Sena Ncolyaamba Bbaibbele Kujatikizya ba Juda Kabali Bazike mu Babuloni Cililuzi?
Myaka iibalilwa ku 2,600 yainda, ba Juda bakazundwa akutolwa ku Babuloni, kwalo nkobakakkala kabali bazike kwamyaka iili 70. Kweelana a Bbaibbele ncolyaamba, Leza wakaambila limwi bukkale bumwi mbobakali kuyoopona ba Juda kabali bazike mu Babuloni: “Amuyake maanda akukkala mulingawo. Amulime myuunda akulya micelo yanjiyo. Amukwate bamakaintu akuzyala bana basankwa abasimbi. . . . Amuyandaule luumuno lwamunzi wacisi ooko nkondamutola mubuzike.” (Jeremiya 29:1, 4-7) Sena oobu mbombubo mbobakali kukkala ba Juda?
Basikuvwuntauzya bakalanga-langa tubeela tupapalete twabulongo twiinda ku 100 twalo twaambwa kuti twakazwa mumunzi wansiku wa Babuloni naa afwaafwi. Tubeela ootu tutondezya kuti bazike ba Juda ibanji bakazumanana kutobela zilengwa zyabo abukombi kumwi kabalibombya kubulelo bwabana Babuloni akupona muluumuno. Tubeela ootu twakaliko kuzwa mu 572 kusika mu 477 B.C.E., tulaamba azizuminano zyamaleenti, makwebo ngobakali kucita, zikonke zyakubbadela cikwelete, alimwi amakani amwi aamba zyamali. Bbuku limwi lyaamba kuti “tubeela ootu tugwasya kuzyiba kuti bazike bakali buyo mbuli bantu boonse ibakali kukkala muminzi: bakali kulima akuyaka maanda, kubbadela mitelo, akubelekela mwami.”
Kabeela kapapalete ikakajanwa mudolopo lya Juda
Tubeela ootu tuyandika alimwi tutondezya kuti kwakali minzi yansaizi yaba Juda kubusena bwiitwa kuti Al Yahudu, naa dolopo lya Juda. Mazina aamazyalani one aaba Juda alilembedwe mutubeela ootu, amwi ajisi mabala aa Chihebrayo cakaindi. Tubeela ootu katutanajanwa, basikwiiya zyamu Bbaibbele tiibakazyi zinji kujatikizya buumi bwabazike ba Juda ku Babuloni. Dr. Filip Vukosavović, umwi wabeendelezi mu board of Israel Antiquities Authority, wakaamba kuti: “Kwiinda mukubala tubeela ootu, twaiya lino zinji kujatikizya bazike ba Juda, twaazyiba mazina aabo, nkobakali kukkala aciindi ncobakali kupona, anzyobakali kucita.”
Ba Juda bakalijisi lwaanguluko luli mbolubede mu Babuloni
Ba Juda bakalijisi lwaanguluko luli mbolubede lwakusala kwakukkala alimwi acakucita. Vukosavović alimwi wakaamba kuti tiibakali kukkala “buyo mu Al-Yahudu, pele alimwi bakali kujanika amumadolopo aambi manji.” Bamwi bambabo bakajana luzyibo mumilimo iindene-indene, lwalo ndobakazyoobelesya mukuyakulula munzi wa Jerusalemu. (Nehemiya 3:8, 31, 32) Tubeela tupapalete twaku Al-Yahudu alimwi tulasinizya kuti ba Juda banji bakasala kuzumanana kukkala mu Babuloni noliba leelyo nobakaangununwa kubuzike bwabo. Eeci citondezya buyo kuti bakalijisi luumuno luli mbolubede mu Babuloni mbubwenya Ijwi lya Leza mbolyaamba.
