Munyika yoonse, bantu banji balombozya kucileka kulya nyama.

•   “Bantu batalyi nyama balacita kufwumbwa ncobakonzya mumizeezo yabo amumicito kutapenzya banyama naa kujaya banyama kutegwa bajane cakulya naa zisani naa zintu zimbi buyo.”—The Vegan Society.

 Bantu bamwi balaleka kulya nyama ikutali buyo akaambo kakuti balababikkila maano banyama, pele alimwi bayanda kubotya masena, kukwabilila buumi bwabo naa akaambo kabukombi.

•   “Buumi bwakutalya nyama buliindene abuumi mbobapona bamwi akaambo kakuti kanji-kanji kutalya nyama bantu bakubona kuba cintu ncobasyoma, ncobeelede kusala, alimwi akuti ninzila muntu umwi aumwi mbwakonzya kucinca nyika.”—Britannica Academic.

 Sena buumi bwakutalya nyama mbobukonzya kumana mapenzi aamunyika? Ino Bbaibbele lyaamba nzi?

 Bbaibbele litondezya kuti Mulengi wesu, Jehova Leza, a ubona bantu kuti balisumpukide kwiinda banyama alimwi akuti wakabapa nguzu zyakweendelezya banyama. (Matalikilo 1:27, 28) Mukuya kwaciindi, Leza wakazumizya bantu kutalika kulya nyama. (Matalikilo 9:3) Nokuba boobo, takuzumizyi pe kupenzya banyama.—Tusimpi 12:10.

 Kweelana ancolyaamba Bbaibbele, kulya naa kutalya nyama ncakulisalila. b Kusala kwesu takuli nkuko kupa kuti tube bantu bayandika kapati mumeso aa Leza. (1 Bakorinto 8:8) Kunyina muntu weelede kubeteka umwi kujatikizya ncaasala kulya.—Baroma 14:3.

 Bbaibbele litondezya kuti mbotusala kupona buumi bwesu takukonzyi kumana mapenzi aali munyika. Mapenzi manji alasika akaambo kamapolitikisi, bukkale, alimwi amakani aamali, aalo aatakonzyi kubambululwa amuntu uuli woonse. Bbaibbele lyaamba kuti:

•   “Eeco cigogomene tacikonzyi koololwa pe.”—Mukambausi 1:15.

 Mulengi wesu uyoogwisya mapenzi ngotujisi mazuba aano. Bbaibbele libelesya mwaambo wamaambilambali kupandulula ncayoocita.

•   “Lino ndakabona julu lipya alimwi anyika mpya; nkaambo julu lyakaindi anyika yakaindi zyakamana, alimwi lwizi taluciko pe.”—Ciyubunuzyo 21:1.

 Leza uyoogwisya mfwulumende zyabantu naa, or “julu lyakaindi,” akubikka “julu lipya,” nkokuti mfwulumende ya Bwami bwakwe yakujulu. Bwami bwakwe buyoogusya “nyika yakaindi,” nkokuti bantu babi, alimwi buyakweendelezya “nyika mpya,” nkokuti aabo bayanda kupona kabali balelwa banjiyo.

 Bulikke bweendelezi bwa Bwami bwa Leza mbobuyoopa bantu kupona muluumuno abanyama alimwi akutanyonyoona nyika.—Isaya 11:6-9.