Mu May 24, 2022, ntenda iiyoosya kapati yakacitika mudolopo nsyoonto ya Uvalde, ku Texas, U.S.A. Kweelana alipooti yakapegwa mumuteende wiitwa kuti The New York Times, “mwaalumi wakajisi ntobolo wakajaya bana bali 19 abamayi bobilo . . . acikolo ciitwa kuti, Robb Elementary School.”

 Cuusisya ncakuti, ntenda zili boobu zibyaabi zilacitika kanji-kanji. Lipooti yakapegwa aba USA Today yakatondezya kuti ku United States kulikke, “kwakacitika ntenda zyakudubula bana bacikolo izili 249 mwaka wamana. Eeci nciindi cakusaanguna kuzwa mu 1970 nokwakacitika ntenda zinji boobu.”

 Nkaambo nzi zintu zili boobu ncozicitika? Mbuti mbotukonzya kuliyumya nokwacitika zintu zibyaabi boobu? Sena kuli bulangizi buli boonse bwakuti manyongwe aali boobu ayoomana? Bbaibbele lilapa bwiinguzi.

•    Bbaibbele lyaamba ciindi ncotupona kuti “mazuba aamamanino,” iciindi bantu nobanoonyina “luyando lwakuzyalwa andulo” alimwi nobanooli “bakali,” ibacita micito yakulwana akujayana. Bantu bali boobu ‘banooyaabubija akubijila limwi.’ (2 Timoteyo 3:1-5, 13) Kutegwa mwiiye zinji, amubale cibalo cakuti “Sena Bbaibbele Lyakaambilalimwi Bantu Mbobanikuyeeya Akucita Zintu Mazuba Aano?”

 Bantu banji balalibuzya kuti, ‘Nkaambo nzi Leza ncatazilesyi zintu zibyaabi mbuli kudubula bana bacikolo?’ Kutegwa mubone bwiinguzi bwamu Bbaibbele, amubale cibalo cakuti “Nkaambo Nzi Zintu Zibyaabi Ncozibacitikila Bantu Bali Kabotu?”

•    “Zintu zyoonse izyakalembwa kaindi zyakalembelwa kutuyiisya, kutegwa . . . kwiinda muluumbulizyo lwamu Magwalo tube abulangizi.”—Baroma 15:4.

 Njiisyo zyamu Bbaibbele zilakonzya kumugwasya kuliyumya munyika eeyi iizwide nkondo. Kutegwa muzyibe zinji, amubone Sinsimuka! yakuti “Sena Nkondo Kuli Noiyoomana?”

 Kutegwa nobazyali muzyibe mbomukonzya kugwasya bana banu ciindi nobamvwa nyuuzi iiyoosya, amubale cibalo camu Cikuwa cakuti “Disturbing News Reports and Your Children.”

•    “Uyoobavwuna kukudyaamininwa akunkondo.”—Intembauzyo 72:14.

•    “Bayoofwula mapanga aabo kuba maamba aakulimya amasumo aabo kuba zyakukwezuzya zisamu. Cisi tacikanyamuni panga kulwana cisinyina, alimwi tabakaiyi limbi nkondo pe.”—Mika 4:3.

 Leza uyoocita cintu bantu ncobatakonzyi kucita. Bwami bwakwe bwakujulu buyoonyonyoona zilwanyo zyoonse akumana nkondo. Kutegwa mwiiye zinji kujatikizya ncobuyoocita Bwami bwa Leza, amubale cibalo cakuti “Mubweendelezi bwa Bwami bwa Leza ‘Luumuno Luyoovwula.’”