Munyika yoonse, zisi zinji zili mukulwana akaambo kamapolitikisi. Mubuvwuntauzi mbobakacita mu 2022, ba Pew Research Center bakajana kuti “mweelwe wabantu wiinda ku 65 pesenti muzisi zili 19 bakaamba kuti kuli manyongwe aataambiki muzisi zyabo akati kabantu ibali mutubunga twamapolitikisi twiindene.”

 Sena andinywe kubusena nkomukkala mulaabona manyongwe aaliko akati kabasimapolitikisi? Nkaambo nzi ncokuli manyongwe aali boobo? Sena kuli cikonzya kulimana penzi eeli? Amubone ncolyaamba Bbaibbele.

 Bbaibbele lyakasinsima kuti muciindi cesu, calo caambwa kuti “mazuba aamamanino,” bantu banji banoojisi bube bunoopa kuti kakutabi lukamantano.

•   “Kumazuba aamamanino kuyooba ziindi zikatazya ncobeni. Nkaambo bantu bayooba basikuliyanda, . . . batanyoneki.”—2 Timoteyo 3:1-3.

 Mfwulumende zyaalilwa kuzwidilila nokuba kuti bantu banji bali mukusolekesya kucita ciluzi. Akaambo kakuti bantu bajisi mizeezo iindene, cilabakatazya kubelekela antoomwe kutegwa bamane mapenzi. Akaambo kaceeci, zintu izili mukucitika zitondezya buyo ncolyakaamba kaindi Bbaibbele.

•   ‘Muntu weendelezya muntunyina munzila iimuletela mapenzi.’—Mukambausi 8:9.

 Nokuba boobo, Bbaibbele lilaamba cikonzya kulimana penzi, nkokuti, imfwulumende yeendelezyegwa amuntu uukonzya kwaamana mapenzi aabantu.

 Bbaibbele lilamwaamba mweendelezi uujisi bube buyandika kutegwa amane mapenzi aaliko: Jesu Kristo. Jesu ulijisi nguzu alimwi uliyandide kuleta lukamantano aluumuno kubantu boonse.

•   “Mumazuba aakwe balulami bayoozwidilila, alwalo luumuno luyoovwula.”—Intembauzyo 72:7.

•   “Masi oonse buyo ayoomubelekela.”—Intembauzyo 72:11.

 Jesu mweendelezi weelela nkaambo ulababikkila maano bantu alimwi ulayanda kubagwasya, kwaambisya aabo ibeendelezyegwa cakutalulama.

•   “Uyoovwuna mucete uukwiilila lugwasyo, uupengede alimwi amuntu uuli woonse uutajisi mugwasyi. Muntu uupengede alimwi amucete uyoobafwida lubomba, alimwi uyoofwutula buumi bwabacete. Uyoobavwuna kukudyaamininwa akunkondo.”—Intembauzyo 72:12-14.

 Amwiiye zinji kujatikizya Bwami bwa Leza, imfwulumende yakujulu yeendelezyegwa a Jesu. Amuzyibe mbomukonzya kugwasyigwa amfwulumende eeyi alimwi ambomukonzya kuba kulubazu lwanjiyo.

•   Amweebelele kavidiyo kakuti Ino Bwami bwa Leza Ninzi?

•   Amubale cibalo cakuti “Bwami bwa Leza—Mfwulumende Iitaciti Makulo.”