Njeeyi lipooti yakapegwa aba United Nations:

•   Kuzwa mu October 7 kusikila mu October 23, 2023, munkondo iili akati ka Gaza a Israel mwakafwa bantu bainda ku 6,400, mpoonya ibali 15,200 bakalicisa. Bunji bwabantu aaba mbantu-bantu buyo. Kuyungizya waawo, ibanji bakaasiya maanda aabo.

•   Kusikila mu September 24, 2023, munkondo iili akati ka Russia a Ukraine mwakajaigwa bantu-bantu buyo ibasika ku 9,701, kumane ibali 17,748 bakalicisa ku Ukraine.

 Ino mbulangizi nzi Bbaibbele mbolibapa aabo bapenga akaambo kankondo?

 Bbaibbele lyakasinsima kuti Leza ‘uyoomanizya nkondo munyika yoonse mboizulwa.’ (Intembauzyo 46:9) Mfwulumende yakujulu naa bwami, iyoonjila mubusena bwamfwulumende zyoonse zyabantu. (Daniele 2:44) Bwami bwa Leza buyookatalusya bantu.

 Amubone Jesu Kristo, Mwami wa Bwami bwa Leza ncayoocita:

•   “Uyoovwuna mucete uukwiilila lugwasyo, uupengede alimwi amuntu uuli woonse uutajisi mugwasyi. Muntu uupengede alimwi amucete uyoobafwida lubomba, alimwi uyoofwutula buumi bwabacete. Uyoobavwuna kukudyaamininwa akunkondo.”—Intembauzyo 72:12-14.

 Kwiinda mukubelesya Bwami, Leza uyakwaamanizya cakumaninina mapenzi oonse aboola akaambo kankondo akulwana.

•   “Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—Ciyubunuzyo 21:4.

 Lino-lino Bwami bwa Leza bulapa kuti nyika ibote. Bbaibbele lyakasinsima kuti mumazuba ngotupona, kunooli “nkondo mumasena aalaafwaafwi alimwi amasena aali kule.” (Matayo 24:6) Nkondo azintu zimwi zicitika zitondezya kuti tupona “kumazuba aamamanino” aabweendelezi bwabantu.—2 Timoteyo 3:1.