Sena muyeeya kuti nyika iyakunyonyoonwa? Ambweni muyeeya kuti iyoonyonyoonwa cakumaninina, kubikkilizya azintu zyoonse zipona alindilyo. Ibamwi basyoma kuti nkotuya ooko, kwaambisya nobabala manyuuzi aali mbuli yaaya aatobela:

•   “Kulalangilwa kucitika nkondo yanyukkiliya. Nkondo eeyi ilakonzya kutalisyigwa acaali, cakutazyiba, naa akaambo kakutamvwana.”—Bulletin of the Atomic Scientists.

•   “Mumyaka iili kkumi yainda, kwacitika maguwo aalaanguzu kapati, mulilo uumpa masaka manji, kukasaala naa kutontola kapati kwamulwizi, ciyumayuma, kupya kwiindilide, alimwi akupaya kwamaanzi mumasena aaindene-indene nyika yoonse.”—National Geographic.

•   “Mu Africa kwaboola cikwikwi cipati alimwi cinyonyoona kapati kwiinda cakaliko mumyaka yainda.”—The Associated Press.

 Sena nyika iyakunyonyoonwa cakumaninina? Ino Bbaibbele lyaamba nzi?

 Peepe. Ijwi lya Leza Bbaibbele, litusyomezya kuti nyika inooliko lyoonse mane kukabe kutamani. (Mukambausi 1:4) Muciindi cakunyonyoona nyika njaakalenga, Leza ‘uyoonyonyoona baabo banyonyoona nyika.’—Ciyubunuzyo 11:18.

 Kweelana ancolyaamba Bbaibbele, “nyika” iyakunyonyoonwa mbantu baunduluzya milawo ya Leza akucita nzyobayanda balo. Mbubwenya mbwaakacita mumazuba aa Nowa, Leza uyoonyonyoona ‘bantu bamusampaula.’—2 Petro 2:5; 3:7.

 Mbubwenya lugwalo lwa 1 Johane 2:17 mbolutondezya, “inyika ilamana antoomwe azisusi zyanjiyo.” Kapango aaka katondezya kuti Leza uyoonyonyoona, kutali nyika mpotukkede, pele bantu ibazumanana kucita zintu zibi.

 Bbaibbele talitwaambili buzuba bwini mamanino naayoosika. (Matayo 24:36) Nokuba boobo, lilaamba kuti mamanino aswena. Lyakasinsima kujatikizya zintu eezyi zitobela:

•   zintu mbuli nkondo, nzala, zilwazi, alimwi amizuzumo ilaanguzu ziyoocitika “mumasena aaindene-indene.”—Matayo 24:3, 7, 14; Luka 21:10, 11; Ciyubunuzyo 6:1-8.

•   Bantu banji bayootondezya muuya wakuliyanda. Mucikozyanyo, ‘banooyandisya mali,’ “batalumbi,” alimwi “batalilesyi.”—2 Timoteyo 3:1-5.

 Bantu banji balazumina kuti kuzwa mu 1914, bukkale anyika buleendelana ancolyakasinsima Bbaibbele akuti mamanino aswena. Kutegwa muzyibe zinji, amubone cibalo cakuti “Ino Kutobelana Kwamakani Aamu Bbaibbele Kutondezya Nzi Kujatikizya Mwaka wa 1914?” alimwi acakuti “Ino Citondezyo ‘Camazuba Aamamanino,’ naa ‘Ciindi Camamanino’ Ninzi?”

 Bbuku lyamamanino mu Bbaibbele lyaamba ciindi “aakuyubunuka Mwami Jesu,” calo ciyoocitika aakuboola kajisi nguzu zyakugusya bubyaabi boonse anyika akulumbula baabo bakomba Leza.—2 Batesalonika 1:6, 7; 1 Petro 1:7, 13.

 Kuyungizya waawo, liyubununa zintu ziyoocitika kumbele. (Ciyubunuzyo 1:1) Lijisi makani mabotu alimwi amulumbe uupa bulangizi. (Ciyubunuzyo 1:3) Litondezya kuti Leza uyoogusya kutalulama koonse akubambulula nyika kutegwa ibe paradaiso. Aciindi eeco, kucisa, kupenga, noluba lufwu ziyoomana.—Ciyubunuzyo 21:3, 4.

 Sena inga tiimwayanda kwiiya zinji kujatikizya zisyomezyo eezyi zibotu zyamu Bbaibbele? Bakamboni ba Jehova bajisi bubambe bwakuyiisya Bbaibbele kakunyina kubbadelesya. Mulakonzya kubatumina naa kubalembela kutegwa mugwasyigwe abubambe oobu.