   Kutegwa muzyibe zinji, amubale cibalo cijisi mutwe wakuti “Ino Leza Ulimvwa Buti Kujatikizya Nkondo?” icili muzibalo zitobelene mu Ngazi Yamulindizi

 Ino-ino Jehova, a “Leza waluumuno,” uyoobelesya mfwulumende yakwe yakujulu kukwabilila bantu “kukudyaamininwa akunkondo.”—Bafilipi 4:9; Intembauzyo 72:14.

•   Kutegwa mubone mbwayoocita oobo, amweebelele kavidiyo kakuti Ino Bwami bwa Leza Ninzi?