Mulipooti yamu June 2022, mweendelezi wambunga yiitwa kuti World Bank Group wakaamba kuti: “Nyika yoonse ilangilwa kuba apenzi lyamali, aalo makwebo alaunka ansi. Myuulo yazintu ilimukutanta cakufwambaana, mpoonya aciindi ncoona bantu tabajisi mali.”

 Mbunga yiitwa kuti International Monetary Fund yakaamba kuti: “Muulo wamungwimba alimwi azyakulya ulimukutanta cakufwambaana akupa kuti bantu bali mumasi aatavwubide bajatikizyigwe kapati.”

 Bbaibbele lilatugwasya kumvwisya kaambo ncokuli mapenzi aamali, mbotukonzya kuliyumya, alimwi abulangizi buliko kujatikizya mboliyoomana penzi eeli cakumaninina.

•   Bbaibbele lyaamba mazuba ngotupona kuti “mazuba aamamanino.”—2 Timoteyo 3:1.

•   Jesu wakaamba kuti tuyoobona “zintu ziyoosya,” mumazuba aaya. (Luka 21:11) Bantu balalibilika kapati ikuti myuulo yazintu yatanta. Balayoowa kujatikizya zili kumbele akuti naa bayoocikonzya kulanganya mikwasyi yabo.

•   Bbuku lya Ciyubunuzyo lyakasinsima kujatikizya kutanta kwamyuulo yazyakulya muciindi eeci. Lyaamba kuti: “Ndakamvwa icakali kulimvwisya mbuli kuti ndijwi . . . kaliti: ‘Kkilo lyomwe lyawiiti lilaulwa dinari lyomwe, makkilo otatwe aabbaale alaulwa dinari lyomwe.’”—Ciyubunuzyo 6:6.

 Kutegwa mwiiye zinji kujatikizya “mazuba aamamanino” alimwi abusinsimi buli mubbuku lya Ciyubunuzyo, amweebelele kavidiyo kakuti Nyika Yakacinca Kuzwa mu 1914 akubala cibalo cakuti “Basimabbiza Bone—Ino Mbaani?”

•   “Bayooyaka maanda akukkala mulingawo, bayoosyanga myuunda yamisaansa akulya micelo yanjiyo. Tabakayaki maanda kuti muntu uumbi akakkale nguwe mulingawo, alimwi tabakasyangi myuunda kuti muntu uumbi akalye nguwe micelo yanjiyo.”—Isaya 65:21, 22.

•   “Kuyooba maila manji anyika; atala lyamalundu ayoovwula citaambiki.”—Intembauzyo 72:16.

•   “‘Akaambo kakuti bantu bapengede baladyaamininwa, akaambo kakutongela kwabacete, ndilanyamuka akubweza ntaamu,’ mbwaamba Jehova.”—Intembauzyo 12:5. a

 Ino-ino, Leza uyoomana mapenzi oonse aajatikizya mali, kutali buyo mucisi comwe, pele nyika yoonse. Kutegwa muzyibe mbwayoocita oobo, amubale cibalo cakuti “Sena Cilakonzyeka Kubantu Boonse Kuba Azintu Nzyobayandika?”

 Pele noliba lino, Bbaibbele lilakonzya kumugwasya kulanganya makani aamyuulo iiyabutanta. Munzila nzi? Lilijisi lulayo lugwasya kujatikizya mbotweelede kwaabelesya kabotu mali. (Tusimpi 23:4, 5; Mukambausi 7:12) Kutegwa mwiiye zinji, amubale cibalo cakuti “Amwaakwabilile Mali Aanu Azintu Nzyomujisi,” acakuti “Mbomukonzya Kuubya-ubya Bukkale Bwanu.”