“Kutegwa kube luumuno munyika yoonse, tatweelede kubeteka bamwi.”—UNESCO Declaration of Principles on Tolerance, 1995.

 Kulubazu lumwi, kubeteka bamwi kulakonzya kupa bantu kubula bulemu alimwi akutayanda bamwi. Ikuti bantu kabalimvwa boobu, balakonzya kutalika kwaamba majwi aatali kabotu, kusalululana alimwi akuba bakali.

 Pele bantu bajisi mizeezo iindene-indene kujatikizya ncocaamba kubeteka bamwi. Bamwi basyoma kuti kutabeteka bamwi caamba kuzumina zintu zyoonse nzyobacita bantu bamwi. Kulubazu lumwi, bamwi basyoma ncolyaamba Bbaibbele kuti kutabeteka bamwi caamba kulemeka nzyobasyoma bantu bamwi, nokuba kuti balo tabazisyomi naa kuzizumina zintu eezyo.

 Sena Bbaibbele lilakonzya kubagwasya bantu mazuba aano kutabeteka bamwi?

Ncolyaamba Bbaibbele kujatikizya kutabeteka bamwi

 Bbaibbele lilatukulwaizya kutabeteka bamwi. Lyaamba kuti: “Bantu boonse abazyibe kuti mulanyoneka.” (Bafilipi 4:5) Bbaibbele litukulwaizya kubabikkila maano bamwi, kubapa bulemu akubeendelezya munzila mbotu. Aabo batobela lulayo oolu tabakonzyi kuzumina njiisyo zyamuntu uumwi, pele balakonzya kuzumizya muntu ooyo kucita zintu munzila njayanda.

 Nokuba boobo, Bbaibbele liyubununa kuti Leza wakabikka zyeelelo zijatikizya mbobeelede kulilemeka bantu. Lyaamba kuti: “Omuntu, [Leza] wakwaambila kale cintu cibotu.” (Mika 6:8) Malailile ngapa Leza alabagwasya bantu kupona buumi bubotu.—Isaya 48:17, 18.

 Leza tatupede nguzu zyakubeteka bamwi. Kweelana ancolyaamba Bbaibbele, “Kuli buyo Sikupa Mulawo a Mubetesi omwe . . . Ino nduwe ni yebo oobeteka mweenzinyoko?” (Jakobo 4:12) Leza wakapa umwi aumwi mukuli wakulisalila zyakucita.—Deuteronomo 30:19.

Ncolyaamba Bbaibbele kujatikizya bulemu

 Bbaibbele lyaamba kuti tweelede “kubalemeka bantu bamisyobo yoonse.” (1 Petro 2:17) Aboobo, aabo ibasala kupona kweelana azyeelelo zyamu Bbaibbele balabalemeka bantu boonse, tacikwe makani anzyobasyoma naa buumi mbobapona. (Luka 6:31) Eeci tacaambi kuti bantu ibatobela ncolyaamba Bbaibbele balakonzya kuzizumina njiisyo zili zyoonse naa kusala nkobacita bamwi. Pele muciindi cakunyema naa kucita zintu munzila iitali yabulemu, balasolekesya kwiiya Jesu mbwaakali kubeendelezya bantu bamwi.

 Mucikozyanyo, aciindi cimwi Jesu wakaswaanganya mukaintu uumwi wakali kusyoma njiisyo ziteendelani anjiisyo zyakwe. Mukaintu ooyu alimwi wakali kukkala amwaalumi uutali mulumi wakwe, ibukkale mbwaatakali kuzumizya Jesu. Nokuba boobo, wakaambaula amukaintu ooyo munzila yabulemu.—Johane 4:9, 17-24.

 Mbubwenya mbuli Jesu, Banakristo balilibambilide kupandulula nzyobasyoma kubantu ibalibambilide kuswiilila, pele balacita oobo “abulemu kapati.” (1 Petro 3:15) Bbaibbele lilailila Banakristo kutasungilizya bamwi kutobela mizeezo yabo. Lyaamba kuti sikutobela Kristo “teelede kulwana pe, pele weelede kuba amoyo mutete kubantu boonse,” kubikkilizya abaabo basyoma zintu ziindene anzyasyoma walo.—2 Timoteyo 2:24.

Ncolyaamba Bbaibbele kujatikizya lusulo

 Bbaibbele litwaambila “kuyandaula luumuno abantu boonse.” (Bahebrayo 12:14) Muntu uuyandaula luumuno ulalukaka lusulo. Nokuba kuti taciti cintu cili coonse cikazyanya anjiisyo zyakwe, ulasolekesya kukkala abantu boonse muluumuno. (Matayo 5:9) Alimwi buya, Bbaibbele likulwaizya Banakristo kuyanda basikondonyina kwiinda mukucita zintu munzila yaluzyalo kubantu boonse batabeendelezyi kabotu.—Matayo 5:44.

 Masimpe, Bbaibbele lyaamba kuti Leza ‘uliisulide’ milimo iitapi bulemu kubantu bamwi naa iipenzya bantu bamwi. (Tusimpi 6:16-19) Pele Bbaibbele aawa lyabelesya bbala lyakuti “nzyasulide” kupandulula mbwalimvwa kujatikizya mbwataiyandi milimo iitali kabotu. Bbaibbele litondezya kuti Leza ulilibambilide kulekelela alimwi akugwasya bantu ibayanda kucinca nzila zyabo akupona kweelana azyeelelo zyakwe.—Isaya 55:7.

Tupango twamu Bbaibbele tujatikizya kubeteka bamwi akubalemeka

 Tito 3:2: “Kabanyoneka, kabatondezya kubomba moyo cakumaninina kubantu boonse.”

 Matayo 7:12: “Zintu zyoonse nzyomuyanda kuti bantu bamucitile, anywebo nzyomweelede kubacitila.”

 Joshua 24:15: “Amulisalile nobeni sunu ngomuyanda kubelekela.”

 Milimo 10:34: “Leza tasalululi.”

 Habakuku 1:12, 13: ‘[Leza] takonzyi kubulangilila buyo bubi.’

 Baroma 12:19: “Amubusiile busena bukali bwa Leza; nkaambo kulembedwe kuti: ‘Ndime ndisubula; ndime nendiyoopilusya cibi,’ mbwaamba Jehova.” a

 Jehova tazumizyi muntu uuli woonse kupilusizya cibi. Uyooba masimpe kuti bululami bwacitwa aciindi ncabikkide. Kutegwa mwiiye zinji, amubale cibalo cakuti “Sena Kuli Nokuyooba Bululami Munyika?”