AMULANGILE!
Basayaansi Baityuna Nkoloko Kuya Kumbele—Ino Bbaibbele Lyaamba Nzi?
Mu January 24, 2023, basayaansi bakaamba kuti Nkoloko iitegwa Doomsday a lino iili afwaafwi kusika akati kamasiku, yalo iiminina mamanino aanyika.
“Nkoloko eeyi itondezya kuti bukkale bwabija, akuti bantu balaafwaafwi kulinyonyoona. Muli Bwabili, bakaityuna cakuti lino ilaafwaafwi kusika akati kamasiku akaambo kazintu mbuli nkondo iilimukucitika ku Ukraine, nkondo yanyukkiliya iilangilwa kucitika alimwi akunyonyooka kwanyika.”—AFP International Text Wire.
“Muli Bwabili, basayaansi bakayubununa kuti nkoloko eeyi baityuna kuya kumbele cakuti lino kwacaala buyo tuvwalu-vwalu tuli 90 kuti isike akati kamasiku icaamba kuti armagedoni yaswena kapati kwiinda kaindi.”—ABC News.
“Kabunga kabasayaansi bazwa muzisi ziindene-indene kakacenjezya kuti bantu balaafwaafwi kulinyonyoona kwiinda kaindi.”—The Guardian.
Sena mamanino abantu alimwi anyika zilaafwaafwi? Sena tweelede kuyoowa zintu ziyoocitika kumbele? Ino Bbaibbele lyaamba nzi?
Zintu ziyoocitika kumbele
Kweelana a Bbaibbele, “nyika inooliko lyoonse mane kukabe kutamani” alimwi kunooli bantu “bayookkala alinjiyo lyoonse mane kukabe kutamani.” (Mukambausi 1:4; Intembauzyo 37:29) Aboobo bantu tabakainyonyooni nyika yoonse cakuti kukabule uukkala alinjiyo.
Nokuba boobo, Bbaibbele lilaamba kujatikizya mamanino. Mucikozyanyo, lyaamba kuti “inyika ilamana.”—1 Johane 2:17.
Kutegwa muzyibe ncocaamba, Bbaibbele nolyaamba kujatikizya mamanino aanyika, amubale cibalo cakuti “Sena Nyika Eeyi Imana Buya? Sena Bbaibbele Lyaamba Kuti Nyika Iyakunyonyoonwa Cakumaninina?”
Kutegwa muzyibe ncolyaamba Bbaibbele kujatikizya noziyoocitika zintu zilangilwa kumbele, amubale cibalo cakuti “Ino Nyika Iyoomana Lili?”
Kuzumanana kuzilanga kabotu zintu
Bbaibbele lilakonzya kutugwasya kuzumanana kuzilanga kabotu zintu nokuba kuti kuli mapenzi lino munyika. Mubuti?
Bbaibbele lilatupa lulayo lukonzya kutugwasya mubuumi. (2 Timoteyo 3:16, 17) Mucikozyanyo, amubale cibalo cakuti “Mbomukonzya Kulwana Kulibilika” kutegwa mubone Bbaibbele mbolikonzya kumugwasya kuzumanana kuzilanga kabotu zintu nokuba kuti kuli mapenzi munyika.
Bbaibbele lilapa bulangizi busyomeka bwakumbele. (Baroma 15:4) Lilaamba cini ncotweelede kulangila lino alimwi akumbele, calo citugwasya kutazungaana tacikwe makani azintu zilimukucitika munyika.
Kutegwa mwiiye zinji mu Bbaibbele, twamutamba kuti musole pulogilamu yesu yaciiyo ca Bbaibbele citabbadelelwi sunu.
a “Nkoloko eeyi ya Doomsday yakapangilwa kucenjezya banamaleya kuti bantu bali afwaafwi kwiinyonyoona nyika yesu kubelesya tekinoloji njotulipangila. Munzila yamaambilambali, ituyeezya zintu nzyotweelede kucita kutegwa tuzumanane kupona anyika.”—Bulletin of the Atomic Scientists.
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Ino Nkondo ya Amagedoni Ninzi?
Ibbala lyakuti Amagedoni lijanwa buyo ciindi comwe mu Bbaibbele, pele inkondo njoyiiminina ilabandikwa mu Magwalo oonse.
NJIISYO ZYAMU BBAIBBELE ZIYANDIKA
Nkaambo Nzi Leza Ncalekelede Kupenga?
Bantu banji balabuzya kaambo nyika ncoizwide kusulaikana akupenga. Bbaibbele lilapa bwiinguzi bukkazika moyo alimwi buumbulizya.
SINSIMUKA!
Njiisyo Izipa Kuba Abulangizi
Amuzyibe makani amwi kujatikizya zisyomezyo zya Leza zikkomanisya zyalo izitupa bulangizi bwakumbele.
NJIISYO ZYAMU BBAIBBELE ZIYANDIKA
Ino Leza Wakailengela Nzi Nyika?
Nyika nimbotu kapati. Ibikkidwe abusena buli kabotu kapati kuzwa kuzuba, taisendekede kapati, alimwi taibaliki kapati ciindi noizinguluka. Nkaambo nzi Leza ncaakabikkila kapati maano ciindi naakali kupanga nyika?
KUJATIKIZYA NDISWE
Amulombe Kuswaigwa
Amubandike mubuzyo wamu Bbaibbele, naa amwiiye zinji kujatikizya Bakamboni ba Jehova.
