Bantu banji mazuba aano, nobaba baabo balyaamba kuti Mbanakristo, balimvwa kuti zyeelelo zyakulilemeka zyamu Bbaibbele zijatikizya koonana alimwi alukwatano tazicibeleki pe. Zikombelo zimwi zyacinca mboziyiisya kujatikizya ciluzi acitaluzi kutegwa zyeendelane aciindi mpotweendela. Sena zyeelelo zyamu Bbaibbele zijatikizya ciluzi acitaluzi ziciyandika? Inzya. Cibalo eeci cilaamba mbotuzyiba kuti ziciyandika.

 Bantu bakalengwa kuti kabalangila ku Mulengi wabo kutegwa kabasololela. Bbaibbele lyaamba kuti: “Muntu weenda tapedwe nguzu zyakusololela noziba ntaamu zyakwe.” (Jeremiya 10:23) Nokuba kuti Jehova a Leza wakatulenga kuti katucikonzya kulisalila, tanaakatupa nguzu zyakuzyiba ciluzi acitaluzi. Nkakaambo kaako, uyanda kuti katulangila kulinguwe.—Tusimpi 3:5.

 Zyeelelo zya Leza zyakulilemeka nkozili mu Bbaibbele. Amulange-lange twaambo tobilo izyeelelo eezyi ncoziyandika kapati.

•   Leza ngonguwe wakatulenga. (Intembauzyo 100:3) Mbwali Mulengi, Jehova Leza ulizizyi nzyotuyandika kutegwa katupona buumi bukkomanisya. Alimwi ulizyi bubi bukonzya kuba ikuti twaunduluzya zyeelelo zyakwe. (Bagalatiya 6:7) Kuyungizya waawo, Jehova uyanda kuti katupona buumi bubotu. Akaambo kakaambo aaka, Bbaibbele lyaamba Leza kuti “ndime ndikuyiisya kuti ugwasyigwe, uukusololela munzila moyelede kweendela.”—Isaya 48:17.

•   Nzyotulombozya zilakonzya kutweena. Bantu banji balimvwa kuti balakonzya kusala ciluzi acitaluzi kwiinda mukutobela moyo wabo, nkokuti zintu nzyobalombozya. Nokuba boobo, Bbaibbele lyaamba kuti “moyo uleena kwiinda cintu cimbi cili coonse alimwi ulapenzya kapati.” (Jeremiya 17:9) Ikuti moyo wesu kautasololelwi abusongo bwa Leza, uyootunjizya mumapenzi kumbele.—Tusimpi 28:26; Mukambausi 10:2.

 Peepe! Bbaibbele liyiisya kasimpe kajatikizya Leza alimwi ambwayanda kuti katulilemeka. (1 Bakorinto 6:9-11; Bagalatiya 5:19-23) Uyanda kuti bantu bakazyibe kasimpe aaka. (1 Timoteyo 2:3, 4) Aboobo, babelesi Banakristo beelede kuyiisya ncolyaamba Jwi lya Leza.—Tito 1:7-9.

 Bantu banji batayandi kutobela zyeelelo zyamu Bbaibbele zyakulilemeka, balangila kubamayi bazikombelo balo “ibabaambila nzyobayanda kumvwa.” (2 Timoteyo 4:3, bupanduluzi buyungizyidwe) Kakuli Ijwi lya Leza licenjezya boobu: “Maawe kulibaabo baamba kuti bubotu mbubi abubi kuti mbubotu.” (Isaya 5:20) Cakutadooneka, Leza uyoobasubula basololi bazikombelo balo ibayiisya zyakubeja kujatikizya ciluzi acitaluzi.

 Peepe. Aabo bayanda kukkomanisya Leza beelede kutobela cikozyanyo ca Jesu Kristo alimwi azintu nzyaakali kuyiisya. Wakayiisya basikumutobela kutabeteka bamwi pele muciindi caboobo kutondezya luyando alimwi akubalemeka bantu boonse.—Matayo 5:43, 44; 7:1.

 Jesu wakayiisya basikumutobela kukakatila kuzyeelelo zya Leza zyakulilemeka mubuumi bwabo. Nokuba boobo, bakeelede kuzumina kuti bantu bamwi inga basala kutobela zyeelelo zimbi. (Matayo 10:14) Jesu tanaakabazumizya basikumutobela kubelesya nguzu zyabo kusungilizya bamwi kutobela zyeelelo zya Leza.—Johane 17:14, 16; 18:36.

 Aabo basolekesya kutobela zyeelelo zya Leza zyakulilemeka zijatikizya ciluzi acitaluzi balajana zilongezyo lino alimwi akumbele. (Intembauzyo 19:8, 11) Eezyi zibikkilizya:

•   Lukkomano lunji.—Tusimpi 29:6.

•   Cilongwe ciyumu a Leza.—Tusimpi 3:32.

•   Lugwasyo lwa Leza muciindi camapenzi.—Tusimpi 11:8.

•   Bulangizi bwakupona kukabe kutamani anyika.—Intembauzyo 37:29.