Bbaibbele lyaamba kuti ciindi bana Israyeli nobakazunda Nyika Yakasyomezyegwa akuyaabanya akati kamisyobo yabo, mikwasyi iili kkumi yamusyobo wa Manase yakapegwa zibeela zyanyika kumbo aa Jordano, yaandene ankoyakapegwa mikwasyi imwi. (Joshua 17:1-6) Sena kuli zintu zyakavwukkulwa izipa bumboni bwakuti makani aaya akacitika ncobeni?

 Mu 1910 kwakavwukkulwa zikaye mu Samariya izyakalembedwe. Zikaye eezyi zyakajisi malembo aamu Chihebrayo, alo aakali kwaamba kutolwa kwampasya zidula kubikkilizya awaini alimwi amafwuta mabotu kuŋanda yamwami mudolopo mpati. Zyoonse antoomwe zikaye izyakajanwa zyakali 102, zyakali kwaamba zintu zyamumwaanda wamyaka walusele B.C.E., pele izili buyo 63 nzyezyakajisi mabala aalibonya. Nokuba boobo, zikaye zyoonse izili 63 zilatondezya madeeti amazina aamikwasyi, alimwi aabantu ibakali kutuma akutambula mpasya.

 Cikkomanisya ncakuti, mikwasyi yoonse yaambidwe muzikaye zyaku Samariya njamusyobo wa Manase. Kweelana abbuku litegwa NIV Archaeological Study Bible, zikaye zipa “bumboni buyungizyidwe bwamu Bbaibbele butondezya kweendelana akati kamikwasyi ya Manase alimwi abusena Bbaibbele mbolyaamba kuti moyakakkede.”

 Zikaye zyaku Samaria alimwi zitondezya mbwaluzi mulembi wa Bbaibbele Amosi, iwakaamba kujatikizya bavwubi bakuciindi eeco kuti: “Waini baunywida munkapu zipati alimwi balanana mafwuta mabotu kapati.” (Amosi 6:1, 6) Zikaye eezyi zilasinizya kuti zintu zili boobo masimpe zyakali kutumwa kucibeela canyika iyakali kukkalwa amikwasyi iili kkumi ya Manase.