Mwaka amwaka, kulacitika mizuzumo yanyika minji kapati. Nokuba kuti bunji bwaziindi inga misyoonto, mizuzumo mipati ilakonzya kupa kuti zintu zinyonyooke, kupa bantu kupenga alimwi akufwa. Zimwi ziindi, ipa kuti kube kupaya kwamaanzi kwalo ikunyonyoona masena aali munsi-munsi alwizi. Akaambo kakupaya ooku, bantu banji ibakkala mumasena aaya balafwa. Sena Bbaibbele lyakaambila limwi kujatikizya mizuzumo yanyika mipati eeyi?

Mucibalo eeci tulalanga-langa makani aatobela:

•  Sena Bbaibbele lyakaambila limwi kujatikizya mizuzumo yanyika?

•  Sena mizuzumo yanyika iicitika mazuba aano izuzikizya businsimi bwamu Bbaibbele?

•  Ino businsimi bwamu Bbaibbele bujatikizya mizuzumo yanyika bwaamba nzi kulindiswe?

•  Makani aakubeja kujatikizya businsimi bwamu Bbaibbele alimwi amizuzumo yanyika

 Jesu wakaamba mizuzumo yanyika mubusinsimi bulembedwe mu Bbaibbele. Majwi aakwe alilembedwe mumabbuku aamu Bbaibbele otatwe aatobela:

 “Cisi ciyoobukila cisinyina abwami buyoobukila bwaminyina, alimwi kuyooba nzala amizuzumo yanyika mumasena aaindene-indene.”—Matayo 24:7.

 “Cisi ciyoobukila cisinyina abwami buyoobukila bwaminyina; kuyooba mizuzumo yanyika mumasena aaindene-indene; alimwi kuyooba nzala.”—Marko 13:8.

 “Kuyooba mizuzumo yanyika mipati, alimwi mumasena aaindene-indene kuyooba nzala azilwazi.”—Luka 21:11.

 Aboobo Jesu wakaamba kuti “mizuzumo yanyika mipati” yakali kuyoocitika “mumasena aaindene-indene,” aciindi ncomunya kwakali kuyooba ankondo, nzala alimwi azilwazi. Ciindi zintu zyoonse eezyi nozicitika antoomwe, cakutadooneka cilalibonya kuti tupona ‘kumamanino aabweende bwazintu,’ naa “kumazuba aamamanino.” (Matayo 24:3; 2 Timoteyo 3:1) Kweelana ambozyakatobelana kucitika zintu zilembedwe mu Bbaibbele, ‘mazuba aamamanino’ akatalika mu 1914 alimwi taanamana pe.

 Inzya. Businsimi bwa Jesu, kubikkilizya anzyaakaamba kujatikizya mizuzumo yanyika, buleendelana azintu zicitika mazuba aano. Kuzwa mu 1914, kwacitika mizuzumo yanyika mipati iinda ku 1,950, yalo yajaya bantu bainda ku 2 miliyoni. a Amulange-lange zikozyanyo zisyoonto kuzwa mumwaanda wamyaka ooyu.

 2004—Indian Ocean. Muzuzumo wanyika uusika ku 9.1-magnitude iwakacitika wakapa kuti kube kupaya kwamaanzi kwalo kwakajatikizya zisi zili 12 akujaya bantu babalilwa ku 225,000.

 2008—China. Muzuzumo wanyika uusika ku 7.9-magnitude wakanyonyoona minzi alimwi amadolopo, alimwi kuyeeyelwa kuti wakajaya bantu basika ku 90,000, kucisa bantu bali 375,000, alimwi akunyonyoona maanda aabantu banji kapati.

 2010—Haiti. Muzuzumo wanyika uusika ku 7.0-magnitude alimwi amizuzumo misyoonto iyakatobela yakajaya bantu bainda ku 300,000 akusiya bantu bainda ku 1 miliyoni kabatajisi maanda.

 2011—Japan. Muzuzumo wanyika uusika ku 9.0-magnitude alimwi akupaya kwamaanzi kwakatobela kwakapa kuti bantu babalilwa ku 18,500 bajaigwe mpoonya bantu banji bakabula kwakukkala. Fakitoli iitegwa Fukushima power plant yakanyonyooka, calo cakapa kuti kutalike kuzwa muwo mubyaabi kapati. Nokwakainda myaka iili 10, bantu babalilwa ku 40,000 tiibakalinapiluka kumaanda aabo akaambo kamuwo wakacinyongene.

 Businsimi bwamu Bbaibbele bujatikizya mizuzumo yanyika butuzyibya cintu ciyoocitika ino-ino. Jesu wakaamba kuti: “mwaakubona zintu eezyi kazicitika, amukazyibe kuti Bwami bwa Leza bulaafwaafwi.”—Luka 21:31.

 Bbaibbele lyaamba kuti Bwami bwa Leza nimfwulumende yini-yini yakujulu Jesu Kristo kali Mwami. Bwami oobu mbombubo Jesu mbwaakayiisya basikumutobela kuti kababupailila.—Matayo 6:10.

 Bwami bwa Leza bwaakutalika kulela anyika, Leza uyooba masimpe kuti ntenda zilicitikila, mbuli mizuzumo yanyika, taicikapenzi bantu alimwi. (Isaya 32:18) Kwiinda zyoonse, uyooponya mibili yabantu yalo yanyongana akaambo kamizuzumo yanyika. (Isaya 65:17; Ciyubunuzyo 21:3, 4) Kutegwa muzyibe zinji, amubale cibalo cakuti “Ino Bwami bwa Leza Buyoocita Nzi?”