Mu January 27, 2023, bantu banji banooyeeya bantu bakafwa munkondo yacijaye-jaye naa Holocaust. Buzuba oobu bwiitwa kuti International Holocaust Remembrance Day. Zintu zibyaabi izyakacitika myaka iili 75 yainda zilakonzya kupa bamwi kulibuzya kaambo Leza ncaakazumizya kuti nkondo eeyi icitike.

•   Kutegwa muzyibe ncolyaamba Bbaibbele, amubale cibalo cakuti “Nkaambo Nzi Holocaust Ncoyakacitikila? Nkaambo Nzi Leza Ncaatakailesya?”

 Ba Juda bakapenga kapati akaambo kankondo yacijaye-jaye. Ilufwu lwabantu banji lwakapulanwa buya. Bantu bamutubunga tumwi abalo bakapenzyegwa akujaigwa aciindi eeci. Akati kabantu bakajaigwa, kwakali Bakamboni ba Jehova ibakali kupenzyegwa akaambo kalusyomo lwabo mu Bbaibbele.

•   Kutegwa mwiiye zinji, amubale cibalo cakuti “Ncinzi Cakacitika Kuli Bakamboni ba Jehova Ciindi Cabweendelezi bwa Nazi?”

 Ibanji balayoowa kuti nkondo yacijaye-jaye ilakonzya kucitika alimwi. Pele cikkomanisya ncakuti, Bbaibbele lisyomezya kuti kumbele zintu zili boobu ziyoomana.

•   “‘Nkaambo ndiliizyi kabotu mizeezo njendiyeeya kujatikizya ndinywe,’ mbwaamba Jehova, ‘mizeezo yakumuletela luumuno, kutali mapenzi pe, kumupa buumi bwakumbele bubotu alimwi abulangizi.’”—Jeremiya 29:11. a

 Bulangizi oobu buyoozuzikizyigwa ciindi Jehova Leza aakubweza ntaamu yakumana bubi akubambulula zintu zyakanyonyooka. Lino-lino:

•   Uyoobanyonyoona aabo ibacitila beenzinyina zintu zibi.—Tusimpi 2:22.

•   Uyoobaponya boonse ibapenga.—Ciyubunuzyo 21:4.

•   Uyoobabusya boonse ibakafwa.—Johane 5:28, 29.

 Mulakonzya kubusyoma bulangizi mbolipa Bbaibbele. Kutegwa muzyibe ncomukonzya kuba alusyomo luli boobu, tumutamba kuti musole pulogilamu yesu yaciiyo ca Bbaibbele citabbadelelwi.