Ino Bbaibbele Lyaamba Nzi Kujatikizya Penzi Lyamaanzi Nyika Yoonse?

AMULIZYE

Toonse tuyandika maanzi aali kabotu kutegwa katupona. Ba UN Secretary-General ba António Guterres bakacenjezya kuti: “Akaambo kamweelwe wabantu uyaabuyungizyika nyika yoonse, penzi lyakubula maanzi liyaabukomena.” Calino, bantu banji kapati bajatikizyigwa kale apenzi eeli.

Strdel/AFP via Getty Images

Sena penzi lyakubula maanzi kuli noiyakumana? Naa lyoonse tunakwiilwana penzi eeli? Ino Bbaibbele lyaamba nzi?

Ncolisyomezya Bbaibbele kujatikizya penzi lyamaanzi

Bbaibbele lisyomezya kuti bumwi buzuba penzi lyamaanzi liyoomana. Alimwi buya, lisyomezya kuti kuyooba maanzi manji mabotu.

“Nkaambo maanzi ayoopoomoka munkanda, atulonga tuyookunka mucibanda camucimpayuma. Nyika njumu nta iipya iyooba amazyiba aajisi matete, alimwi nyika njumu iilunda kasuko iyooba atusensa twamaanzi.”—Isaya 35:6, 7.

Nkaambo nzi ncotukonzya kucisyoma cisyomezyo eeci? Amubone Bbaibbele ncolyaamba kujatikizya mboipangidwe nyika yesu.

Ncolyaamba Bbaibbele kujatikizya nyika alimwi abweende bwamaanzi

‘Leza tanaakalenga nyika kakunyina kaambo, pele wakaibumba kutegwa kaikkalwa bantu.’—Isaya 45:18.

Mbwaanga Leza wakapanga nyika kuti kaikkalwa bantu, wakaipanga munzila yakuti kaikonzya kuba amaanzi manji mabotu.

‘Leza ulakwela malosi aamaanzi kuzwa ansi; alacinca kuba mvwula kuzwa muli sikunku wakwe; mpoonya makumbi alawisya mvwula mpati; alalosyela bantu maanzi.’—Jobu 36:27, 28.

Munzila iimwi, lugwalo oolu lupandulula Leza mbwaakapanga bweende bwamaanzi. Maanzi alaunka mujulu kuzwa mulwizi, mpoonya apanga makumbi, kumane alawa kaili mvwula, akupa kuti lyoonse kakuli maanzi mabotu kubantu alimwi akubanyama.—Mukambausi 1:7; Amosi 5:8.

“Ndiyoomuwisizya mvwula aciindi ceelede, alimwi nyika iyoopa butebuzi bwayo azisamu ziyoozyala micelo yazyo.”—Levitiko 26:4.

Leza wakasyomezya bana Israyeli bansiku, nkokuti cisi cabalimi, kubapa butebuzi bunji kwiinda mukubapa maanzi lyoonse. Ulizyi kuti, ikutegwa tulime zyakulya, tuyandika mvwula aciindi ceelede.

Eeco Leza ncaakacitila bana Israyeli bansiku, uyoocicita ino-ino munyika yoonse. (Isaya 30:23) Calino, mumasena manji aali munyika, penzi lyamaanzi liyaabukomena, alimwi kubula kwamvwula nkaambo kamwi kapa kuti kacili boobu. Ncinzi cimbi ncolyaamba Bbaibbele lino kujatikizya mboliyoomana penzi eeli?

Mboliyoomana penzi lyamaanzi

Bbaibbele liyubununa kuti Leza kwiinda mu Bwami bwakwe, uyoomana mapenzi oonse aajatikizya nyika yesu, kubikkilizya apenzi lyamaanzi. (Matayo 6:9, 10) Bwami bwa Leza nimfwulumende yakujulu yalo iyakweendelezya nyika. (Daniele 2:44; Ciyubunuzyo 11:15) Kuyungizya waawo, Bwami oobu buyoocita cintu calo mfwulumende zyabantu ncoyatakonzya kucita, nkokuti kugusya zintu zipa kuti kakuli penzi lyamaanzi.

Penzi: Kucinca kwambowuunga muwo kwanyonganya bweende bwamaanzi. Kulaba ciyumayuma citaambiki naa cilobe ciba akaambo kakuvwula kwamvwula naa kuvwula kwamaanzi mulwizi.

Mboliyoomana: Bwami bwa Leza buyoobambulula nyika yesu kutegwa ikabote. Leza wakasyomezya kuti: “Amubone! Ndilengulula zintu zyoonse kuti zibe zipya.” (Ciyubunuzyo 21:5) Masena aatajisi maanzi ayooba amaanzi manji kapati, akupa kuti zintu kazikomena nomuba mumasena lino mutakonzyi kukkalwa bantu. (Isaya 41:17-20) Kunze lyaboobo, Bwami bwa Leza ibuli mumaanza aa Jesu Kristo, buyakweendelezya zilengwaleza.

Ciindi Jesu naakali aanyika, wakaumuzya guwo lyakali kuyoosya alimwi munzila eeyi wakatondezya asyoonto nguzu Leza nzyaakamupede. (Marko 4:39, 41) Mubweendelezi bwa Kristo kali Mwami wa Bwami bwa Leza, ntenda zilicitikila ziyoomana. Bantu bayooba aluumuno lwini-lwini akuliiba, kakunyina kuyoowa ntenda iili yoonse.

Penzi: Bantu batayeeyi kujatikizya bubi bukonzya kuboola akaambo kamicito yabo, alimwi ambunga zyabantu batabikkili maano bantunyina basofwaazya milonga amazyiba, calo capa kuti kubule maanzi aakubelesya mabotu.

Mboliyoomana: Leza uyoosalazya nyika, milonga, mazyiba, lwizi alimwi abulongo. Mpoonya nyika iyooba Paradaiso. Kwiinda mukubelesya majwi akweema, Bbaibbele lyaamba kuti: “Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—Isaya 35:1.

Ino ncinzi ciyoobacitikila aabo batabikkili maano kujatikizya nyika alimwi abantunyina? Leza wasyomezya “kunyonyoona baabo banyonyoona nyika.”—Ciyubunuzyo 11:18; Tusimpi 2:21, 22.

Penzi: Bantu tabaabelesyi kabotu maanzi, aboobo banyonyoona maanzi manji kwiinda yaayo nyika ngoikonzya kupanga.

Mboliyoomana: Bwami bwa Leza buyoozuzikizya makanze aa Leza kutali aabantu batayandi bantunyina, “ansi aano.” (Matayo 6:9, 10) Bwami bwa Leza buyoopa balelwa bambubo lwiiyo lwiinda kubota. Lugwalo lwa Isaya 11:9 lwaamba kuti: “Nyika iyoozula luzyibo lwa Jehova.” a Kabajisi luzyibo oolu antoomwe akuyanda Leza azilenge zyakwe zyoonse, bantu bayakwibikkila maano nyika yesu mbotu azilengwaleza zyanjiyo.

Kutegwa muzyibe zinji kujatikizya ncobuyoocita Bwami bwa Leza, amubone cibalo cakuti “Ino Ncinzi Ncobuyoocita Bwami bwa Leza?”
Amuunke kubbuku lyamu Bbaibbele lya Isaya, caandaano 35, kutegwa mulibalile nobeni nyika mboiyakubambululwa kuba paradaiso.
Amweebelele vidiyo yakuti Ino Leza Wakailengela Nzi Nyika? kutegwa mwiiye makanze aa Leza kujatikizya nyika alimwi abantu.