Sena Cilakonzyeka Kubantu Boonse Kuba Azintu Nzyobayandika?
Muzisi zinji, bantu baluujisi kweendeenda mumigwagwa kutalisya manyongwe akaambo kapenzi lyakubula mali. Mapenzi aali boobu aindila kapati akaambo kabulwazi bwa COVID-19 buliko, bwalo ibwapa bantu kulimvwa bubi akaambo kabukkale mobabede nkaambo kujalilwa, kuceya kwazintu ziyandika, kutaba acoolwe cakutambula lugwasyo kuzibbadela zyoonse zyatondezya caantangalala lwiindano lupati luli akati kabavwubi abacete.
Sena mapenzi aapa bantu kubula zintu nzyobayandika kuli naayoomana? Inzya. Bbaibbele lilapandulula Leza ncayoocita kutegwa amanizye mapenzi ngotujisi.
Mapenzi Leza ngayoomana
Penzi: Mfwulumende zyaalilwa kupanga bubambe bwakuti bantu boonse kabajisi zintu nzyobayandika.
Mboliyoomana: Leza uyoogwisya mfwulumende zyabantu akubikka mfwulumende yakwe, yalo iitwa kuti Bwami bwa Leza. Inoolela nyika yoonse kuzwa kujulu.—Daniele 2:44; Matayo 6:10.
Mbobunoobede buumi: Akaambo kakuti Bwami bwa Leza bunooyendelezya nyika yoonse, zintu zyoonse zinooli kabotu. Bucete boonse buyoomana alimwi bantu tabanoolibiliki kuti naa banoojisi zintu nzyobayandika. (Intembauzyo 9:7-9, 18) Muciindi caboobo, bayooikkomanina milimo yamaanza aabo alimwi akukkutila mubuumi antoomwe amikwasyi yabo. Bbaibbele lisyomezya kuti: “Bayooyaka maanda akukkala mulingawo, bayoosyanga myuunda yamisaansa akulya micelo yanjiyo. Tabakayaki maanda kuti muntu uumbi akakkale nguwe mulingawo, alimwi tabakasyangi myuunda kuti muntu uumbi akalye nguwe micelo yanjiyo.”—Isaya 65:21, 22.
Penzi: Bantu tabakonzyi kweeleba bukkale bupa kuti kabapenga alimwi akubula zintu nzyobayandika mubuumi.
Mboliyoomana: Kwiinda mukubelesya Bwami bwakwe, Leza uyoogwisya zintu zyoonse izipa bantu kuyoowa akulimvwa kutakwabililwa.
Mbobunoobede buumi: Mbwaanga Leza unoobalanganya bantu, tabanoocitikilwi zintu zinoopa kuti balo naa mikwasyi yabo ibule zintu nzyoiyandika kapati. Mucikozyanyo, nkondo, nzala, alimwi amalwazi aabbuka ziyoomana. (Intembauzyo 46:9; 72:16; Isaya 33:24) Leza waamba kuti: “Bantu bangu bayookkala mubusena bwaluumuno, mumakkalilo aakwabilidwe alimwi amumasena aakulyookezyela aaluumuno.”—Isaya 32:18.
Penzi: Bantu baliyanda alimwi balyatu kanji-kanji balida bamwi masuku atala amutwe.
Mboliyoomana: Balelwa ba Bwami bwa Leza bayakwiiya kutondezya kuti balabayanda bantu bamwi kwiinda mbobaliyanda beni.—Matayo 22:37-39.
Mbobunoobede buumi: Mubulelo bwa Bwami bwa Leza, bantu boonse banootondezya luyando lwa Leza, lwalo ‘lutabikkili buyo maano kuzintu nzyoluyanda.’ (1 Bakorinto 13:4, 5) Bbaibbele lyaamba kuti: “Tabakaciti cintu cili coonse cibi naa kunyonyoona mucilundu cangu cisalala coonse, nkaambo masimpe nyika iyoozula luzyibo lwa Jehova a mbubonya maanzi mbwaazuzya lwizi.”—Isaya 11:9.
Bbaibbele litondezya kuti tupona kumazuba aamamanino aabweende bwazintu oobu akuti ino-ino Leza uyoozuzikizya cisyomezyo cakwe cakumana mapenzi aapa bantu kubula zintu nzyobayandika. b (Intembauzyo 12:5) Calino, njiisyo zyamu Bbaibbele zilakonzya kumugwasya kutegwa muliyumye mumapenzi ngomujisi lino aakubula mali. Mucikozyanyo, amubone zibalo zyakuti “Mbomukonzya Kuubya-ubya Bukkale Bwanu” acakuti “Kwaalanga Munzila Iili Kabotu Mali.”
a Jehova ndezina lya Leza kweelana ambokutondezyedwe mu Bbaibbele.—Intembauzyo 83:18.
b Kutegwa muzyibe kaambo ncomukonzya kulisyoma Bbaibbele, amubone cibalo cakuti “Bbaibbele Ndibbuku Lisyomeka Lijisi Kasimpe.”
Andiza Inga Mwaakkomanina Ayaaya
NGAZI YAMULINDIZI
Ino Ncinzi Ncobuyoocita Bwami bwa Leza?
Jesu wakalizyi kuti Bwami bwa Leza mbombubo bolikke bukonzya kumanizya mapenzi aali anyika. Ino ncinzi ncobwacita kale Bwami oobu icitupa kuba alusyomo?
SINSIMUKA!
Bulangizi Kuli Baabo Batajisi Kwakukkala Alimwi Abacete
Njiisyo zijanika mu Bbaibbele zilakonzya kumugwasya mumakani aamali alimwi akuba abuumi bubotu.
TUPANGO TWAMU BBAIBBELE TWAPANDULULWA
Lugwalo lwa Matayo 6:34 Lwapandululwa—“Mutanoolibiliki Zyabuzuba Butobela”
Amubale Matayo 6:34 kuzwa mubusanduluzi bwama Bbaibbele manji mpoonya akubala majwi aangawo aajisi bupanduluzi buyungizidwe alimwi atwaambo tugwasya mukwiiya. Amwiiye bupanduluzi bwakapango kamu Bbaibbele aaka.
