“Bantu balimukucita zintu zinji zitiisololele kukunyonyooka kwanyika ino-ino. Madolopo mapati ayoobbila mumeenda. Kupya kwiindilide. Maguwo aayoosya. Kubula kwameenda mumasena manji. Kuloba kwamisyobo minji yazisyango alimwi abanyama. Aaya taali makani aakubeja. Ncobatwaambila basayaansi kuti nceciyoocitika ikuti mfwulumende zitacinci milawo iijatikizya kubelesyegwa kwamagesi alimwi amungwimba.”—Oobu mbobakaamba ba secretary-general bambunga iitegwa United Nations, ba António Guterres, kweelana alipooti yamu April 4, 2022 yakapegwa aba Intergovernmental Panel kujatikizya kucinca kwambowuunga muwo.

 “Basayaansi bali mukucenjezya kuti ino-ino mapaakki aabanyama aainda ku 423 ayoonyonyoonwa akaambo kakucinca kwambowuunga muwo ku United States. Zintu zilangilwa kucitika zili mbuli ntenda zyaambidwe mu Bbaibbele: mulilo, kupaya kwameenda, kweenzemuka kwacaanda, kunyamuka kwamayuwe mulwizi alimwi akupya kapati.”—“Kupaya kwameenda kwakacitika ku Yellowstone, ncitondezyo camapenzi aaboola kumbele,”kweelana alipooti yaba The New York Times, yamu June 15, 2022.

 Sena penzi yakunyonyooka kwanyika ilakonzya kumana? Ikuti naa mboobo, nguni uyakulimana? Amubone ncolyaamba Bbaibbele kujatikizya makani aaya.

 Bbaibbele lyaamba kuti Leza ‘uyoonyonyoona baabo banyonyoona nyika.’ (Ciyubunuzyo 11:18) Kapango kamu Bbaibbele aaka katuyiisya zintu zyotatwe:

1.  1. Micito yabantu iyoopa kuti nyika inyonyooke.

2.  2. Kunyonyoonwa kwanyika kuyoomana.

3.  3. Leza, ikutali bantu nguyoolimana penzi lyakunyonyooka kwanyika.

 Bbaibbele lyaamba kuti “nyika inooliko lyoonse mane kukabe kutamani.” (Mukambausi 1:4) Lyoonse inookkalwa bantu.

•   “Balulami bayookona nyika, alimwi bayookkala alinjiyo lyoonse mane kukabe kutamani.”—Intembauzyo 37:29.

 Nyika iyoobambululwa cakumaninina.

•   “Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—Isaya 35:1.