Inkondo iili ku Ukraine antoomwe antenda ziboola akaambo kakucinca kwambowuunga muwo, zyazumanana kupa kuti kubule zyakulya munyika yoonse. Eeci cili boobu kwaambisya muzisi zicisumpuka mwalo bantu banji mobajana buyumuyumu bwakujana zyakulya nzyobayandika.

•   “Kupangwa kwazyakulya kuli mukunyonganizyigwa akaambo kankondo, kucinca kwambowuunga muwo, kudula kwamungwimba alimwi azintu zimwi buyo.”—António Guterres, UN secretary-general, July 17, 2023.

•   “Cisi ca Russia tacicili mucizuminano cakutuma zyakulya kucisi ca Ukraine. Basyaazibwene bayeeya kuti eeci inga capa kuti kubula kwazyakulya munyika yoonse kuzumanane mane buya akwiindila cakuti muzisi zitasumpukide zyakulya zidule kapati, kwaambisya zisi izili mu Africa nkoili kunyika alimwi aku Middle East.”—Atalayar.com, July 23, 2023.

 Amubone Bbaibbele ncolyaamba kujatikizya kubula kwazyakulya alimwi azyakumbele.

•   Jesu wakasinsima kuti: “Nkaambo cisi ciyoobukila cisinyina abwami buyoobukila bwaminyina, alimwi kuyooba nzala.”—Matayo 24:7.

•   Bbuku lyamu Bbaibbele lya Ciyubunuzyo lyaamba kujatikizya basimabbiza bone bamucikozyanyo. Umwi wabasimabbiza aaba wiiminina nkondo. Mpoonya ulatobelwa aumwi iwiiminina nzala. Aciindi eeci cinookatazya kujana cakulya alimwi cinoodula kapati. “Ndakalanga akubona ibbiza lisiya, alimwi ooyo wakatantide alindilyo wakajisi cikkelo mujanza lyakwe. Alimwi ndakamvwa icakali kulimvwisya mbuli kuti ndijwi . . . kaliti: ‘Kkilo lyomwe lyawiiti lilaulwa dinari lyomwe, makkilo otatwe aabbaale alaulwa dinari lyomwe.’”—Ciyubunuzyo 6:5, 6.

 Businsimi oobu bwamu Bbaibbele ibujatikizya penzi lyakubula zyakulya buli mukuzuzikizyigwa mazuba aano muciindi Bbaibbele ncolyaamba kuti “mazuba aamamanino.” (2 Timoteyo 3:1) Kutegwa mwiiye zinji kujatikizya “mazuba aamamanino” alimwi abasimabbiza bone baambidwe kubbuku lya Ciyubunuzyo, amweebelele kavidiyo kakuti Nyika Yakacinca Kuzwa mu 1914 alimwi akubala cibalo cakuti “Basimabbiza Bone—Ino Mbaani?”

•   Bbaibbele lilijisi lulayo lukonzya kutugwasya kuliyumya mubukkale bukatazya, kubikkilizya aaciindi zyakulya nozyadula naa kubulika buya. Amubone zikozyanyo zimwi mucibalo cakuti “Mbomukonzya Kuubya-ubya Bukkale Bwanu.”

•   Bbaibbele alimwi lilatupa bulangizi bwakuti zintu ziyoobota kumbele. Lisyomezya ciindi ‘nokuyooba maila manji anyika’ alimwi bantu boonse nobanoojisi zyakulya zinji. (Intembauzyo 72:16) Kutegwa muzyibe zinji kujatikizya bulangizi bwamu Bbaibbele bwakumbele alimwi ancomukonzya kubusyoma, amubale cibalo cakuti “Bulangizi Bwini-bwini Bwabuumi Bubotu Kumbele.”