Makulo ngobacita babelesi bamfwulumende ndipenzi lyanyika yoonse alimwi aletela bantu mapenzi. a Mucikozyanyo, lyabulwazi bwa COVID-19, babelesi bamfwulumende muzisi zimwi bakatamikizyigwa abamwi kuti balivwubide kwiinda mukubweza mali aakeelede kubelesyegwa kugwasya bantu kulwana COVID-19. Makulo aali boobu akapa kuti bantu batabi abuumi buli kabotu, calo cakapa kuti banji baciswe alimwi akufwa.

 Makulo aacitika mumfwulumende ajatikizya zintu zinji. Ba David Cameron, ibakali mweendelezi wabili ku United Kingdom, bakaamba boobu: “Mfwulumende imwi aimwi ilijisi bantu bacita makulo.”

 Nokuba boobo, tulakonzya kuba masimpe kuti ino-ino makulo oonse aacitika mumfwulumende ayoomana. Nkaambo nzi? Amubone ncolyaamba Bbaibbele kujatikizya Leza ncayoocita.

 Bbaibbele limwaamba boobu Leza kuti: “Mebo, nde Jehova, ndilabuyanda bululami, ndilakusulaika kubba alimwi akutalulama.” b (Isaya 61:8) Ciindi bantu nobapenga akaambo kamakulo ngobacita bamwi, Leza ulizyi. (Tusimpi 14:31) Usyomezya kuti: “Akaambo kakuti bantu bapengede baladyaamininwa, . . . Ndilanyamuka akubweza ntaamu.”—Intembauzyo 12:5.

 Ncinzi Leza ncayoocita? Muciindi cakucinca mfwulumende ziliko, uyoopa kuti zinjililwe busena amfwulumende yakujulu, iitwa kuti “Bwami bwa Leza.” (Marko 1:14, 15; Matayo 6:10) Bbaibbele lyaamba kuti: “Leza wakujulu uyoobikka bwami . . . buyoopwayaula akumanizya mami aaya oonse, mpoonya bwalo bulikke buyakwiima nji mane kukabe kutamani.” (Daniele 2:44) Aboobo Leza uyoomanizya makulo ngotubona mazuba aano.

 Ino tuzyi buti kuti Bwami bwa Leza nimfwulumende inoonyina makulo? Amulange-lange makani aatobela.

1.  1. Nguzu. Bwami buyootambula nguzu kuzwa kuli Singuzuzyoonse Leza.—Ciyubunuzyo 11:15.

    Kaambo eeci ncociyandika: Kutegwa mfwulumende ibeleke kabotu isyoma mali ngobatela bantu. Kanji-kanji eeci cipa kuti kakuli kupa cisinka mulomo, bubbi alimwi abucenjezu. Nokuba boobo, Bwami oobu buyoogwasyigwa a Singuzuzyoonse Leza, aboobo lyoonse buyoocikonzya kupa balelwa banjiyo zintu nzyobayandika.—Intembauzyo 145:16.

2.  2. Mweendelezi. Leza wakasala Jesu Kristo kuba Mweendelezi wa Bwami.—Daniele 7:13, 14.

    Kaambo eeci ncociyandika: Nobaba beendelezi bali kabotu balakonzya kuyungwa amuntu umwi kucita cintu cibyaabi. (Mukambausi 7:20) Mukwiimpana, Jesu wakatondezya kuti takonzyi kupegwa cisinka mulomo. (Matayo 4:8-11) Kuyungizya waawo, lyoonse ubeendelezya caluyando balelwa bakwe alimwi ulabubikkila maano buumi bwabo.—Intembauzyo 72:12-14.

3.  3. Milawo. Milawo ya Bwami bwa Leza ililondokede, alimwi ilakatalusya.—Intembauzyo 19:7, 8.

    Kaambo eeci ncociyandika: Milawo yabantu kanji-kanji miyumu, ilaminya alimwi ilakatazya kutobela, calo cipa kuti kakuli makulo. Kulubazu lumwi, milawo ya Leza ili kabotu alimwi ilagwasya. (Isaya 48:17, 18) Kuyungizya waawo, milawo eeyi tiibikkilizyi buyo kubeleka pele alimwi ilakulwaizya. (Matayo 22:37, 39) Masimpe kuti, Leza ulabona zili mumyoyo yabantu, alimwi ulakonzya kubona masimpe kuti milawo iili boobu yabikkwa caluzyalo.—Jeremiya 17:10.

 Twamukulwaizya mwiiye zinji kujatikizya zisyomezyo zyamu Bbaibbele zyakumbele kwalo kunoonyina makulo aacitika mumfwulumende.

•   Amubale cibalo cakuti “Bwami bwa Leza—Mfwulumende Iitaciti Makulo” kutegwa mwiiye twaambo tumwi totatwe Bwami bwa Leza ncobutakabi amakulo.

•   Amweebelele kavidiyo kakuti Ino Bwami bwa Leza Ninzi? kutegwa mwiiye zinji kujatikizya Bwami bwa Leza alimwi ancobuyoocita anyika.

•   Amulombe ciiyo ca Bbaibbele citabbadelelwi kutegwa mubone mbomukonzya kugwasyigwa azisyomezyo zyamu Bbaibbele.